An Baraan nga Espiritu—Ano Ito?

MAKAUSA hi Jesus nagpakiana ha iya mga disipulo: ‘Hain ha iyo nga amay, nga kon an iya anak nangangaro hin tinapay, iya tatagan hin bato? O kon isda, tatagan hin halas liwan han isda?’ (Lukas 11:11, 12) An kabataan ha Galilea naruruyag ha pagkaon hin mga bonay ngan isda, salit maaram hira han ira karuyag.

Hi Jesus nagsiring nga padayon nga pangaroon naton an baraan nga espiritu, pariho hin nagugutom nga bata nga nangangaro hin pagkaon. (Lukas 11:9, 13) An paghibaro kon ano an baraan nga espiritu mabulig ha aton nga masabtan kon mationan-o kaimportante an pagkaada hito. Salit aton anay usisahon an igintututdo han Biblia mahitungod hito.

“Gahum han Gihitaasi”

An Biblia matin-aw nga nasiring nga an baraan nga espiritu pwersa nga ginagamit han Dios ha pagtuman han iya kaburut-on. Pananglitan, han ginsidngan han anghel nga hi Gabriel hi Maria nga magkakaada hiya anak nga lalaki bisan kon birhen hiya, an anghel nagsiring: “An Espiritu Santo makanhi ha imo, ngan an gahum han Gihitaasi sugad hin lindong makakatabon ha imo: tungod hini an baraan nga imo ig-aanak, pagngangaranan hin Anak han Dios.” (Lukas 1:35) Uyon han ginsiring ni Gabriel, may-ada koneksyon an baraan nga espiritu ngan an “gahum han Gihitaasi.”

An pariho nga punto mababasa ha iba nga teksto ha Biblia. An propeta nga hi Mika nagsiring: “Ako puno hin gahum pinaagi han espiritu ni Jehova.” (Mika 3:8) Hi Jesus nagsaad ha iya mga disipulo: “Kamo makarawat hin gahum kon kumanhi na an Espiritu Santo ha iyo.” (Buhat 1:8) Ngan hi apostol Pablo naghisgot mahitungod han “gahum han Espiritu Santo.”—Roma 15:13, 19.

Salit, ano an aton mahibabaroan tikang hini? May-ada duok nga koneksyon an baraan  nga espiritu ngan an gahum han Dios. An baraan nga espiritu amo an paagi nga ginagamit ni Jehova an iya gahum. Karuyag sidngon, ito amo an aktibo nga pwersa han Dios. Ngan urusahon gud ito nga pwersa! Makuri naton masantop an gahum nga ginkinahanglan ha paglarang han bug-os nga uniberso. Pero, pinaagi kan propeta Isaias, hi Jehova nagsiring: “Alsaha ha hitaas an iyo mga mata, ngan kitaa kon hin-o an naghimo hini, nga nagpakita han ira panon ha kadam-an; iya hira ngatanan pinanawag ha ngaran; pinaagi han kadaku han iya gahum, ngan kay hiya makusog ha kagahum, waray usa nga nakukulang.”—Isaias 40:26.

Hito nga paagi, ipinapakita han Biblia nga an uniberso nga maopay an pagkaorganisa naeksister tungod han ‘daku nga gahum’ han Makagarahum-ha-ngatanan nga Dios. Matin-aw, sobra kamakagarahum an aktibo nga pwersa han Dios, ngan an aton pag-eksister  nadepende hito.—Kitaa an kahon nga “An Nahihimo han Baraan nga Espiritu.”

Mahimo gamiton ni Jehova an iya baraan nga espiritu ha urusahon gud nga paagi, sugad han iya paglarang han uniberso. Kondi mahimo liwat niya gamiton ito ha pagbulig ha mga tawo. Damu nga ehemplo ha Biblia an nagpapakita kon paonan-o an aktibo nga pwersa han Dios naghatag hin gahum ha iya mga surugoon ha tuna.

“An Espiritu han Ginoo Aadi ha Akon”

Ipinapakita han ministeryo ni Jesus an makapainteres nga paagi kon paonan-o an baraan nga espiritu han Dios naghahatag hin gahum ha iya mga surugoon. “An Espiritu han Ginoo aadi ha akon,” ginsidngan ni Jesus an mga taga-Nasaret. (Lukas 4:18) Ano an nahimo ni Jesus pinaagi han “gahum han Espiritu”? (Lukas 4:14) Natambal niya an ngatanan nga klase hin sakit, napakalma an mabalud nga dagat, napakaon an yinukot nga mga tawo pinaagi hin pipira la nga tinapay ngan isda, ngan nabanhaw pa ngani an mga patay. Ginhulagway ni apostol Pedro hi Jesus sugad nga “tawo nga pinili han Dios . . . tungod han mga katingalahan ngan mga urusahon ngan mga tigaman, nga ginbuhat han Dios tungod ha iya.”—Buhat 2:22.

Ha presente nga panahon, diri na nagpapahinabo an baraan nga espiritu hin sugad nga mga milagro. Bisan pa hito, makakahimo ito hin urusahon nga mga butang para ha aton. Andam ihatag ni Jehova an iya baraan nga espiritu ha iya magsiringba, sugad han iginpasarig ni Jesus ha iya mga disipulo. (Lukas 11:13) Salit, hi apostol Pablo nakagsiring: “Ngatanan mahihimo ko ha gahum han Nagpaparig-on ha akon.” (Filipos 4:13) Mahimo ba makaapekto hin sugad an baraan nga espiritu ha imo? Babatunon ito han sunod nga artikulo.

[Kahon/Retrato ha pahina 5]

Kon kay Ano nga an Baraan nga Espiritu Diri Persona

Iginpariho han Biblia an baraan nga espiritu ha tubig. Han nagsaad an Dios hin mga bendisyon ha tidaraon ha iya katawohan, hiya nagsiring: “Akon iipisan hin tubig hiya nga inuuhaw, ngan hin mga sapa an mamara nga tuna; akon iipisan han akon Espiritu an imo tulin, ngan han akon bendisyon an imo mga anak.”—Isaias 44:3.

Han ipisan han Dios an iya mga surugoon han iya espiritu, hira ‘napuno han Espiritu Santo.’ Hira Jesus, Juan nga Parabawtismo, Pedro, Pablo, Bernabe, ngan an iba nga disipulo nga nagkatirok ha adlaw han Pentekostes 33 K.P. ginhulagway sugad nga napuno han baraan nga espiritu.—Lukas 1:15; 4:1; Buhat 4:8; 9:17; 11:22, 24; 13:9.

Tagda ini: Mahimo ba an usa nga persona ‘maiipis’ ha damu nga magkalain-lain nga indibiduwal? Masisiring mo ba nga an usa nga persona ‘makakapuno’ hin usa nga grupo hin mga tawo? Imposible. An Biblia naghihisgot hin mga tawo nga napuno hin kinaadman, pagsabot, o husto nga kahibaro, kondi waray gud ito maghisgot hin bisan hin-o nga napuno hin iba nga persona.—Eksodo 28:3; 1 Hadi 7:14; Lukas 2:40; Kolosas 1:9.

An Griego nga pulong nga iginhubad nga “espiritu” amo an pneuʹma, nga nangangahulogan liwat hin diri nakikita nga gahum. Sumala ha libro nga Expository Dictionary of New Testament Words ni Vine, an pulong nga pneuʹma “siyahan nga nagtutudlok ha hangin . . . gininhawa; ngan labi na ha espiritu, nga pariho hin hangin, diri nakikita, waray pisikal nga lawas ngan gamhanan.”

Matin-aw, kon sugad, an baraan nga espiritu diri usa nga persona. a

[Footnote]

[Ginkuhaan han Retrato]

Photodisc/SuperStock