NANGUNGUNA NGA ARTIKULO | MAY-ADA BA SATANAS?
May-ada ba Satanas?
Estatwa ha Madrid, Espanya, nga naghuhulagway kan Satanas sugad nga maraot nga anghel nga iginhulog nganhi ha tuna
“Nagtubo ako ha El Salvador. Kon nagpipinasaway ako, nasiring hi Nanay, ‘Hala, kukuhaon ka han Yawa!’ Ngan nabaton ako, ‘Sige, pakanhia hiya!’ Natoo ako nga may Dios, pero diri ako natoo nga may Satanas.”—ROGELIO.
Nauyon ka ba han ginsiring ni Rogelio han bata pa hiya? Hain hinin masunod nga mga opinyon an imo gintotoohan?
-
Diri tinuod hi Satanas; simbolo la hiya han karaotan.
-
Tinuod hi Satanas, kondi diri hiya interesado ha mga tawo.
-
Hi Satanas gamhanan nga espiritu nga may daku nga impluwensya ha mga tawo.
May-ada natoo ha tagsa hito nga opinyon, bangin minilyon pa ngani. Kondi importante gud ba kon ano an husto? Aw, kon diri tinuod hi Satanas, nauuwat adton natoo nga naeksister hiya. Kon tinuod hi Satanas pero diri interesado ha mga tawo, waray rason an pagin mabinantayon o kahadlok han damu nga tawo. Kondi kon hi Satanas tuso nga nagkukontrol ha mga tawo, peligroso hiya labaw pa han ginhuhunahuna han kadam-an.
Aton usisahon kon ano an baton han Baraan nga Kasuratan hini nga mga pakiana: Ano o hin-o hi Satanas—simbolo la han karaotan o espiritu nga persona? Kon persona hiya, namimeligro ka ba ha iya? Kon oo, paonan-o mo mapapanalipdan an imo kalugaringon?
