Tagna 2. Gutom
Tagna 2. Gutom
“Magkakaada . . . kakulang hin mga pagkaon.”—MARCOS 13:8.
● Usa nga lalaki an kinadto ha Quaratadji, Niger. Naglalaom hiya nga makakabiling hin pagkaon. An iya kapatoran ngan kabugtoan, nga tikang ha iba nga bahin han nasud, kinadto liwat tungod han gutom. Pero an lalaki nag-uusahan nga nahigda ha banig. Kay ano nga nag-uusahan hiya? “Waray na hiya maipapakaon [ha iya pamilya] ngan diri niya mailob an pagkinita ha ira nga nagugutom,” siring ni Sidi, an lider han baryo.
ANO AN IGINPAPAKITA HAN MGA REPORT? Ha bug-os nga kalibotan, haros 1 ha kada 7 nga tawo an waray igo nga pagkaon kada adlaw. Ha sur han Sahara ha Aprika, mas grabe pa an kadamu, kay 1 ha kada 3 nga tawo an pirme nagugutom. Basi masabtan ito, imadyina an usa nga pamilya nga ginkukompwesto han tatay, nanay, ngan han ira minasus-an. Kon an pagkaon igo la para ha duha ka tawo, hin-o an magugutom? An tatay? an nanay? an minasus-an? Ini an problema nga gin-aatubang han sugad nga mga pamilya kada adlaw.
ANO AN KOMON NGA PAGRIWA? An tuna naghahatag hin hura nga pagkaon para ha ngatanan. Kinahanglan la ito dumarahon hin maopay.
MAKATADUNGANON BA ITO NGA PAGRIWA? Tinuod, an mga parag-uma nakakag-ani ngan nakakagsuplay na hin mas damu nga pagkaon yana labaw kay ha kakan-o pa man. Salit kaya unta madumara han mga gobyerno an suplay han pagkaon ha tuna basi masolusyonan an problema ha gutom. Pero bisan kon damu ka dekada na hira nga nangangalimbasog, diri pa gihapon nira ito nahihimo.
ANO HA IMO PAGHUNAHUNA? Natutuman ba an Marcos 13:8? Bisan pa han pag-uswag han teknolohiya, naaapektohan ba han kakulang hin pagkaon an mga tawo ha bug-os nga kalibotan?
An mga linog ngan gutom agsob nga nagriresulta ha usa pa nga bahin han tigaman han kataposan nga mga adlaw.
[Blurb]
“Sobra 30 porsyento han kabataan nga namamatay tungod han pulmonya, uro-uro, ngan iba pa nga sakit an makakatalwas unta kon may-ada hira igo nga pagkaon.”—ANN M. VENEMAN, EXECUTIVE DIRECTOR HADTO HAN UN CHILDREN’S FUND.
[Ginkuhaan han retrato]
© Paul Lowe/Panos Pictures