“Bisan Usa Na La ka Tagay”

HI Allen nagtikang mag-ininom hin de-alkohol o nakakahubog nga irimnon han 11 anyos hiya. * Kasagaran nga nagmumulay hiya ngan an iya kasangkayan didto ha kagurangan ngan ira ginsusubad an ira nakikita ha sine. An mga personalidad hito diri tinuod, kondi an ira gin-iinom tinuod ngan nakakahubog.

Hi Tony 40 anyos han hinay-hinay nga nagtikadamu an iya naiinom, tikang ha usa o duha ka tagay ngadto ha lima o unom, kada gab-i. Ha kamaihaan, diri na niya gin-iihap an iya nakukonsumo ha bug-os nga adlaw.

Hi Allen namiling hin makakabulig ha iya problema. Hi Tony nagbalewaray han bulig han iya mahigugmaon nga pamilya ngan kasangkayan. Hi Allen buhi pa yana ha pagsumat han iya istorya, kondi hi Tony patay na tungod hin aksidente ha kadalanan katapos mag-ininom hin sobra.

Bisan kon an usa nag-uusahan la ha pag-ininom hin sobra, an mga resulta han iya buhat makasurubo nga nakakaapekto ha iba. An sobra nga paggamit han de-alkohol nga irimnon agsob nga hinungdan han berbal ngan pisikal nga pag-abuso, pangastigo, pagpatay, aksidente ha kadalanan ngan ha trabaho, ngan hin damu nga sakit. Hinungdan liwat ito han binilyon ka dolyar nga gasto han sosiedad kada tuig, labot la han personal ngan emosyonal nga kadaot hito ha indibiduwal, ha pamilya, ngan ha mga anak.

Bisan pa hito, an U.S. National Institutes of Health nasiring nga “diri ngatanan nga pirme nainom may problema ha pag-ininom, ngan diri ngatanan nga may problema ha pag-ininom, nainom kada adlaw.” Damu nga nainom an diri naabat nga nagigin parahubog na hira. An iba panalagsa la nga nainom kondi nakakaubos hin sobra lima ka tagay ha usa ka okasyon.

Kon nainom ka hin nakakahubog nga irimnon, san-o mo masisiring nga sobra na an imo naiinom? San-o mo mahibabaroan nga diri na angay an pag-inom hin “bisan usa na la ka tagay”? (Proberbios 23:29, 30, Contemporary English Version) Hihisgotan han masunod nga mga artikulo an mapulsanon nga impormasyon mahitungod hini nga topiko.

[Footnote]