Makuri para ha iba nga higugmaon an Dios. Para ha ira, an Dios imposible masabtan, diri interesado ha aton, o madarahog. Tagda ini nga mga komento:

• “Nag-aampo ako para han bulig han Dios, pero ha luyo han akon hunahuna, naabat ako nga hirayo hiya ngan imposible maabot. Para ha akon, an Dios imahinasyon la ngan waray pagbati.”—Marco, Italya.

• “Karuyag ko gud singbahon an Dios, pero baga hin hirayo hiya hinduro. Para ha akon, mapintas hiya nga Dios nga naruruyag la pagsirot ha aton. Diri ako natoo nga hinigugma kita niya.”—Rosa, Guatemala.

• “Han bata pa ako, natoo ako nga an Dios nagpipinamiling la han aton sayop, ngan andam pagsirot ha aton. Ha urhi, inabat ko nga waray hiya pagpaid. An Dios pariho hin primero ministro nga nagkukontrol han iya mga nasasakopan, pero diri interesado ha ira.”—Raymonde, Canada.

Para ha imo, makuri ba higugmaon an Dios? Damu ka siglo na nga iginpapakiana ito han Kakristianohan. Ha pagkamatuod, durante han Edad Medya, kadam-an han membro han Kakristianohan an diri ngani nag-aampo ha Dios nga Makagarahum ha ngatanan. Kay ano? Kay nahadlok hira ha iya. An historyador nga hi Will Durant nagsiring: “Hin-o nga makasasala an magpapasipara pag-ampo ha usa nga makaharadlok ngan hirayo gud?”

Kay ano nga gintatagad an Dios sugad nga “makaharadlok ngan hirayo”? Ano gud ba an igintututdo han Biblia mahitungod ha Dios? An paghibaro ba han kamatuoran mahitungod ha Dios mabulig ha imo nga higugmaon hiya?