Pakiana han Magbarasa . . .

Usa ba nga Naglalaga nga Pasakitan nga Lugar an Gehenna?

▪ Ha mga asoy han Ebanghelyo, ginpahamangnoan ni Jesus an iya mga disipulo kontra ha pag-antos han paghukom ha Gehenna. Matin-aw nga karuyag niya tagdon hin seryoso ito nga pahamangno. Kondi, an naglalaga ba nga impyerno han waray kataposan nga pagsakit an iya iginpapasabot?—Mateo 5:22.

Siyahan, aton usisahon an pulong nga Gehenna. An Griego nga pulong nga Geʹen·na katugbang han Hebreo nga pulong nga geh Hin·nomʹ, karuyag sidngon, “walog ha Hinom,” o geh veneh-Hin·nomʹ nga nangangahulogan hin “walog han mga anak ni Hinom.” (Josue 15:8; 2 Hadi 23:10) Ini nga lugar nga kilala yana nga Wadi er-Rababi, usa nga hilarom ngan haligot nga walog ha sur ngan sur-weste han Jerusalem.

Ha panahon han mga hadi han Juda, tikang ha ikawalo ka siglo A.K.P., gin-gamit ini nga lugar para ha pagano nga mga rituwal, upod na ha seremonya diin ginsusunog an kabataan sugad nga halad. (2 Kronikas 28:1-3; 33:1-6) Igintagna ni propeta Jeremias nga ito nga walog an magigin lugar diin papamatayon han mga taga-Babilonya an mga taga-Juda sugad nga paghukom han Dios ha ira karaotan. *—Jeremias 7:30-33; 19:6, 7.

Sumala ha Judio nga eskolar nga hi David Kimhi (c. 1160-c. 1235 K.P.), an walog ha urhi ginhimo nga basurahan han syudad han Jerusalem. Nagin surunogan ito diin pirme may naglalaga nga kalayo basi maugbaw an basura ngan magin abo an tanan nga iginlalabog didto.

Damu nga parahubad han Biblia an nagparagbuot ha paghubad han Geʹen·na hin “impyerno.” (Mateo 5:22) Kay ano? Tungod kay an pagano nga ideya nga kon mamatay an maraot papasakitan ha naglalaga nga kalayo iginkaw-ing nira ha literal nga kalayo ha walog ha gawas han Jerusalem. Kondi, diri sugad hito an pagsabot ni Jesus ha pulong nga Gehenna.

Maaram hi Jesus nga nangangalas an iya Amay ha langit, hi Jehova, bisan la ha ideya han pagsunog hin buhi nga tawo. May kalabotan ha paggamit ha Gehenna ha panahon ni propeta Jeremias, an Dios nagsiring: “Hira nagtukod hin higtaas nga mga lugar ha Topet, nga aada ha walog han anak nga lalaki ni Himon, ha pagsunog han ira mga anak nga kalalakin-an ngan han ira mga anak nga kababayin-an dida ha kalayo; nga waray ko ha ira igsugo, waray man umabot ini ha akon panumdoman.” (Jeremias 7:31) Dugang pa, an ideya han pagpasakit ha patay supak ha pagkamahigugmaon han Dios ngan ha matin-aw nga katutdoan han Biblia nga an patay “diri maaram han bisan ano.”—Eklesiastes 9:5, 10.

Gin-gamit ni Jesus an pulong nga “Gehenna” sugad nga simbolo han bug-os nga kabungkagan han paghukom han Dios. Salit, an “Gehenna” pariho an kahulogan ha “linaw nga kalayo” nga gin-unabi ha libro han Pahayag. Iton duha nga pulong pariho nangangahulogan hin waray kataposan nga kabungkagan diin waray na pagkabanhaw.—Lukas 12:4, 5; Pahayag 20:14, 15.

[Footnote]