HI Jose tikang ha trabaho. Nanunuro an iya balhas samtang naglalakat ha masirom nga pasilyo. Tungod han duro nga kapaso ha Ehipto, pariho hin pugon an prisohan. Baga hin memoryado na niya an ngatanan nga dapit han prisohan ngan an tagsa nga gutak han pader. Dida na la hito nalibot an iya kinabuhi. Ginrirespeto gud hiya dinhi, pero priso la gihapon hiya.

Sigurado nga nahinunumdoman niya an iya kinabuhi ha higtaas ngan batoon nga kabungtoran ha Hebron, diin iya gin-ataman an kakarnerohan han iya tatay! Mga 17 anyos hiya han may iginsugo ha iya an iya tatay nga hi Jacob nga nagin hinungdan nga nahibulag hiya hin hirayo ha iya pamilya. Yana, baga hin imposible na gud an sugad nga kagawasan. Naawa gud kan Jose an iya kabugtoan salit nagplano hira nga patayon hiya, kondi iginbaligya na la lugod hiya sugad nga uripon. Gindara hiya ha Ehipto diin nagserbi ha panimalay han opisyal nga hi Potipar. Gintaporan gud hi Jose han iya agaron tubtob nga buwa nga gin-akusaran hiya han asawa ni Potipar hin panlugos, salit napriso hiya. *—Genesis, kapitulo 37, 39.

Yana, hi Jose 28 anyos na, mga 10 na ka tuig nga uripon ngan priso. Hirayo gud ini ha kinabuhi nga iya ginhahandom. Makakagawas pa ba hiya ha prisohan? Makikita pa ba niya an iya hinigugma ngan lagas na nga tatay ngan an iya pinaura nga manghod nga hi Benjamin? Tubtob san-o hiya magpapabilin nga priso?

Inabat mo na ba an inabat ni Jose? Usahay an aton kinabuhi hirayo gud ha kinabuhi nga aton ginhahandom han mga bata pa kita. Oo, an makuri nga mga kahimtang baga hin waray na kataposan, ngan diri naton mahunahuna kon paonan-o naton ito masusolusyonan o maiilob. Aton kitaon kon ano an aton mahibabaroan tikang ha pagtoo ni Jose.

Maaram hi Jose nga diri gud hiya hingangalimtan han iya Dios nga hi Jehova, ngan nakabulig gud ito ha iya nga makailob. Bisan dinhi hinin hirayo nga prisohan, padayon nga ginbendisyonan hiya ni Jehova. Aton mababasa: “Hi Jehova upod kan Jose, ngan nagpahayag hin kalooy ha iya, ngan tinagan hiya hin kalooy ha mga mata han parabantay han bilanggoan.” (Genesis 39:21-23) Samtang maduruto nga ginbubuhat ni Jose an iya buruhaton, padayon nga gintatagan niya an Dios hin rason nga bendisyonan hiya. Sigurado nga naliaw hiya nga kaupod niya pirme hi Jehova!

Katuyoan ba ni Jehova nga mapriso hi Jose ha iya bug-os nga kinabuhi? Diri maaram hi Jose, pero sigurado nga ito nga iya kahimtang padayon niya nga igin-inampo. Ngan sugad han kasagaran nga nahitatabo, naabot an baton ha diri ginlalaoman nga paagi. Usa ka adlaw, nagkarigumok ha prisohan han umabot an duha nga bag-o nga priso—mga personal nga opisyal han Paraon. An usa amo an pangulo han mga parahimo hin tinapay ngan an ikaduha amo an pangulo han mga paratagay.—Genesis 40:1-3.

Iginsarig kan Jose han pangulo han mga bantay an pagpanginano hini nga kalalakin-an nga prominente hadto. * Usa ka gab-i, an tagsa ha ira nag-inop nga  baga hin tinuod nga nahitatabo, ngan nakagupong ito ha ira. Pagkaaga, han makita hira ni Jose, naobserbaran niya nga baga hin may problema hira. Salit nagpakiana hiya: “Kay ano nga masurub-on kamo pagkit-on yana?” (Genesis 40:3-7) Posible nga tungod kay buotan hiya, waray mag-alang ini nga kalalakin-an pagsumat han ira problema. Diri hiya maaram nga ito nga pag-istorya an magigin hinungdan nga mabag-o an iya kahimtang. Kon waray magin buotan hi Jose, bangin diri makiistorya ha iya ito nga kalalakin-an. Salit puydi naton pakianhan an aton kalugaringon, ‘Iginpapakita ko ba an akon pagtoo ha Dios pinaagi ha pagpakita hin personal nga interes ha akon mga igkasi-tawo?’

An duha nga kalalakin-an nagsumat nga nagugupong hira han ira inop ngan nasusubo gud tungod kay waray nakakag-interpretar hito. Importante gud ha mga Ehiptohanon an mga inop, ngan nadepende gud hira ha kalalakin-an nga nakakag-interpretar kuno hito. Inin duha nga kalalakin-an diri maaram nga an ira inop tikang kan Jehova. Kondi maaram hito hi Jose. Iya ginpasarig hira: “Diri ba an mga pagsaysay kanan Dios? Nanginginyupo ako ha iyo pagsumati ako [han iyo inop].” (Genesis 40:8) Ini nga ginsiring ni Jose importante pa gihapon yana ha ngatanan nga sinsero nga nag-aaram ha Biblia. Kon nagpapakita la unta an ngatanan nga relihiyoso hin sugad nga pagkamapainubsanon! Kinahanglan kita magin andam nga isalikway an mapahitas-on nga panhunahuna ngan sumarig ha Dios samtang namimiling hin husto nga kahulogan han iya pulong.—1 Tesalonica 2:13; Santiago 4:6.

An paratagay an una nga nag-istorya. Iya iginsumat kan Jose an iya inop mahitungod hin balagon han ubas nga may tulo nga sanga nga may mga urapong hin ubas. Nahinog an mga ubas ngan ginpuga niya ito ha kopa han Paraon. Tungod han bulig ni Jehova, hinbaroan dayon ni Jose an kahulogan han inop. Iya ginsidngan an paratagay nga an tulo nga sanga nangangahulogan hin tulo ka adlaw; paglabay hin tulo ka adlaw, ibabalik han Paraon an paratagay ha pwesto. Baga hin nagabotan hin tunok an paratagay, ngan hi Jose naghangyo ha iya: “Ipahayag mo in kalooy ha akon, nanginginyupo ako ha imo, ngan himangrawi hi Paraon tungod ha akon.” Iginsumat ni Jose nga iginbaligya hiya han iya kabugtoan ngan ginpriso nga waray hinungdan.—Genesis 40:9-15.

Tungod han maopay nga sumat nga nakarawat han paratagay, naaghat liwat an parahimo hin tinapay nga magpakiana kan Jose han kahulogan han iya inop. Iya iginsumat nga may nakita hiya nga tulo nga basket hin tinapay ngan mga tamsi nga nakaon tikang ha usa han mga basket nga nakada ha iya ulo. An kahulogan hini nga inop hinbaroan liwat ni Jose. Pero diri ini maopay nga sumat para ha parahimo hin tinapay. Hi Jose nagsiring: “Amo ini an kasayoran hito. An tutulo ka lidong amo an tutulo ka adlaw: Ha sakob pa han tulo ka adlaw pagpupugotan ni Paraon an imo ulo, ngan pagbibitayon ka dida hin kahoy, ngan pagkakaunon han katamsihan an imo unod.” (Genesis 40:16-19) Pariho han ngatanan nga matinumanon nga surugoon han Dios, maisugon nga iginpahayag ni Jose an mensahe han Dios—an maopay nga sumat ngan an mensahe han tiarabot nga paghukom.—Isaias 61:2.

 Paglabay hin tulo ka adlaw, natuman an ginsiring ni Jose. An Paraon nagsaurog han iya adlaw nga natawhan—usa nga selebrasyon nga diri ginbubuhat han katawohan han Dios ha panahon han Biblia—ngan iginpahayag an desisyon han iya paghukom para hini nga iya duha nga surugoon. Ginpatay an parahimo hin tinapay sugad han ginsiring ni Jose, kondi an paratagay iginbalik ha pwesto. Pero makasurubo, inin diri mapasalamaton nga lalaki nahingalimot kan Jose.—Genesis 40:20-23.

Duha na ka tuig an naglabay. (Genesis 41:1) Hunahunaa kon mationan-o kamakasurubo ito para kan Jose! Bangin daku gud an iya ginlalaoman han iginpahibaro ha iya ni Jehova an kahulogan han inop han paratagay ngan han parahimo hin tinapay. Posible ha kada pagsisidlit han adlaw naglalaom hiya nga makakagawas na hiya ha prisohan, kondi naabot na la an kagab-ihon nga waray man nahitatabo. Bangin inin duha ka tuig amo an pinakamakuri para kan Jose. Kondi padayon hiya nga sinarig kan Jehova. Imbes nga mawad-an hin paglaom, determinado hiya nga magpailob, ngan nakabulig ito ha iya nga magin mas marig-on.—Santiago 1:4.

Hinin makuri nga panahon, kita ngatanan kinahanglan magpailob. Basi maatubang an mga pagsari, kinahanglan naton an determinasyon, pagpailob, ngan kamurayawan nga an Dios la an makakaghatag. Sugad han iya ginbuhat kan Jose, mabubuligan kita niya nga diri manluya ngan diri mawad-an hin paglaom.—Roma 12:12; 15:13.

Bangin nakalimtan han paratagay hi Jose, pero waray gud hiya hingalimti ni Jehova. Usa ka gab-i, ginpainop ni Jehova an Paraon hin duha nga diri hingangalimtan nga inop. Siyahan, nakakita an hadi hin pito nga maopay pagkit-on ngan matambok nga mga baka nga nasagka tikang ha Salog Nilo nga may nasunod nga pito nga magraksot ngan maggasa nga mga baka. Ginlamoy han maggasa an matambok nga mga baka. Ikaduha, nag-inop hiya hin usa ka uhay nga may binuswak nga pito ka pungyot hin maglibsog nga lugas. Kondi may binuswak pa nga pito ka pungyot hin uga ngan kipil nga lugas. Ginlamoy hito an maglibsog nga lugas. Pagkaaga, nagupong an Paraon tungod han iya inop salit iya iginpatawag an ngatanan nga iya makinaadmananon nga kalalakin-an ngan mga saserdote nga nagbubuhat hin madyik basi isaysay an kahulogan hito. Kondi napakyas hira ngatanan. (Genesis 41:1-8) Diri kita maaram kon waray hira makaghatag han kahulogan hito o magkaiba-iba la an ira ideya. Anoman an nahitabo, napakyas an Paraon, pero determinado gud hiya nga hibaroan an kahulogan hito.

Ha urhi, nahinumdoman gihapon han paratagay hi Jose! Nakonsensya hiya, ngan ginsumatan niya an Paraon mahitungod han maaramon nga batan-on ha prisohan nga husto nga nakag-interpretar han iya inop ngan han kanan parahimo hin tinapay duha ka tuig na an naglabay. Iginpatawag dayon han Paraon hi Jose tikang ha prisohan.—Genesis 41:9-13.

Hunahunaa la an gin-abat ni Jose han umabot an mga mensahero han Paraon ngan nagsiring nga ginpapatawag hiya han hadi. Nagliwan dayon hiya ngan nag-ahit—posible nga gintanggal an tanan nga iya buhok ha ulo tungod kay ito an kustomre han mga Ehiptohanon. Sigurado nga nanginyupo gud hiya kan Jehova nga bendisyonan unta ini nga iya pakiistorya! Yana, aada na hiya ha sulod han magarbo nga palasyo ha atubangan han Paraon. Aton mababasa: “Hi Paraon siniring kan Jose: Nag-inop ako hin inop, ngan waray bisan usa nga nakakagsaysay hito: ngan ako nakabati mahitungod ha imo, nga kon ikaw makabati hin inop nakakagsaysay ka hito.” Makausa pa, an baton ni Jose nagpakita han iya pagin mapainubsanon ngan pagtoo ha iya Dios: “Diri kay ako: An Dios maghahatag kan Paraon hin baton han kamurayawan.”—Genesis 41:14-16.

Hinigugma ni Jehova an mga mapainubsanon ngan mga matinumanon, salit diri urusahon nga iya iginhatag kan Jose an baton nga waray hibaroi han makinaadmananon nga kalalakin-an ngan mga saserdote. Iginsaysay ni Jose nga an duha nga inop han Paraon may pariho nga kahulogan. Pinaagi ha pag-utro han mensahe, ginpabug-atan ni Jehova nga mahitatabo gud ito. An mahimsog nga mga baka ngan an malibsog nga mga lugas nagrirepresentar hin pito ka tuig nga kahuraan ha Ehipto, samtang an magasa nga mga baka ngan kipil nga mga lugas nagpapasabot hin pito ka tuig nga gutom nga masunod katapos han mga tuig han kahuraan. Lalamuyon hito nga gutom an kahuraan han Ehipto.—Genesis 41:25-32.

Maaram an Paraon nga husto an interpretasyon ni Jose. Kondi ano an kinahanglan buhaton? Nagrekomendar  hi Jose hin usa nga plano. Kinahanglan magbiling an Paraon hin usa nga “batid ngan makinaadmananon” basi manginano ha pagtirok han sobra nga lugas ngadto ha mga bodega durante han pito ka tuig nga kahuraan ngan ha panhatag hito ha mga manginginahanglan durante han maabot nga gutom. (Genesis 41:33-36) Tungod han eksperyensya ngan abilidad ni Jose, kwalipikado gud hiya hini nga posisyon, kondi waray niya irekomendar an iya kalugaringon. Mapainubsanon hi Jose salit iya ginhunahuna nga an pagbuhat hito usa nga pagpanguna ha hadi. May pagtoo hiya nga kon kaburut-on ni Jehova, ibubutang hiya hito nga posisyon salit waray niya ito ambisyona. Kon natoo gud kita kan Jehova, diri naton kinahanglan mag-ambisyon o ipahitaas an aton kalugaringon. Mamurayawon nga igintatapod naton an ngatanan kan Jehova!

Nakita han Paraon ngan han ngatanan nga iya surugoon nga maaramon an plano ni Jose. Nasantop liwat han hadi nga an Dios ni Jose an nabulig basi makagyakan hi Jose hinin maaramon nga mga pulong. Nagsiring an Paraon ha iya mga opisyal: ‘Makakaagi ba kita hin tawo nga sugad hini, usa nga tawo nga an espiritu han Dios aada ha iya?’ Nagsiring an Paraon kan Jose: “Sugad nga an Dios nagpahayag ha imo hini ngatanan, waray bisan usa nga barobatid ngan labi ka makinaadmananon sugad ha imo: Ikaw an mamay gahum ha akon balay, ngan sugad han imo pulong an akon mga katawohan pagmandoan: ha lingkuranan la nga hadianon malabaw ako ha imo.”—Genesis 41:38-41.

Gintuman ni Paraon an iya ginsiring. Ginpasul-ot dayon hi Jose hin maopay nga panapton nga lino. Gintagan hiya han Paraon hin bulawan nga kwintas, pantatak nga singsing, panhadi nga karuwahe, ngan awtoridad nga libuton an Ehipto ngan ipatuman an iya plano. (Genesis 41:42-44) Salit ha sulod hin usa la ka adlaw, nabag-o gud an kinabuhi ni Jose—tikang ha prisohan ngadto ha palasyo, tikang ha pagin priso ngadto ha pagin magmarando nga ikaduha han Paraon. Ginbalosan gud ni Jehova nga Dios an pagtoo ni Jose! Nakita ni Jehova an ngatanan nga kawaray-hustisya nga gin-atubang ni Jose ha naglabay nga mga tuig. Ginsulbad niya ito ha husto nga panahon ngan ha husto nga paagi. An ginhunahuna ni Jehova diri la an pagtadong han sayop nga ginbuhat kan Jose kondi pati an tidaraon nga nasud han Israel. Hibabaroan naton kon paonan-o ito ginbuhat ni Jehova ha masunod nga artikulo hini nga mga serye.

Kon naatubang ka hin makuri nga sitwasyon, bangin hin nagpapadayon nga kawaray-hustisya, ayaw kawad-i hin paglaom. Hinumdumi hi Jose. Nagpabilin hiya nga buotan, mapainubsanon, mapailubon, ngan may pagtoo, salit gintagan niya hi Jehova hin rason nga bendisyonan hiya.