Pakiana han Magbarasa . . .

Kay Ano nga Naggamit hi Satanas hin Halas ha Pakiistorya kan Eva?

▪ Bangin umuyon ka nga sugad han ginhisgotan ha pahina 8, hi Satanas an nagpaluyo ha halas nga nakiistorya kan Eva. Ito gud an igintututdo han Biblia. Kondi, bangin magpakiana ka, ‘Kay ano nga an usa nga gamhanan nga espiritu magamit hin halas ha pakiistorya?’

Iginhuhulagway han Biblia an mga taktika ni Satanas sugad nga “mga limbong,” ngan ini nga panhitabo nagpapamatuod hito. (Efeso 6:11) Nasantop naton nga ito nga asoy mahitungod hin nagyayakan nga hayop diri kay susmatanon la; usa ito nga ehemplo han peligroso ngan tuso nga taktika ha pagpahirayo han mga tawo ha Dios. Ha ano nga paagi?

Ginpili hin maopay ni Satanas kon hin-o an iya bibiktimahon. Hi Eva an pinakabata ha intelihente nga mga linarang ha uniberso. Ginsalingabot ni Satanas an iya kakulang hin eksperyensya, salit nalimbongan ngan nasulay hiya. Pinaagi ha paggamit hin halas, nga maikmat hinduro nga hayop, tuso nga gintago ni Satanas an iya hitaas nga ambisyon. (Genesis 3:1) Tagda liwat kon ano an iya nahimo ha paggamit hin halas nga baga hin ito mismo an nagyayakan.

Siyahan, nakuha ni Satanas an bug-os nga atensyon ni Eva. Maaram hi Eva nga an halas diri nakakayakan tungod kay an iya bana an nagngaran han ngatanan nga hayop, upod na an halas, bangin katapos hin maiha nga pag-inobserbar. (Genesis 2:19) Sigurado nga naobserbaran liwat ni Eva ini nga linarang. Salit an taktika ni Satanas nakakuha han iya interes, tungod hito nagpokus hiya ha usa nga butang ha hardin nga igindidiri ha iya. Ikaduha, kon an halas nakada ha sanga han igindidiri nga puno, ano an mahimo hunahunaon ni Eva? Nahunahuna ba niya nga an halas, nga ubos ngan diri nakakayakan nga linarang, kinaon hin bunga han puno salit nakayakan na? Kon an bunga may maopay hinduro nga epekto ha halas, ano daw la an magigin epekto hito ha iya? Diri kita maaram kon ano an ginhunahuna ni Eva o kon kinaon ba an halas han bunga, kondi maaram kita nga han ginsidngan hi Eva han halas nga kon kumaon hiya han bunga “mahinunugad [hiya] ha Dios,” tinoo hiya hito nga buwa.

Epektibo an mga pulong nga gin-gamit ni Satanas. Naaghat niya hi Eva nga magruhaduha. Ginpagawas niya nga istrikto hinduro an Dios ngan may maopay nga butang nga diri iginhahatag kan Eva. An kalamposan han mga taktika ni Satanas nadepende ha kon ano an mas importante kan Eva—an iya pagpabili ha kalugaringon o an iya gugma ha Dios nga naghatag ha iya han tanan. (Genesis 3:4, 5) Makasurubo, naglampos an taktika ni Satanas. Waray makultibar nira Adan ngan Eva an hilarom nga gugma ngan apresasyon para kan Jehova. Diri ba ito liwat nga kahakog an igin-aaghat yana ni Satanas?

Kumusta man an motibo ni Satanas? Ano an iya karuyag? Ha Eden, igintago niya an iya motibo ngan kon hin-o hiya. Kondi ha urhi, nagpakilala hiya. Han iya ginsulay hi Jesus, maaram hiya nga diri niya maitatago kon hin-o hiya. Salit direkta nga ginsidngan niya hi Jesus: ‘Luhod ngan yukbo ngan pagsingba ha akon.’ (Mateo 4:9) Matin-aw, maiha na nga hingyap ni Satanas nga hiya an singbahon imbes nga hi Jehova nga Dios. Salit bubuhaton niya an tanan basi an tawo magsingba ha Dios ha sayop nga paagi o diri gud magsingba ha Dios. Determinado gud hiya nga bungkagon an aton integridad ha Dios.

Matin-aw, iginpapakita han Biblia nga hi Satanas eksperto gud ha paghimo hin paagi ha pagbungkag han iya bibiktimahon. Maopay na la nga diri kita niya malilimbongan pariho kan Eva, “kay mag-aram kita ha iya mga paagi.”—2 Korinto 2:11.