Ini nga artikulo naghihisgot hin mga pakiana nga bangin iginpakiana mo na, ngan iginpapakita hini kon diin ha Biblia mabibilngan an mga baton hito. Nalilipay an mga Saksi ni Jehova nga hisgotan ini nga mga baton ha imo.

1. Espisipiko ba an mga tagna han Biblia?

An Dios la nga Makagarahum-ha-ngatanan an mahimo mahibaro hin detalyado han tidaraon. (Amos 3:7) Pananglitan, abanse pa nga iginsumat niya an pag-abot han Mesias, o Kristo. An Mesias magtitikang ha tulin ni Abraham. Hiya magigin magmarando nga magpapahinabo nga an masinugtanon nga katawohan makapahimulos utro han bendisyon han hingpit nga kinabuhi nga waray sakit. (Genesis 22:18; Isaias 53:4, 5) Ini nga Usa nga Iginsaad magtitikang ha Betlehem.—Basaha an Mika 5:2.

Hi Jesus napamatud-an nga amo an Mesias. Sobra 700 ka tuig antes pa, nagtagna an Biblia nga an Mesias ipapanganak hin usa nga birhen ngan pakakaminuson. Iya ihahatag an iya kinabuhi para ha sala han damu ngan iglulubong kaupod han mga riko. (Isaias 7:14; 53:3, 9, 12) Gintagna gihap han Biblia sobra 500 ka tuig antes pa nga masulod hiya ha Jerusalem sakay hin asno ngan tatrayduron kabalyo hin 30 ka bug-os nga salapi. Ito ngatanan natuman.—Basaha an Sakarias 9:9; 11:12.

2. Nagtatagna ba an Dios hin mga petsa?

Sobra 500 ka tuig antes pa, igintagna han Biblia an eksakto nga tuig han pag-abot han Mesias. An panahon tubtob ha iya pag-abot gin-ihap pinaagi ha mga semana han mga tuig, nangangahulogan nga an kada “semana” pito ka tuig an kaihaon. May-ada 7 ngan 62 hito nga semana, nga nagtutotal hin 69 ka semana han mga tuig nga katugbang ha 483 ka tuig. Kakan-o nagtikang ito nga peryodo? Sumala ha Biblia, nagtikang ito han inabot an surugoon han Dios nga hi Nehemia ha Jerusalem, ngan gintikangan an pagtukod utro han syudad. Iginpapakita han kasaysayan han Persia nga nahitabo ito han 455 A.K.P. (Nehemia 2:1-5) Nabawtismohan hi Jesus sugad nga Mesias paglabay han 483 ka tuig, han 29 K.P., sugad han igintagna.—Basaha an Daniel 9:25.

  3. Natutuman ba yana an mga tagna han Biblia?

Nagtagna hi Jesus hin makatirigamnan nga mga panhitabo ha aton panahon. Upod hito an mahitungod han maopay nga sumat han Ginhadian han Dios nga maghahatag hin kaluwasan ha mga nahigugma ha Dios. Tatapuson han Ginhadian an maraot nga sistema diin kita nagkikinabuhi.—Basaha an Mateo 24:14, 21, 22.

Detalyado nga iginhulagway han mga tagna ha Biblia an peryodo han pag-ikatarapos hinin presente nga sistema. Ito nasiring nga kabaliktaran han mahimo laoman hinin panahon han pag-uswag, dadauton han mga tawo an tuna. An mga pag-antos nga resulta han girra, gutom, linog, ngan sakit magdadamu. (Lukas 21:11; Pahayag 11:18) An mga tawo diri na magkikinabuhi uyon ha mag-opay nga prinsipyo. Hinin makuri nga panahon, igsasangyaw han mga sumurunod ni Jesus an maopay nga sumat han Ginhadian ha ngatanan nga nasud.—Basaha an Mateo 24:3, 7, 8; 2 Timoteo 3:1-5.

4. Ano an kabubuwason han katawohan?

An Dios nga Makagarahum-ha-ngatanan nag-andam hin mag-opay nga butang para ha matinumanon nga katawohan. Tikang ha langit hi Jesu-Kristo, an Mesias, upod han iya mga pinili, magmamando ha tuna. Hira an nagkukompwesto han Ginhadian nga magmamando ha sulod hin usa ka yukot ka tuig. An mga patay babanhawon ngan magkakaada higayon nga hukman nga takos han kinabuhi nga dayon. Dugang pa, wawad-on han Ginhadian an sakit ngan kamatayon.—Basaha an Pahayag 5:10; 20:6, 12; 21:4, 5.

Para ha dugang nga impormasyon, kitaa an pahina 23-25 ngan 197-201 hini nga libro, Ano Gud ba an Igintututdo han Biblia?.