Natawo ako ha Santo Domingo, Dominican Republic, ngan ako an putó han upat nga anak. Edukado an akon mga kag-anak ngan hingyap nira nga magdaku kami ha maopay nga komunidad. Upat ka tuig antes ako matawo, may nakilala hira nga mga misyonero han Mormon. Tungod han desente nga pamostura ngan pagin matinalahuron han mga misyonero, nagdesisyon an akon mga kag-anak nga umapi ha Church of Jesus Christ of Latter-day Saints, o Mormon Church. Ha amon lugar, kami an usa han siyahan nga nagin Mormons.

Samtang nagtutubo, nakakabiling ako hin kalipay ha mga buruhaton ha amon singbahan ngan gindadayaw ko gud an pagpabili hito ha pamilya ngan ha mga suruklan ha moral. Nalilipay gud ako nga usa ako nga Mormon ngan naghihingyap nga magin misyonero.

Han 18 anyos ako, bumalhin an amon pamilya ha Florida, Estados Unidos, basi didto ako magkolehiyo. Paglabay hin mga usa ka tuig, ginbisita kami han akon batâ ngan dadâ nga mga Saksi ni Jehova. Gin-imbitar nira kami ha ira kombensyon. Bumilib ako nga an ngatanan ha akon sapit nag-aabri han Biblia ngan nagsusurat. Salit namiling ako hin bolpen ngan papel, ngan ginsubad hira.

Katapos han kombensyon, nagsiring an akon batâ ngan dadâ nga tungod kay karuyag ko magmisyonero, puydi nira ako buligan nga mahibaro han Biblia. Nahunahuna ko nga maopay ito tungod kay mas pamilyar ako ha Book of Mormon kay ha Biblia.

Kon nag-iistorya kami ha telepono mahitungod han Biblia, pirme ako ginsisidngan han akon batâ ngan dadâ nga itanding ko ha Biblia an akon gintotoohan. Karuyag nira  nga ako mismo an makabasa kon ano an ginsisiring hito.

Damu nga katutdoan han Mormon an akon gintotoohan, pero diri ako sigurado kon uyon ba ito ha Biblia. Ginpadad-an ako han akon dadâ hin Nobyembre 8, 1995 nga Awake! nga magasin nga iginpublikar han mga Saksi ni Jehova. Didto mababasa an pipira nga artikulo mahitungod han katutdoan han Mormon. Nahipausa ako nga damu ngay-an han katutdoan hito an diri ko hinbabaroan. Tungod hini, nag-research ako ha opisyal nga Web site han Mormon basi hibaroan kon tinuod an ginsisiring han Awake! Tinuod gud man an nakasurat didto, ngan mas napamatud-an ko pa ito han kumadto ako ha mga museo han Mormon ha Utah.

Hadto, kahuna ko magkauyon an Book of Mormon ngan an Biblia. Pero han basahon ko hin maopay an Biblia, nakita ko nga magkaiba ito. Pananglitan, an Esekiel 18:4 nasiring nga an kalag namamatay. Kondi an Book of Mormon ha Alma 42:9 nasiring nga ‘an kalag diri gud namamatay.’

Gawas pa han magkaiba nga doktrina, nagupong liwat ako han nasyonalistiko nga mga ideya nga igintututdo han mga Mormon. Pananglitan, igintututdo hito nga an hardin han Eden aadto ha Jackson County, Missouri, E.U.A. Nagtututdo liwat an mga nangunguna hito nga gagamiton han Ginhadian han Dios an Estados Unidos ha pagpanguna ha ngatanan dinhi ha tuna basi maipatuman an kagawasan ngan an patas nga katungod han tawo.

Kon tinuod ini, ano an mahitatabo ha akon nasud ngan ha iba nga nasud? Iginpakiana ko ini han tumawag ha akon ha telepono an usa nga batan-on nga Mormon nga ginbabansay ha pagmisyonero. Ginpakianhan ko hiya kon makikigirra hiya ha iba nga Mormon kon an iya nasud makikig-away ha ira nasud. Nahipausa ako han bumaton hiya hin “oo!” Mas gin-usisa ko pa an katutdoan han akon relihiyon ngan namakiana ha mga nangunguna ha amon. Nagsiring hira nga mababaton la an akon mga pakiana kon magin matin-aw na an ngatanan.

Tungod kay waray makontento han ira esplikasyon, gin-usisa ko hin maopay an akon kalugaringon ngan kon ano gud an rason nga karuyag ko magmisyonero. Nahunahuna ko nga karuyag ko la ngay-an makabulig ha iba ngan irespeto han mga tawo. Kondi may kalabotan ha Dios, gutiay la an akon hinbabaroan. Bisan kon makadamu ko na mabasa an Biblia, waray ko ito seryosoha. Diri ako maaram han katuyoan han Dios para ha tuna o ha tawo.

Ha akon pag-aram han Biblia ha bulig han mga Saksi, upod han akon hinbaroan an ngaran han Dios, an nahitatabo kon an usa mamatay, ngan an papel ni Jesus ha katumanan han katuyoan han Dios. Hinay-hinay nga nagin pamilyar ako hinin birilhon nga libro, ngan nalilipay ako ha pagsumat ha iba han kamatuoran nga akon hinbabaroan. Tikang pa hadto, maaram ako nga may Dios, pero yana, nakakaistorya ko na hiya ha pag-ampo sugad nga pinakaduok nga Sangkay. Han Hulyo 12, 2004 nabawtismohan ako sugad nga Saksi ni Jehova. Paglabay hin unom ka bulan, sumulod ako ha bug-os-panahon nga pagministeryo.

Ha sulod hin lima ka tuig, nagboluntaryo ako ha sentro nga opisina han mga Saksi ni Jehova ha Brooklyn, New York. Daku gud an akon kalipay nga makabulig ha produksyon han Biblia ngan han mga literatura nga iginbasar ha Biblia. Napapahimulosan gud ini han minilyon ka tawo ha bug-os nga tuna. Yana, nagpapadayon an akon kalipay samtang nakakabulig ako ha iba nga mahibaro mahitungod ha Dios.