▪ Nakakita ka na ba hin belen o hin pasalida diin may tulo nga hadi o mag-aramon nga kalalakin-an nga nabisita han katatawo pa la nga hi Jesus nga nahigda ha balalong? Sumala ha istorya, ginamit an Dios hin bitoon basi giyahan hira ngadto ha usa nga kwadra ha Betlehem. Memoryado pa ngani han damu nga kabataan an ngaran hiton tulo nga hadi—Melchor, Gaspar, ngan Baltasar. Kondi uyon ba ito ha ginsisiring han Biblia? Diri. Damu nga bahin hito an diri husto.

Siyahan, hin-o adto nga kalalakin-an? Ha orihinal nga Griego nga yinaknan, waray hira unabiha han Biblia sugad nga mga hadi o mag-aramon nga kalalakin-an. Hira mga mago o astrologo nga nagbubuhat han pagano nga paagi ha pagtagna uyon ha posisyon han mga bitoon. Waray mababasa ha Biblia mahitungod han ira ngaran o kon pira hira.

Ikaduha, kakan-o bumisita adto nga kalalakin-an? Sigurado nga diri han minasus-an pa hi Jesus nga nakada ha balalong. Kay ano nga makakasiguro kita hini? An parasurat han Ebanghelyo nga hi Mateo nasiring: “Pagsulod ha balay, ira hinkit-an an bata upod hi Maria, nga iroy niya.” (Mateo 2:11) Tigamni nga hito nga panahon hi Jesus diri katatawo pa la nga minasus-an, kondi usa na nga “bata.” Diri na hira Maria ngan Jose naukoy ha kwadra; lugod ha usa na nga balay.

Ikatulo, hin-o an nagsugo han “bitoon” ha paggiya ha mga astrologo? Kadam-an han lider han relihiyon yana nagtututdo nga an Dios an nagsugo hito. Hiya gud ba? Hinumdumi, diri ha Betlehem siyahan nga gin-giyahan han “bitoon” an mga astrologo, kondi kan Hadi Herodes ha Jerusalem. Ira ginsumatan iton aw-anon ngan gamhanan nga parapamatay mahitungod han katawo ni Jesus nga magigin “hadi han mga Judio,” salit mas napungot ito ha bata. (Mateo 2:2) Ginsidngan hira ni Herodes nga bumalik basi isumat an eksakto nga hinmumutangan han bata kay karuyag kuno niya pasidunggan liwat ito. Katapos, gin-giyahan han bitoon an mga astrologo ngadto kanda Jose ngan Maria. Tungod han ira ginbuhat mahimo unta mamatay an bata kon waray manginlabot an Dios. Ha sobra nga kasina ni Herodes han waray na bumalik an mga astrologo, hiya nagsugo nga patayon an mga bata nga lalaki ha Betlehem ngan ha palibot hito nga dos anyos an pangidaron o mas bata pa.—Mateo 2:16.

Ha urhi, gintawag ni Jehova hi Jesus sugad nga “akon hinigugma nga Anak, nga akon nalilipayan.” (Mateo 3:17) Tagda ini: Pipilion ba han mahigugmaon ngan matadong nga Amay an pagano nga mga astrologo nga nagbubuhat hin okultismo nga igindidiri han iya Balaud basi magin iya mensahero? (Deuteronomio 18:10) Magsusugo ba hiya hin bitoon basi giyahan hira ngadto ha pinakapeligroso ngan gamhanan nga parapamatay nga hadi, dara an mensahe nga sigurado nga mag-aaghat hin kasina hito? Gagamiton ba han Dios ito nga bitoon ngan mga astrologo basi ibuhayhag kon hain an iya diri makakadepensa nga anak?

Ha pag-ilustrar: Usa nga maopay nga kumander an nagsugo han iya pinakamaopay nga sundalo ha usa ka peligroso nga misyon ha teritoryo han iya kaaway. Ibubuhayhag ba niya ha iya kaaway kon hain an sundalo? Syempre diri! Ha pariho nga paagi, ginsugo ni Jehova an iya Anak nganhi hinin peligroso nga kalibotan. Ibubuhayhag ba Niya ha maraot nga hadi an hinmumutangan han Iya Anak nga bata pa hito nga panahon? Diri gud!

Kon sugad, hin-o an nagsugo han “bitoon,” o han pariho hin bitoon nga butang? Aw, hin-o gud ba an nag-iikaparatay han bata nga hi Jesus basi diri ito dumaku ngan mahimo an buruhaton hito ha tuna? Hin-o an nangangalimbasog ha paglimbong ha mga tawo ngan pag-aghat han kabuwaan, kamadarahog, ngan pamatay? Iginpakilala mismo ni Jesus kon hin-o an ‘buwaon, ngan amay han buwa,’ an usa nga ‘parapamatay tikang ha tinikangan’—hi Satanas nga Yawa.—Juan 8:44.