An Nagtutuman han Iya mga Saad
Magin Duok ha Dios
An Nagtutuman han Iya mga Saad
MAKURI ba para ha imo nga sumarig ha iba? Makasurubo nga nagkikinabuhi kita ha kalibotan nga normal na la an pagpakyas han pagsarig. Kon napakyas ka na hin usa nga imo ginsarigan—bangin tungod hin buwa o waray tumana nga saad—bangin makuri na para ha imo an pagsarig utro. Kondi, may masasarigan ka nga diri ka gud papakyason. “Sarig kan Jehova ha bug-os mo nga kasingkasing,” nagsasagda an Proberbios 3:5. Kay ano nga takos hi Jehova han sugad nga pagsarig? Basi mabaton ito, aton usisahon an ginsiring ni Josue—usa nga sinarig kan Jehova hin bug-os—sugad han mababasa ha Josue 23:14.
Tagda ini nga kahimtang. Hi Josue nga sinaliwan kan Moises sugad nga lider han Israel, hirani na mag-110 an pangidaron. Durante han iya hilawig nga kinabuhi, personal nga nakita niya an damu nga urusahon nga ginbuhat ni Jehova para ha Israel, upod na an milagroso nga pagtalwas ha Dagat nga Pula, mga 60 ka tuig na an naglabay. Samtang iya ginpapamalandong an naglabay, iya ginpatawag an ‘katigurangan [han Israel] ngan an ira mga pangulo, mga hukom, ngan mga punoan.’ (Josue 23:2) An iya mga pulong hito nga takna nagpapakita diri la han kinaadman tungod ha pagin edaran kondi pati han hingyap han iya kasingkasing nga puno hin pagtoo.
“Ako hini nga adlaw makadto ha dalan han bug-os nga kalibotan,” nagsiring hi Josue. An mga pulong nga “ha dalan han bug-os nga kalibotan” simboliko nga mga pulong para ha kamatayon. Hito nga paagi, sugad hin nasiring hiya, “Diri na mag-iiha an akon kinabuhi.” Tungod kay maaram hiya nga hirani na hiya mamatay, sigurado nga damu nga oras an iya gin-gamit ha pagpamalandong han iya kinabuhi. Ano an iya tugon ha iya mga igkasi-magsiringba?
Hi Josue nagpadayon: “Waray usa nga butang nga nakawang ha ngatanan nga mag-opay nga butang nga kan Jehova nga iyo Dios iginyakan mahitungod ha iyo; an ngatanan natuman para ha iyo, waray usa nga butang nga nakawang hini.” Ini nga mga pulong nagpapakita nga nasarig gud hiya ha Dios. Ano an hinungdan han iya pagsarig? An iya kahibaro nga pirme gintutuman ni Jehova an Iya mga saad han ginpamalandong niya an ngatanan nga iya nakita. * An punto matin-aw: Karuyag ni Josue nga an iya mga igkasi-Israelita magkaada bug-os nga pagtoo nga an ngatanan nga saad ni Jehova para ha tidaraon matutuman gihapon.
May kalabotan ha Josue 23:14, usa nga reperensya an nasiring: “Kitaa an ngatanan nga saad han Biblia; usisaha an mga kasaysayan han kalibotan; ngan pakianhi an ngatanan nga tawo dida hito, ngan imo mahibabaroan nga waray bisan usa nga higayon nga waray tumana o ginkalimtan han Dios an iya saad.” Kon posible an paghimo hito, an aton konklusyon magigin pariho gud han kan Josue—waray saad ni Jehova an mapapakyas.—1 Hadi 8:56; Isaias 55:10, 11.
Mababasa ha Biblia an rekord mahitungod han mga saad han Dios nga natuman, upod na an iba nga nakikita naton nga natutuman. Mababasa liwat dida hito an urusahon nga mga saad ni Jehova para ha aton tidaraon. * Kay ano nga diri personal nga usisahon ito? An pag-aram han Biblia mahimo makakombinse ha imo nga an usa nga nagtutuman han iya mga saad takos han imo pagsarig.
[Mga footnote]
^ par. 7 Iini an pipira han saad o pasarig nga nakita ni Josue nga natuman. An paghatag ni Jehova ha Israel hin tuna nga ira pagtatag-iyahon. (Itanding an Genesis 12:7 ha Josue 11:23.) An paggiya ni Jehova ha mga Israelita tipagawas ha Ehipto. (Itanding an Eksodo 3:8 ha Eksodo 12:29-32.) An pagtipig ni Jehova han iya katawohan.—Itanding an Eksodo 16:4, 13-15 ha Deuteronomio 8:3, 4.
^ par. 9 Para hin dugang nga impormasyon mahitungod han mga saad han Dios ha aton tidaraon, kitaa an kapitulo 3, 7, ngan 8 ha libro nga Ano Gud ba an Igintututdo han Biblia?, iginpublikar han mga Saksi ni Jehova.