Ano an Panhunahuna han Dios ha De-alkohol nga Irimnon?

AN ATON Maglalarang, nga naruruyag han gimaopayi para ha aton, diri nagdidiri han kasadangan nga paggamit han de-alkohol nga irimnon. * Ngani, iya gintagan an tawo hin “alaksiw basi hiya malipay, lana han olibo basi hiya magrisyo, ngan tinapay ha paghatag ha iya hin kusog.” (Salmo 104:15, Today’s English Version) Ha usa nga okasyon, ginhimo ni Jesu-Kristo nga mas malipayon an usa nga kasal pinaagi ha paghimo han tubig nga “gimamaopayi nga bino.”—Juan 2:3-10, Samarenyo Popular Version.

Makatadunganon an paghunahuna nga maaram an Maglalarang han epekto han alkohol ha aton lawas ngan utok. Pinaagi han Biblia, Hiya ‘nagtututdo ha aton nga magpahimulos,’ ngan nagpapahamangno gud kontra ha sobra nga paggamit han de-alkohol nga irimnon. (Isaias 48:17) Tagda inin prangka nga mga pahamangno:

“Diri kamo maghubog hin alaksiw, diin titikang an kasamokan.” (Efeso 5:18) “Diri manta makakaangkon han Ginhadian han Dios an mga . . . parahubog.” (1 Korinto 6:9-11, Maopay nga Sumat) Ginkukondenar han Pulong han Dios an ‘parahubog, mangil-ad nga mga kalipayan, ngan iba nga mga bagay nga sugad hini.’—Galasia 5:19-21, Samarenyo Popular Version.

Paghisgotan naton yana an pipira nga peligro han sobra nga pag-ininom.

Mga Peligro han Sobra nga Pag-ininom

Bisan kon may kaopayan an de-alkohol nga irimnon, may-ada ito mga sangkap nga makakagbag-o han panhunahuna ngan han aton lawas. An sobra nga pag-ininom mahimo magresulta hini nga mga problema:

An sobra nga pag-ininom nakakadaot han husto nga pagturutimbang han usa, salit ‘diri [hiya] nakakahunahuna hin maopay.’ (Proberbios 23:33, TEV) Hi Allen nga ginhisgotan ha nauna nga artikulo nagsiring: “An pagin alkoholiko diri la sakit ha lawas; sakit liwat ito ha hunahuna ngan ha  disposisyon. Diri mo gintatagad an maraot nga epekto hito ha iba.”

An sobra nga pag-ininom mahimo makawara han kaawod. An Biblia nasiring: “[An] alaksiw ngan an bag-o nga alaksiw nakakuha han sarabotan.” (Hosea 4:11) Paonan-o? Tungod han diri-abat nga epekto han alkohol, an mga panggawi ngan hingyap nga ha normal nga kahimtang aton ginlilikyan baga hin nagigin makaruruyag o nakakadani pa ngani. An aton determinasyon ha pagbuhat hin husto mahimo magluya. Mahimo ito makawara han aton panalipod ha moral nga magriresulta ha kadaot han aton relasyon ha Dios.

Pananglitan, iginkalantugi ni John an iya asawa ngan nasisina nga kinadto ha beer house. Nakainom na hiya ha pagpakalma han iya kalugaringon han may babaye nga dinaop. Katapos hin pipira nga tagay, ginawas hiya kaupod han babaye ngan nakabuhat hin imoralidad. Katapos, nagbasol gud hiya han iya nabuhat nga diri gud unta niya mahihimo kon waray mawara an iya pag-abat hin kaawod tungod ha pag-ininom.

An sobra nga pag-ininom mahimo magresulta ha waray-kontrol nga pagyakan ngan paggios. “Hin-o an aada pirme ha kasamok? Hin-o an nakikiglantugi ngan nakikig-away?” napakiana an Biblia. “An ngatanan nga naaabtan hin hilarom nga kagab-ihon ha pag-inom bisan usa na la ka tagay.” (Proberbios 23:29, 30, Contemporary English Version) An sobra nga pag-ininom mahimo magresulta nga ‘umabat ka nga sugad hin aadto ka ha kalalawdan ngan dinadagat nga baga hin nagdidigwa kay karuyag mo magsuka.’ (Proberbios 23:34 [Darahonon 23:34, Maopay nga Sumat]) An tawo nga parainom mahimo magmata nga “puno hin lagom, ngan diri ngani nahihinumdom kon paonan-o ito nahitabo.”—Proberbios 23:35, CEV.

An sobra nga pag-ininom mahimo makadaot ha pisikal nga kahimsog. “Ha urhi [an alkohol] natukob sugad hin halas ngan naghahatag hin lara sugad hin kolebra.” (Proberbios 23:32, New International Version) Ginparig-on han syensya han medisina nga husto iton kadaan nga proberbios. An daku nga porsyento han alkohol ha irimnon mahimo magresulta hin makamaratay nga sakit. An pipira hini amo an magkalain-lain nga kanser, hepatitis, sirosis han atay, pancreatitis, paghamubo han asukar ha lawas han mga diabitiko, fetal alcohol syndrome, istrok, o sakit ha kasingkasing. Ngan bisan an makausa la nga sobra nga pag-ininom mahimo magresulta ha coma o ha kamatayon. Kondi, an pinakaseryoso nga resulta hito diri mababasa ha mga libro han medisina.

An pinakapeligroso nga resulta. Bisan kon an usa diri mahubog, an diri kasadangan nga pag-ininom mahimo makadaot ha espirituwal. An Biblia nasiring: “Kairo nira nga nabangon ha sayo pa ha  aga, nga hira makakadto ha maisog nga irimnon; nga nahamamalanga ha maiha ha gab-i, ngada nga an alaksiw nakakapamula ha ira!” Kay ano? Iginsaysay ni Isaias an kadaot ha espirituwal nga resulta han diri kasadangan nga pag-ininom: “Waray hira magtagad han buhat ni Jehova, waray man hira magpainoino han buhat han iya mga kamot.”—Isaias 5:11, 12.

Ginsasagdonan kita han Biblia nga diri ‘tumampo ha mga parahubog.’ (Proberbios 23:20) An edaran nga kababayin-an ginpapahamangnoan nga diri magin “uripon ha alaksiw.” (Tito 2:3) Kay ano? Tungod kay hinay-hinay ngan kasagaran nga diri naaabat han mga parainom nga nagtitikadamu na an ira nakukonsumo ngan nagtitikaagsob na ito. Ha urhi, an parahubog mahimo “magminata nga nagpapakiana, ‘San-o pa mag-aaga basi makainom pa ako?’” (Proberbios 23:35, CEV) Peligroso na an kahimtang han mga parainom kon ha ira pagmata, naghihingyap na hira ha pag-inom basi mawara an epekto han ira kahubog han naglabay nga gab-i.

An Biblia nagpapahamangno nga adton nagbubuhat hin “paghubog hin alaksiw, mga aringasa nga maglaw-ay . . . maghahatag hin kahusayan ngadto ha iya nga andam ha paghukom ha mga buhi ngan ha mga minatay.” (1 Pedro 4:3, 5) May kalabotan ha makuri nga panahon diin kita nagkikinabuhi, hi Jesus nagpahamangno: “Pagmatngon kamo ha iyo kalugaringon, bangin an iyo mga kasingkasing mabug-atan han kahakog, ngan kaparahubog, ngan mga pangarit hini nga kinabuhi; ngan ito nga adlaw [ni Jehova] ha kadagmitan maabot ha iyo sugad hin lit-ag.”—Lukas 21:34, 35.

Kondi, ano an mahimo buhaton han mga parainom basi diri ‘mabug-atan’ han sobra nga pag-ininom?

[Footnote]

[Mga Retrato ha pahina 4, 5]

An sobra nga pag-ininom mahimo magresulta hin damu nga problema