Natawo ako ha Bilbao, ha norte han Espanya. Maopay an panginabuhi han mga tawo ha amon lugar. Ikaduha ako ha upat nga anak. Debotado nga Katoliko an amon pamilya, ngan nasingba ako kada adlaw. Ha edad nga 23, nagin maestra ako—bokasyon nga akon gud karuyag ngan nagin karera ha sulod hin 40 ka tuig. An subject nga pinakapaborito ko itutdo amo an Catholic religion. Usa liwat ako nga katekista, ngan ha gab-i nagtututdo ako ha kabataan nga kababayin-an basi magin andam hira para han ira siyahan nga komunyon.

Paglabay hin 12 ka tuig han malipayon nga pag-asawa, nabalo ako nga may upat nga anak nga aatamanon. Trenta-y-tres anyos pala ako hadto! Namiling ako hin suporta tikang ha akon relihiyon, kondi an akon mga pakiana diri pa nababaton. ‘Kay ano nga namamatay la gihap an mga tawo bisan kon gintubos na kita han Kristo? Kay ano nga nag-aampo kita nga umabot an Ginhadian han Dios kon an mag-opay nga tawo makadto man la ha langit?’ Ngan labaw ha ngatanan, nagpapakiana ako: ‘Kon huhukman kita han Dios kon kita mamatay, kay ano nga ha urhi kinahanglan man kita bumaya ha langit, purgatoryo, o impyerno para ha ultimo nga paghukom?’

Iginpakiana ko ito ha pipira nga padi. Usa ha ira an binaton: “Diri ako maaram. Pakianhi an obispo. Importante ba ito? Diri ba natoo ka ha Dios? Ito an importante!” Kondi nagpinamiling la gihap ako han baton. Ha urhi, tinambong ako hin mga lecture han mga Jesuita, Pentekostal, ngan Gnostiko. Pero, waray ako makabiling hin makapatagbaw nga baton.

Han mga 60 anyos ako, gin-imbitar ako hin syete anyos nga estudyante ha pagtambong ha katirok han mga Saksi ni Jehova. Naruyagan ko an akon nakita ngan hinbatian. Kondi tungod kay sagipo ako, nautod an akon komunikasyon ha mga Saksi hito nga panahon. Paglabay hin duha ka tuig, may binisita ha akon nga mag-asawa nga Saksi, hira Juan ngan Maite. Ha sulod hin tulo ka bulan, nagkaada kami detalyado nga pakiana-ngan-baton nga mga sesyon nga nagresulta ha pag-aram ha Biblia.

Pirme ko gud ginpapamulat an tagsa nga sesyon! Gin-usisa ko hin maopay an ngatanan gamit hin tulo nga bersyon han Biblia basi masiguro kon kamatuoran an igintututdo han mga Saksi. Waray pag-iha nasantop ko nga maiha na ngay-an ako nagugupong  han katutdoan han akon relihiyon. Diri ako makatoo nga daku an kaibahan han akon hinbabaroan ha Biblia yana ngan han akon naglabay nga gintotoohan. Nabug-atan gud ako, an akon mga gintotoohan sugad hin nakagamot na nga puno nga yana gin-gagabot.

Katapos, nagkasakit an akon ikaduha nga bana hin grabe ngan namatay. Haros hito gihap nga panahon, nagretiro ako ha trabaho ngan binaya anay ha Bilbao. Binaya liwat hira Juan ngan Maite. Makasurubo, inundang ako pag-aram ha Biblia. Kondi ha akon kasingkasing, maaram ako nga nakabiling ako hin bahandi. Waray ko gud ito hingalimti.

Paglabay hin mga 20 ka tuig, han 82 anyos ako, binalik hira Juan ngan Maite ha Bilbao ngan ginbisita ako. Nalipay gud ako nga makita hira utro! Nasantop ko nga waray ako hingalimti ni Jehova, ngan nag-aram ako utro. Mapailubon gud hira Juan ngan Maite ha akon bisan kon gin-uuroutro ko an akon mga pakiana. Kinahanglan pauroutro nga hibatian ko an mga kamatuoran ha Biblia basi mawara an akon pagin debotado ha akon naglabay nga gintotoohan. Karuyag ko liwat magkaada daku nga kahibaro ha Biblia basi maisaysay ko ito ha akon kasangkayan ngan pamilya.

An adlaw nga nabawtismohan ako—ha edad nga 87—amo an pinakamakalilipay nga adlaw ha akon kinabuhi. Gindumara an bawtismo ha usa nga asembleya han mga Saksi ni Jehova. Usa nga Kristiano nga tigurang an naghatag hin basado ha Biblia nga pahayag nga igin-andam labi na para ha mga babawtismohan. Durante han pahayag, waray ko mapugngi an akon luha. Sugad hin direkta nga nakikiistorya hi Jehova ha akon. Katapos han bawtismo, damu nga Saksi an dinaop ha akon basi ipahayag an ira kalipay—bisan kon kadam-an ha ira hito ko pa la nga takna iginkita!

Tikang pa hadto, maaram na ako nga hi Jesu-Kristo “an dalan.” (Juan 14:6) Kondi tungod han akon pag-aram ha Biblia nakilala ko hi Jehova, an usa nga ha kan kanay igintutugway kita ni Jesus. Yana, mahimo na ako makag-ampo ha Dios sugad nga akon hinigugma nga Amay ngan Sangkay. An pagbasa ha libro nga Magin Duok kan Jehova * nakagbag-o han akon kinabuhi. Nabasa ko ito hin bug-os ha usa la ka gab-i! Nabantad gud ako ha paghibaro kon mationan-o kamaloloy-on hi Jehova ha aton.

Kon ginhuhunahuna ko an akon maiha nga pagpinamiling han kamatuoran, nahinunumdoman ko an mga pulong ni Jesus: “Padayon nga mangaro kay ihahatag ito ha iyo, padayon nga mamiling kay hiaagian ito niyo, padayon nga magtuktok kay aabrihan kamo.” (Mateo 7:7) Yana nga nabilngan ko na an mga baton nga maiha ko nga ginpinamiling, iginsusumat ko ito ha iba, ngan naghahatag ito ha akon hin daku nga kalipay.

Nobenta anyos na ako yana, ngan bata pa ha espirituwal. An kada katirok nga akon gintatambongan ha Kingdom Hall gintatagad ko nga espesyal nga okasyon tungod han presyoso nga kahibaro nga akon nakakarawat ngan tungod han hinigugma ko nga kabugtoan nga akon nakakaupod. Naghahandom gud ako nga makausa pa magin titser didto ha iginsaad nga Paraiso nga tuna. (Pahayag 21:3, 4) Labi nga ginhahandom ko nga makita nga banhawon an akon mga hinigugma nga namatay, ngan magkaada higayon ha pagtutdo ha ira han kamatuoran ha Biblia. (Buhat 24:15) Karuyag ko gud isumat ha ira nga gintagan ako hin presyoso nga regalo ni Jehova bisan han akon lagas na nga pangidaron!