Mga Giutan nga Waray Makaulang

An mga Saksi ni Jehova nangangalimbasog pagkuha han ulang butnga ha mga tawo. Ira ginsusunod an prinsipyo han ginsiring ni Jesus ha iya mga disipulo: “Kamo ngatanan magburugto.” (Mateo 23:8) Nakita ini ha duha nga katirokan nga lugar para ha pagsingba han mga Saksi—usa ha Portugal ngan usa ha Espanya.

AN NAKAPADER nga syudad han Valença do Minho ha norte han Portugal, gintukod durante han masamok nga panahon. Tikang ha mga kuta hini makikita an Minho River, an giutan han Espanya ngan Portugal. Ha tabok han salog nahimumutang an syudad han Tui han Espanya nga may katedral nga baga hin balwarte pagkit-on. An daku nga kuta han Tui ngan han Valença gintukod han ika-17 ka siglo, han naggigirra an Espanya ngan Portugal.

Han 1995, ginkuha an mga checkpoint ngan kustom ha giutan hinin duha nga nasud han European Union. Pero diri la ito an ginkikinahanglan ha paghiusa han mga tawo. Nag-uupod ito han hunahuna ngan kasingkasing. Ha Valença may gutiay ngan maopay nga building nga nagpapakita nga posible magkaurosa an mga tawo bisan pa han mga ulang. Katirokan ito ha pagsingba—usa nga Kingdom Hall han mga Saksi ni Jehova—nga ginagamit hin Espanyol ngan Portuguese nga kongregasyon.

Nagtikang ini han 2001, han an mga Saksi ha Tui nanginahanglan hin bag-o nga Kingdom Hall. Kinahanglan hira bumaya ha ira ginpletehan nga pasilidad, kondi waray hira igo nga pundo ha pagtukod hin bag-o. Diri liwat nira maakos an pagplete hin iba kay gutiay an ira kongregasyon. Salit naghangyo hira ha ira Portuguese nga kabugtoan ha Valença kon puydi hira makagamit han katirokan hito nga pipira la ka kilometro tikang ha sentro han Tui.

“Nagmiting kami han Disyembre 2001 basi hisgotan an desisyon,” siring ni Eduardo Vila, membro han kongregasyon han Tui. “Ha akon pagbaya ha miting, nahunahuna ko nga ginbantad ni Jehova an kasingkasing han amon kabugtoan nga Portuguese. Daku an ira sakripisyo  ha pagtukod hin maopay nga Kingdom Hall, ngan makapabantad gud nga andam hira pagpaangbit han ira gintatag-iya.”

“Gin-abiabi namon an Espanyol nga kabugtoan ha amon Kingdom Hall,” siring ni Américo Almeida, usa nga Portuguese nga Saksi nga tinambong liwat hito nga miting. “Sinarig kami nga bibendisyonan ni Jehova an kahikayan, ngan nagkaurosa kami ha amon desisyon.” An mga Saksi ha magkaluyo nga bahin han giutan nagkasinabot. “Baga hin diri katoohan, kondi waray ngani namon mahunahuna nga magkaiba nga nasud an amon gintikangan. Basta para ha amon, magburugto kami,” siring ni Paolo nga taga-Valença.

An usa han siyahan nga makikita han mga bisita ha Kingdom Hall amo an magkapariho nga relo, kondi magkaiba an oras. An oras ha Espanya una hin usa ka oras ha Portugal, pero ito la an ira diri ginkakaparihoan. Han kinahanglan aydon an pasilidad, an Regional Building Committee nga nakabase ha Espanya an nanguna ha maduruto nga mga boluntaryo tikang ha duha nga kongregasyon. “Damu nga eksperto tikang ha Espanya an kinanhi ha pagbulig ha amon, ngan an iba ha ira nagbiyahe pa hin sobra 160 kilometro,” siring ni Paolo. “An proyekto nagparig-on han gugma han duha nga kongregasyon.”

Tagdon naton an usa pa nga ehemplo ha pagkuha han mga ulang.

 Pagkaurosa Dida ha Nabahin nga Walog

An Puigcerdá syudad ha Espanya nga hirani ha giutan han Fransia. Nahimumutang ito ha sentro han matambok an tuna nga walog nga napapalibotan han higtaas nga kabukiran han Pyrenees. An bug-os nga walog nga kilala nga Cerdaña bahin hadto han Espanya. Kondi han 1659, ha usa nga kauyonan para ha kamurayawan, an Treaty of the Pyrenees, ginhatag han Espanya an katunga han walog ha Fransia.

Yana, an mga taga-Fransia namamalit ha Puigcerdá, an kapital nga syudad han walog. Ngan tikang han 1997, ginpagamit liwat han mga Saksi ha Puigcerdá an ira Kingdom Hall ha mga Saksi nga taga-Fransia. Hito nga tuig, kinahanglan bumaya an mga Saksi nga taga-Fransia ha ira ginpletehan nga katirokan. An pinakahirani nga Kingdom Hall ha Fransia usa ka oras nga biyahe an kahirayo, ngan durante han katugnaw an dalan ha kabukiran nga aagian puno hin niebe.

Han igsumat han mga Saksi nga taga-Fransia an panginahanglan, igintanyag dayon han mga taga-Espanya an ira Kingdom Hall. “Karuyag han ngatanan nga Espanyol nga kabugtoan nga ipagamit an katirokan,” siring ni Prem, usa nga lokal nga Saksi. “Syempre tungod ito han pagbansay nga amon nakarawat tikang ha Kasuratan. Katapos hin duha ka semana nagtikang kami pagpagamit han Kingdom Hall, ngan yana 13 ka tuig na kami nga magkaupod.”

“Para ha amon, an Puigcerdá an pinakapraktikal nga lugar nga amon pagkakatirokan,” siring ni Eric, usa nga paramangno ha Franses nga kongregasyon. “Ngan nahihinumdoman ko pa an kinasingkasing nga pag-abiabi ha amon han Espanyol nga kongregasyon. Gindekorasyonan nira an katirokan hin daku nga bugkos hin bukad ngan karatola, ‘Gin-aabiabi namon kamo hinigugma nga kabugtoan.’”

“Kahuna han mga tawo nga ha pagsara han amon Kingdom Hall ha Fransia, mawawara na an kongregasyon,” nagdugang hi Eric. “Pero an amon regular nga pagsangyaw ha lugar—upod na an pagpanaltag hin imbitasyon para ha amon katirok ha Espanya—nagpakita nga sayop hira. An mga interesado nalilipay pagtambong ha katirokan ha Espanya. Ngan tungod kay usa la nga katirokan an amon ginagamit, nagin duok kami ha Espanyol nga kabugtoan. Hadto, maaram kami nga may Espanyol nga kongregasyon ha luyo han giutan, pero haros waray kami kontak ha ira. Yana nga regular na an amon pagkirigta, diri na kami naabat nga nabubulag kami dinhi hini nga kabukiran.”

Nagbangon ba hin problema an pagkaiba hin kultura? “Han hinbaroan ko nga an amon  mga katirok pagdudumarahon na ha Espanya, medyo nabaraka ako,” siring han Saksi nga taga-Fransia nga mga 80 anyos na. “Kondi tungod han pagkamaabiabihon ngan pagkamakisangkayon han kabugtoan ha Puigcerdá, waray kami nagin problema. Lugod, ginpamatud-an hito an internasyonal nga pagkaurosa han katawohan ni Jehova.”

Pundasyon Para hin Mas Duok nga Relasyon

An mga nag-establisar han European Union nagsiring nga an mga nasud nga membro hito “determinado paghimo hin pundasyon para ha mas duok nga relasyon han mga taga-Europa.” An pagkuha han mga checkpoint ha mga giutan han dekada ‘80 ngan ‘90 ginhimo basi mapadagmit ini. Kondi basi magkaurosa, sadang liwat bag-uhon an panhunahuna.

An mga Saksi ni Jehova nangangalimbasog gud ha pagwara han diskriminasyon ngan kawaray-pagtapod. Maaram hira nga may kaopayan an pagkaiba-iba han ira gintikangan ngan “an Dios waray ginpasulabi.” (Buhat 10:34) Ha internasyonal nga mga kombensyon ngan ha Kingdom Hall, nakita nira an ‘pagkamaopay ngan pagkamakairindig han magburugto nga nagkakatarampo ha pagkaurosa!’ (Salmo 133:1) An pagin duok han mga Saksi ha Valença ngan Puigcerdá ha kabugtoan ha ira kahirani nga mga nasud nagpapamatuod hito.

[Blurb ha pahina 13]

“Baga hin diri katoohan, kondi waray ngani namon mahunahuna nga magkaiba nga nasud an amon gintikangan. Basta para ha amon, magburugto kami”

[Blurb ha pahina 14]

“An proyekto nagparig-on han gugma han duha nga kongregasyon”

[Blurb ha pahina 15]

‘Pagkamaopay ngan pagkamakairindig han magburugto nga nagkakatarampo ha pagkaurosa!’ SALMO 133:1

[Retrato ha pahina 12, 13]

An Tui ngan Minho River sugad han makikita tikang ha nakapader nga syudad han Valença do Minho

[Retrato ha pahina 14]

Pag-ayad han Kingdom Hall

[Retrato ha pahina 15]

An Pyrenees ngan an walog han Cerdaña

[Retrato ha pahina 15]

Duha nga tigurang tikang han duha nga kongregasyon—Franses ngan Espanyol—nga nagamit han Kingdom Hall ha Puigcerdá