Pakiistorya ha Iba—Hi Jesus ba an Dios?

NALILIPAY an mga Saksi ni Jehova nga isumat an mensahe han Biblia ha ira igkasi-tawo. May-ada ka ba pakiana mahitungod hin partikular nga topiko ha Biblia? Interesado ka ba hibaroan an gintotoohan ngan mga buruhaton han mga Saksi ni Jehova? Kon amo, ayaw pag-alang pagpakiana ha ira. Malilipay hira pagbaton hito.

Ini an usa nga ehemplo kon paonan-o nakikiistorya an mga Saksi ni Jehova ha iba. Handurawon naton nga hi Karen an Saksi nga nagsasangyaw kan Samantha ha iya balay.

Tinuod ba nga Diri Kamo Natoo kan Jesus?

Samantha: Nasiring an amon pastor nga an mga Saksi ni Jehova diri natoo kan Jesus. Tinuod ba ito?

Karen: Natoo kami kan Jesus. Ngani, natoo kami nga importante ha aton kaluwasan an pagtoo ha iya.

Samantha: Ito gihap an akon gintotoohan.

Karen: Aw, pariho ngay-an kita. Ako ngay-an hi Karen, ikaw?

Samantha: Ako hi Samantha.

Karen: Nalilipay ako nga makilala ka Samantha. Bangin mahipausa ka kon kay ano nga damu an nasiring nga diri kuno kami natoo kan Jesus.

Samantha: Balitaw, kay ano?

Karen: Ha pagkatinuod, daku an amon pagtoo ha iya, pero diri ngatanan han ginsisiring han mga tawo mahitungod ha iya gintotoohan namon.

Samantha: Sugad han ano?

Karen: Sugad han ginsisiring nira nga hi Jesus usa la kuno nga maopay nga tawo. Diri kami nauyon hito.

Samantha: Diri man gihap ako nauyon hito.

Karen: Pariho ngay-an kita. Dugang pa, diri kami nauyon ha katutdoan nga supak ha ginsiring mismo ni Jesus mahitungod han iya relasyon ha iya Amay.

Samantha: Ano an imo karuyag sidngon?

Karen: Igintututdo han damu nga relihiyon nga hi Jesus an Dios. Ito ba gihap an igintututdo ha iyo?

Samantha: Oo. Nasiring an amon pastor nga hi Jesus amo an Dios.

Karen: Kondi mauyon ka ba nga an pinakamaopay nga paagi basi hibaroan an kamatuoran mahitungod kan Jesus amo an pag-usisa kon ano an iya ginsiring mahitungod han iya kalugaringon?

Samantha: Oo. Nauyon ako hito Karen.

Ano an Ginsiring ni Jesus?

Karen: Basahon naton an usa nga teksto ha Biblia nga mabulig ha aton nga hibaroan an kamatuoran mahitungod hini. Ini an ginsiring ni Jesus ha Juan 6:38: “Ako nakanhi tikang ha langit, diri pagbuhat han akon kalugaringon nga kaburut-on, kondi an kaburut-on han nagpakanhi ha akon.” Kon hi Jesus gud man an Dios, diri ba baga hin nakakagupong ini nga teksto?

Samantha: Ano an imo karuyag sidngon?

Karen: Aw, diri ba siring ni Jesus nga waray  hiya lumusad tikang ha langit basi buhaton an iya kalugaringon nga kaburut-on?

Samantha: Oo, nasiring hiya nga kinanhi hiya basi buhaton an kaburut-on han nagpakanhi ha iya.

Karen: Husto. Salit kon hi Jesus an Dios, hin-o an nagsugo ha iya tikang ha langit? Ngan kay ano nga an kaburut-on hito an iya ginsusunod?

Samantha: Ah, nasasabtan ko na an imo karuyag sidngon. Pero baga hin diri man ini nga teksto nagpapamatuod nga diri Dios hi Jesus.

Karen: Tagdon naton an ginsiring ni Jesus ha lain nga okasyon. May-ada hiya ginyakan nga puropariho hito ha sunod nga kapitulo han Juan. Puydi mo ba basahon an Juan 7:16?

Samantha: Sige. “Busa, hi Jesus binaton ha ira, ngan siniring: An akon pagtutdo, diri akon, kondi kanan han nagpakanhi ha akon.”

Karen: Salamat Samantha. Uyon han imo ginbasa, personal ba nga ideya ni Jesus an iya igintutdo?

Samantha: Diri, siring niya nga tikang ito ha Usa nga nagsugo ha iya.

Karen: Husto. Salit, nabangon an mga pakiana sugad han, ‘Hin-o an nagsugo kan Jesus? Ngan hin-o an naghatag han kamatuoran nga iya igintutdo?’ Diri ba ito nga Usa mas labaw ha iya? Syempre an nagsugo mas labaw han ginsugo.

Samantha: Oo gud man ano! Yana ko pa la ito nabasa.

Karen: Tagda liwat an ginsiring ni Jesus ha Juan 14:28: “Kamo nakabati, nga siniring ako ha iyo, ako mabulag, ngan ako mabalik ha iyo. Kon kamo nahigugma ha akon, maglilipay kamo, kay ako makadto ha Amay: kay an Amay durodaku ha akon.” Uyon hini nga teksto, paonan-o gintagad ni Jesus an iya kalugaringon kon itanding ha Amay?

Samantha: Aw, hiya nasiring nga an Amay mas ‘daku’ ha iya. Kon sugad, gintatagad niya an Dios nga mas labaw ha iya.

Karen: Husto ka Samantha. Tagdon liwat naton yana an usa pa nga ginsiring ni Jesus ha iya mga disipulo nga nakarekord ha Mateo 28:18: “Ngatanan nga kagamhanan iginhatag ha akon ha langit ngan ha tuna.” Iginpapasabot ba ni Jesus dinhi nga nagtatag-iya na hiya han ngatanan nga “kagamhanan” o awtoridad tikang pa ha tinikangan?

Samantha: Diri, iginhatag daw ito ha iya.

Karen: Pero kon hi Jesus an Dios, kay ano nga tatagan pa man hiya hin dugang nga awtoridad? Ngan hin-o an naghatag hito ha iya?

Samantha: Hmmm. . . Akon pa ito huhunahunaon.

Hin-o an Iya Ginkakaistorya?

Karen: Kon Dios gud man hi Jesus, may usa pa nga teksto nga baga hin nakakagupong liwat.

Samantha: Ano ito?

Karen: An nakasurat ha Lukas 3:21, 22 mahitungod han bawtismo ni Jesus. Puydi mo ba basahon ito?

Samantha: “Busa nahinabo, ha kabaptisi na an ngatanan nga mga tawo, nga sugad man hi Jesus ginbaptisan; ngan han nag-aampo hiya, an langit nabuksan. Ngan an espiritu santo linusad ngada ha iya ha lawasnon nga dagway, sugad han usa nga sarapati, ngan an usa nga tingog ginowa ha langit: Ikaw amo an akon Anak nga hinigugma, ha imo ako nalilipay.”

Karen: Sumala han imo ginbasa, ano an binubuhat ni Jesus samtang hiya ginbabawtismohan?

Samantha: Nag-aampo.

Karen: Husto. Yana, bangin magpakiana kita, ‘Kon hi Jesus an Dios, kan kanay hiya nag-aampo?’

Samantha: Oo gud man ano! Ipapakiana ko ito ha amon pastor.

Karen: Dugang pa, han paghaw-as ni Jesus ha tubig, may nagyakan tikang ha langit. Nahinumdoman mo ba kon ano an siring hito?

Samantha: Ito nagsiring nga hi Jesus an Iya Anak nga Iya hinigugma ngan nalilipayan.

Karen: Husto ka. Salit kon hi Jesus gud an Dios, hin-o an nagyakan hito tikang ha langit?

Samantha: Sabagay. Waray ko ito mahunahuna hadto.

 Kay Ano nga “Amay” Ngan “Anak”?

Karen: Iini an usa pa nga punto nga mahimo naton tagdon: Nabasa naton nga gintawag ni Jesus an Dios sugad nga iya langitnon nga Amay. Ngan han nabawtismohan hi Jesus, usa nga tingog tikang ha langit an nagtawag kan Jesus sugad nga Iya Anak. Ha pagkamatuod, gintawag mismo ni Jesus an iya kalugaringon nga Anak han Dios. Yana, kon karuyag mo ipatin-aw nga an duha nga tawo magkatupong, ano nga relasyon ha sulod han pamilya an imo gagamiton basi iilustrar ito?

Samantha: An relasyon han magbugto.

Karen: Husto. Bangin han kanan magkaruha pa ngani. Pero gintawag ni Jesus an Dios sugad nga Amay, ngan an iya kalugaringon sugad nga Anak. Ano daw la an iya karuyag ipasabot hito?

Samantha: Nga may usa nga mas tigurang ha panahon ngan mas daku an awtoridad kay ha iya.

Karen: Oo. Tagda ini: Basi ipakita nga magkatupong an duha nga indibiduwal ha pamilya, nahunahuna mo an haom nga ilustrasyon mahitungod han magbugto o magkaruha. Kon hi Jesus gud man an Dios, diri daw ba niya mahuhunahuna sugad nga Bantogan nga Magturutdo iton pariho nga ilustrasyon o bangin makahunahuna pa ngani hiya hin mas matin-aw nga pagtanding?

Samantha: Sigurado gud.

Karen: Pero, gin-gamit lugod niya an mga termino nga “Amay” ngan “Anak” ha paghulagway han iya relasyon ha Dios.

Samantha: Oo gud man ano!

Ano an Igintututdo han mga Sumurunod ni Jesus ha Siyahan nga Siglo?

Karen: Antes ako lumakat, karuyag ko unta hisgotan an usa pa nga punto. Okey la ba ha imo?

Samantha: Okey man la.

Karen: Kon hi Jesus gud man an Dios, diri ba naton lalaoman nga itututdo ito han iya mga disipulo?

Samantha: Aw, sigurado ito.

Karen: Pero, waray naton mababasa ha Biblia nga igintutdo nira ito. Lugod, tagda an iginsurat ni apostol Pablo nga usa han mga sumurunod ni Jesus ha siyahan nga siglo. Ha Filipos 2:9, iya iginhulagway an ginbuhat han Dios katapos banhawon hi Jesus: “Ginbayaw hiya [Jesus] han Dios ha hitaas gud, ngan tinagan hiya hin ngaran nga labaw ha ngatanan nga mga ngaran.” Sumala han aton ginbasa, ano an ginbuhat han Dios kan Jesus?

Samantha: Ito nasiring nga ginbayaw hiya han Dios ha hitaas gud nga posisyon.

Karen: Oo. Pero kon katupong hi Jesus han Dios antes hiya namatay, katapos ha urhi ginbayaw pa hiya han Dios ha hitaas nga posisyon, diri ba magigin mas labaw na hiya ha Dios? May-ada gud ba malabaw ha Dios?

Samantha: Waray. Imposible ito.

Karen: Salit sumala han mga ebidensya nga aton nahisgotan, igintututdo ba han Biblia nga hi Jesus an Dios?

Samantha: Baga hin diri gud man ito nagtututdo hin sugad. Lugod, nagtututdo ito nga hiya Anak han Dios.

Karen: Husto ka Samantha. Pero bisan kon natoo kami nga hi Jesus diri an Dios, sugad nga mga Saksi ni Jehova, daku gud an amon pagtahod ha iya. Natoo kami nga tungod han iya kamatayon sugad nga an iginsaad nga Mesias nagin posible an kaluwasan para ha ngatanan nga matinumanon nga katawohan.

Samantha: Natoo liwat ako hito.

Karen: Pero bangin ka magpakiana, ‘Paonan-o naton mapapabilhan an kinabuhi ni Jesus nga iya iginhatag para ha aton?’ *

Samantha: Balitaw. Naipakiana ko na gad ito.

Karen: Karuyag ko unta bumalik basi maistoryahan naton an baton han Biblia hito nga pakiana. Aanhi ka la ba ha sunod nga semana ha pariho nga adlaw ngan oras?

Samantha: Oo, aanhi la ako.

Karen: Maopay. Mabalik ako.

[Footnote]