Pakiana han Magbarasa . . .

May-ada ba Rasa o Nasyonalidad nga Ginpapasulabi an Dios?

▪ Waray. An Biblia matin-aw nga nasiring: “An Dios waray [ginpapasulabi] han mga tawo; kondi tikang ha ngatanan nga mga nasud hiya nga nahadlok ha iya, ngan nagbubuhat hin matadong, naruruyagan niya.”—Buhat 10:34, 35.

An panhunahuna han Dios may kalabotan hini mas hitaas kay han kanan diri hingpit nga tawo. Damu an natoo nga an usa nga nasyonalidad (kasagaran nga an ira) mas labaw ha iba. An sugad nga ideya pariho han kan Charles Darwin: ‘Ha tidaraon, pupoohon, ngan sasaliwanan, han sibilisado nga rasa an mga diri sibilisado.’ Makasurubo, damu an nabiktima hadton mga naghunahuna nga mas labaw hira kay ha iba.

May basihan ba an paghunahuna nga mas labaw an usa nga rasa kay ha iba? Pananglitan, napamatud-an ba han syensya nga may mga rasa nga mas maopay an genes kontra ha iba? Waray, hi Bryan Sykes nga geneticist ngan propesor ha Oxford nagsiring: ‘Waray basihan nga makaklasipikar ha mga gene an rasa han tawo. Pirme ako ginpapakianhan kon magkaiba ba an DNA han Griego o an gene han Italyano, kondi, syempre, diri. Haros waray ito kaibahan.’

An sugad nga mga nadiskobrehan uyon ha ginsisiring han Biblia. Nagtututdo ito nga an Dios naglarang hin usa nga lalaki ngan usa nga babaye nga gintikangan han ngatanan nga katawohan. (Genesis 3:20; Buhat 17:26) Salit para ha Dios, uusa gud la an rasa han tawo.

Diri importante kan Jehova an kolor han panit o hitsura han tawo. Lugod, iba an iya ginpapabilhan—an aton simboliko nga kasingkasing o tinuod nga pagkatawo. Hiya nasiring: “An tawo nagtatan-aw han kinikita ha gawas, kondi hi Jehova nagtatan-aw han kasingkasing.” (1 Samuel 16:7) Makapadasig gud ito ha aton. Kay ano?

Anoman an nasyonalidad, damu an diri tagbaw ha ira hitsura, kondi haros waray mahihimo ha pagbag-o hito. Pero, mahimo naton mapauswag kon ano an pinakaimportante—an aton simboliko nga kasingkasing. (Kolosas 3:9-11) Ha pagkatinuod, may tendensya kita umabat nga mas labaw, o mas minos kita, ha iba nga tawo han iba nga nasyonalidad. Kondi tungod kay hain man hito nga opinyon diri uyon ha panhunahuna han Dios, sadang kita mangalimbasog nga wad-on ito.—Salmo 139:23, 24.

Kon mangangalimbasog kita nga kitaon an aton kalugaringon ngan an iba ha paagi ni Jehova, makakalaom kita han iya bulig. An iya Pulong nagpapahinumdom ha aton: “An mga mata ni Jehova nadalagan ngadto nganhi sahid an bug-os nga kalibotan, ha pagpakita ha iya ngahaw nga makusog ha ngaran nira kan kanay kasingkasing hingpit tipakadto ha iya.” (2 Kronikas 16:9) Makakalaom kita hito anoman an aton rasa o nasyonalidad.