Kinabuhi nga May Katuyoan—Yana Ngan ha Kadayonan

POSIBLE ka magkaada kinabuhi nga may tinuod nga katuyoan bisan yana. Paonan-o? Pinaagi ha pagsunod han mga prinsipyo ha Pulong han Dios, an Biblia. Usisahon naton an pipira hito.

PRINSIPYO HA BIBLIA: Hi Hadi Salomon nagsurat: “Waray maoroopay para hin usa ka tawo kay ha iya pagkaon ngan pag-inom, ngan papagpahimulos hin maopay han iya kalag dida han iya kabudlay.”—EKLESIASTES 2:24.

Ginlarang kita basi matagbaw ha maopay nga trabaho. Bisan ha pinakamakuri nga kahimtang yana, mahimo ka matagbaw tikang ha mauyatom ngan tangkod nga pagtrabaho.

PRINSIPYO HA BIBLIA: ‘Burobulahan an paghatag kay ha pagkarawat.’—BUHAT 20:35.

Naeksperyensyahan han damu nga an pagbuhat para ha iba—pananglitan, an paghatag hin panahon ngan kusog ha pagbulig kon may kakurian—makapatagbaw gud ngan nakakahatag hin katuyoan ha kinabuhi. Hi Salomon nagsiring: “Ayaw ighawid an kaopayan ha ira nga hintutungdan hini, kon an gahum ha pagbuhat hini aada ha imo kamot.”—Proberbios 3:27.

Tagda an eksperyensya ni Ralph. Han nagretiro hiya, sinulod hiya ha bug-os-panahon nga pagministeryo pariho han iya asawa. Kada bulan, an tagsa ha ira naggagahin hin damu  ka oras ha pagtutdo mahitungod han Biblia. “Ha amon pag-uli ha gab-i, kapoy kami, diri la ha amon pagtikalagas, kondi ha paggamit han amon bug-os nga kusog ha pag-alagad ha amon langitnon nga Amay,” siring ni Ralph. “Kondi tagbaw gud kami bisan kon kapoy!” Hiya ngan an iya asawa malipayon tungod kay an ira kinabuhi nakasentro ha paghatag.

PRINSIPYO HA BIBLIA: “An sangkay nahigugma ha ngatanan nga panahon; ngan an usa nga bugto natawo para ha kakurian.”—PROBERBIOS 17:17.

Mas masayon mailob an problema kon diri ka nag-uusahan. Hi Francis Bacon, usa nga awtor nga taga-Inglatera nagsurat nga para hadton waray tinuod nga sangkay, “an kalibotan baga hin kamingawan.” Kon kita may tinuod nga kasangkayan ngan kon kita maopay nga sangkay, magigin mas masayon an kinabuhi; magigin makalilipay ito ngan makapatagbaw.

PRINSIPYO HA BIBLIA: “Malipayon an mga naghihingyap han espirituwal nga mga butang.”—MATEO 5:3, NW.

Ginpapakita dinhi ni Jesus nga kon karuyag mo makapahimulos han katumanan han saad han Dios—kilalaha ngan tagbawa an imo ‘hingyap ha espirituwal nga mga butang.’ Diri pariho ha hayop, may panginahanglan kita nga masabtan an kahulogan ngan katuyoan han kinabuhi. Hi Jehova la an makakatagbaw hito nga panginahanglan, ngan ginbubuhat niya ito pinaagi han Biblia. Sugad han aton hinbaroan ha naglabay nga artikulo, iginsusumat han Biblia an katuyoan han Dios para ha tuna, kon kay ano nga aanhi kita, kon kay ano nga may duro nga pag-antos, ngan kon ano an ginlalaoman han Dios ha aton. An pagsabot hito importante ha pagkaada may katuyoan ngan makapatagbaw nga kinabuhi. Adton nag-aaram han Biblia ngan nag-aaplikar han ira hinbaroan malipayon. Kay ano? Tungod kay nakukultibar nira an duok nga relasyon ha Maglalarang, an “malipayon nga Dios,” hi Jehova.—1 Timoteo 1:11.

PRINSIPYO HA BIBLIA: ‘Hinumdumi an imo Magburuhat nga diri pa madangat an magraot nga mga adlaw ngan magtikahirani an mga tuig han imo pagsiring: Waray ko kalipay ha ira.’—EKLESIASTES 12:1.

Ini nga sagdon ni Hadi Salomon ha mga batan-on, nga bangin diri naghuhunahuna nga mahimo may umabot ha ira nga trahedya, aplikado ha ngatanan. Salit isentro an imo kinabuhi ha Maglalarang. Ito an makakahatag ha imo hin tinuod nga katuyoan. Isalikway ini nga panhunahuna: “Pangaon ngan panginom kita, kay buwas mapatay kita.” (1 Korinto  15:32) Kon uunahon mo an Dios, magriresulta ito hin “kaopayan” ha imo, siring han Eklesiastes 8:12.

Hinbaroan ni Wendi nga tinuod ito. Han bata pa hiya, nag-aram hiya ngan an iya manghod hin Espanyol basi makaboluntaryo ha Dominican Republic diin may panginahanglan hin magsarangyaw han maopay nga sumat. “Damu an amon iginsakripisyo basi makaboluntaryo ha lugar nga may panginahanglan, pero nag-enjoy gud kami. Diri ko ibabalyo iton unom ka bulan ha bisan ano! Mas damu an bendisyon nga amon nakarawat kay han amon iginsakripisyo.”

May Katuyoan an Kinabuhi han mga Maunungon

An pagkaada maopay nga relasyon kan Jehova makakahatag hin katuyoan ha kinabuhi ha espesyal nga paagi. Ha ano nga paagi? Diri la kay ginsulay ni Satanas hira Adan ngan Eva ha pagrebelde ha Dios, kondi sugad hin nasiring hiya nga waray makakapabilin nga maunungon ha Dios ha atubangan han pagsari. (Job 1:9-11; 2:4) Makakabulig ka nga mapamatud-an nga buwa ito! Paonan-o? Pinaagi ha pagpabilin nga maunungon kan Jehova, ha pagsunod han iya mga prinsipyo, ngan ha pagpakita nga ginkikilala mo an iya supremo nga katungod ha paghatag hin suruklan ha kon ano an maopay ngan maraot.—Pahayag 4:11.

Bangin kinahanglan naton mag-antos basi magkaada matadong nga kinabuhi. Mawawara ba an katuyoan han aton kinabuhi tungod hito nga mga pag-antos? Aw, handurawa nga ginpapakaraot hin kaaway an aton hinigugma nga sangkay o kapamilya. Kon an pagdepensa han reputasyon hin hinigugma magin hinungdan nga mag-antos kita ha kamot han kaaway, mawawara ba an katuyoan han aton kinabuhi? Diri gud! Malilipay kita nga mag-antos tungod hito. Pariho ito ha pagpabilin nga maunungon ha Dios. Ha pagkamatuod, an pagkamaunungon bisan pa han mga karaotan yana nakakapalipay ha iya.—Proberbios 27:11.

May Katuyoan nga Kinabuhi ha Kadayonan

Salit buhata an ngatanan mo nga mahihimo nga mahibaro mahitungod ha Dios ngan han iya katuyoan. Hi Jesu-Kristo mismo nagsiring: “Ini amo an kinabuhi nga waray kataposan, nga hira kumilala ha imo, nga amo la an matuod nga Dios, ngan hi Jesu-Kristo nga imo ginpakanhi.” (Juan 17:3) Kon tumanon na han Dios an iya orihinal nga katuyoan para ha tuna, magpapahimulos gud an matinumanon nga mga tawo hin “kinabuhi nga waray kataposan” ha paraiso nga tuna. Salit an kinabuhi magigin may katuyoan gud ngan makapatagbaw.—Salmo 145:16.

Diin mo mabibilngan an kahibaro nga ginhisgotan ni Jesus? Ha Biblia. Kon nanginginahanglan ka hin bulig ha pagkuha hini nga kahibaro, alayon pagsurat ha mga nagpublikar hini nga magasin. Malilipay hira ha pagbulig ha imo nga mahibaro kon ano gud an igintututdo han Biblia.