Megan: Kumusta Shirley? Salamat ngay-an han imo pagtambong ha Memoryal han kamatayon ni Jesu-Kristo han naglabay nga semana. * Ano an imo masisiring mahitungod han katirok?

Shirley: Okey man, pero waray ko bug-os nga masabti an ginhisgotan didto. Ha akon obserbasyon, mas gintatagan hin importansya han kadam-an an katawo ni Jesus durante han Pasko imbes nga an paghinumdom han iya kamatayon.

Megan: Husto ka Shirley, kadam-an gud man an nagsiselebrar han Pasko. Pero natoo an mga Saksi ni Jehova nga an mas importante nga okasyon nga sadang hinumdoman amo an kamatayon ni Jesus. Nalilipay ako nga isaysay ha imo an mga hinungdan hito.

Shirley: Sige.

Megan: Siyahan, ginsasaurog han mga Saksi ni Jehova an kamatayon ni Jesus tungod kay sugo ito ni Jesus ha iya mga sumurunod. Tagda an nahitabo han gab-i antes hiya mamatay. Nabatian mo na ba an mahitungod han usa nga espesyal nga panihapon nga iya ginbuhat kaupod han iya matinumanon nga mga sumurunod?

Shirley: An Ultimo nga Panihapon?

Megan: Oo. Gintatawag liwat ito nga Panihapon han Ginoo. Durante hito nga pangaon, gintagan ni Jesus an iya mga sumurunod hin matin-aw nga mga instruksyon. Puydi mo ba basahon an Lucas 22:19?

Shirley: Sige. “Kinuha liwat hi Jesus hin tinapay, nag-ampo, gintipik-tipik ito ngan iginhatag ha ira, ngan nagsiring: ‘Nagsisimbolo ini han akon lawas nga ihahatag para ha iyo. Padayon nga buhata niyo ini sugad nga hinumdoman ha akon.’”

Megan: Salamat. Tigamni an sugo ni Jesus ha kataposan nga bahin hito nga teksto: “Padayon nga buhata niyo ini sugad nga hinumdoman ha akon.” Ngan antes ihatag ni Jesus ito nga sugo ha iya mga sumurunod, iya iginpatin-aw kon ano an ira sadang hinumdoman. Nagsiring hiya nga iya ihahatag an iya kinabuhi para ha iya mga sumurunod. May ginsiring liwat hi Jesus nga puropariho hito nga mga pulong ha Mateo 20:28. Nasiring ito: “An Anak han tawo kinanhi, diri basi pagserbihan kondi basi magserbi ngan maghalad han iya kalag sugad nga lukat para ha damu nga tawo.” Salit ito an rason kon kay ano nga nagkakatirok an mga Saksi ni Jehova kada tuig ha anibersaryo han kamatayon ni Jesus—basi hinumdoman an halad-lukat nga iya iginhatag. An iya kamatayon nangangahulogan hin kinabuhi para ha ngatanan nga masinugtanon nga katawohan.

Shirley: May mga nasiring nga namatay hi Jesus basi magkaada kita kinabuhi. Pero ha tinuod la, diri ko gud nasasabtan kon paonan-o ito nahitabo.

Megan: Damu liwat an naabat hin sugad hito, Shirley. Hilarom nga topiko an mahitungod han halad-lukat ni Jesus. Kondi usa liwat ito han pinakamaopay  nga kamatuoran ha Pulong han Dios. Okey la ba ngay-an nga magpadayon kita pag-istorya?

Shirley: Okey la, waray pa man ak’ bubuhaton.

Megan: Salamat. Katatapos ko pa la basahon an mahitungod han lukat, ngan pangangalimbasogan ko nga isaysay ito ha simple nga paagi.

Shirley: Sige.

Megan: Basi masabtan naton an lukat, kinahanglan masabtan anay naton an kahimtang han nakasala hira Adan ngan Eva ha hardin han Eden. Mabubuligan kita han Roma 6:23 basi masabtan naton an isyu nga nahidadabi. Puydi mo ba ito basahon?

Shirley: Sige, nasiring ito: “An bayad han sala amo an kamatayon, pero an regalo nga iginhahatag han Dios amo an kinabuhi nga waray kataposan pinaagi kan Kristo Jesus nga aton Ginoo.”

Megan: Salamat. Usisahon naton ito nga mga pulong. Siyahan, tigamni kon paonan-o nagtikang an bersikulo: “An bayad han sala amo an kamatayon.” Simple ini nga prinsipyo nga iginhatag han Dios ha tinikangan han kasaysayan han tawo—an bayad, o sirot, han sala amo an kamatayon. Syempre, ha tinikangan, waray tawo nga makasasala. Hira Adan ngan Eva ginlarang nga perpekto, ngan an ngatanan nga ira magigin mga anak matatawo unta nga perpekto. Salit waray hinungdan nga an usa mamatay. Hira Adan ngan Eva pati an ira mga anak may paglaom nga mabuhi nga malipayon ha kadayonan. Kondi sugad han aton hinbabaroan, waray ito mahitabo, diri ba?

Shirley: Oo, kay hira Adan ngan Eva kinaon han igindidiri nga bunga.

Megan: Husto. Ngan han ginbuhat nira ito—han ginsupak nira an Dios—nakasala hira. Hito nga paagi, ira ginpili nga magin diri perpekto ngan magin makasasala. Ito nga ira ginbuhat nagkaada peligroso gud nga mga resulta diri la ha ira, kondi pati ha ngatanan nira nga anak.

Shirley: Ano an imo karuyag sidngon?

Megan: Basi masabtan naton ini, maghahatag ako hin ilustrasyon. Mahilig ka ba magluto?

Shirley: Oo.

Megan: Pananglitan, may-ada ka bag-o nga hurmaan hin tinapay. Pero waray mo pa ito kagagamit, nahulog ito ngan nakipi. Ano daw la an mahitatabo ha mga tinapay nga imo lulutoon dida hito? Diri ba magkakaada liwat ito kipi?

Shirley: Syempre.

Megan: Sugad liwat hito an nagin kahimtang nira Adan ngan Eva han ginpili nira nga diri sumugot ha Dios. Nagkaada hira “kipi,” o hugaw, pinaagi han sala ngan pagin diri perpekto. Ngan tungod kay nakasala hira antes pa magkaada mga anak, an ngatanan nga ira magigin mga anak matatawo nga may-ada “kipi.” Matatawo hira ha makasasala nga kahimtang. Ha Biblia, an pulong nga “sala” diri la nagtutudlok ha usa nga buhat kondi pati ha kahimtang nga aton napanunod. Salit bisan kon waray kita nabuhat nga sayop—waray pa ngani kita matawo han nakasala hira Adan ngan Eva—ginhukman na kita, an ira magigin mga anak, ngan an aton magigin mga anak hin pagin makasasala ngan hin kinabuhi nga diri perpekto nga magriresulta hin kamatayon. Sugad han aton ginbasa ha Roma 6:23, an sirot han sala amo an kamatayon.

Shirley: Baga hin diri man ito makatadunganon. Kay ano nga kinahanglan mag-antos ha kadayonan an ngatanan nga tawo tungod han sala nira Adan ngan Eva?

Megan: Oo, baga hin diri ito makatadunganon. Pero tungod kay hingpit an hustisya han Dios, nagdesisyon hiya nga hira Adan nga Eva sadang mamatay tungod han ira sala, kondi kita nga ira mga anak gintagan han Dios hin paglaom. May ginhimo an Dios basi matalwas kita hinin makasurubo nga kahimtang. Amo ito nga iginhatag hi Jesus sugad nga halad-lukat. Kitaon naton utro an Roma 6:23. Katapos unabihon nga “an bayad han sala amo an kamatayon,” an teksto nagpadayon: “Pero an regalo nga iginhahatag han Dios amo an kinabuhi nga waray kataposan pinaagi kan Kristo Jesus nga aton Ginoo.” Salit an kamatayon ni Jesus an nagpapahinabo nga makatalwas kita tikang ha sala ngan kamatayon. *

Megan: May usa pa nga detalye hini nga teksto nga karuyag ko isaysay ha imo.

Shirley: Ano man ito?

Megan: Tigamni nga an teksto nasiring: “An regalo nga iginhahatag han Dios amo an kinabuhi nga waray kataposan pinaagi kan Kristo Jesus nga aton Ginoo.” Kon hi Jesus an nag-antos ngan namatay para ha aton ngan naghatag han iya kinabuhi para ha aton, kay ano nga nasiring an teksto nga an lukat “regalo nga iginhahatag han Dios” diri “regalo nga iginhahatag ni Jesus”? *

Shirley: Ahm, diri ako maaram.

Megan: An Dios an naglarang kanda Adan ngan Eva, ngan ha iya hira nakasala han gintalapas nira hiya ha hardin han Eden. Sigurado nga nasakitan gud hiya han magrebelde inin iya siyahan nga duha nga tawhanon nga anak. Kondi hi Jehova naghatag dayon hin solusyon. * Iya ginsugo an usa han iya mga anghel nganhi ha tuna basi magkinabuhi sugad nga hingpit nga tawo ngan ighalad an kinabuhi sugad nga halad-lukat. Salit an tagana nga lukat regalo han Dios. May usa pa nga rason nga masisiring naton nga an lukat regalo han Dios. Nahunahuna mo na ba kon ano an gin-abat han Dios han ginpatay hi Jesus?

Shirley: Waray pa.

Megan: May mga uyagan man kamo, may mga anak ka?

Shirley: May-ada—usa nga lalaki ngan usa nga babaye.

Megan: Sugad nga kag-anak, hunahunaa kon ano an gin-abat han langitnon nga Amay ni Jesus, hi Jehova nga Dios, han adlaw nga ginpatay hi Jesus. Karuyag ko sidngon, ano daw la an gin-abat ni Jehova samtang iya nakikita tikang ha langit an iya hinigugma nga Anak nga gin-aaresto, gin-iinsulto, ngan ginkakastigo? Ngan ano daw la an iya gin-abat samtang an iya anak iginraraysang ha poste nga kahoy ngan ginbayaan didto basi hinay-hinay nga mamatay?

Shirley: Sigurado nga duro gud an iya kasakit. Waray ko gud ito mahunahuna!

Megan: Syempre, diri naton bug-os nga maihuhulagway kon ano gud an gin-abat han Dios hito nga panahon. Pero maaram kita nga may-ada hiya pagbati, ngan maaram kita kon kay ano nga gintugotan niya nga mahitabo ito. Matin-aw nga iginsaysay ito ha aton han usa nga pamilyar nga teksto, ha Juan 3:16. Puydi mo ba ito basahon?

Shirley: Sige. Nasiring ito: “Hinigugma gud han Dios an kalibotan salit iginhatag niya an iya bugtong nga Anak basi an tagsa nga nagpapakita hin pagtoo ha iya diri mamatay kondi magkaada kinabuhi nga waray kataposan.”

Megan: Salamat. Aton kitaon utro an tinikangan hini nga teksto. Nasiring ito: “Hinigugma gud han Dios an kalibotan.” Gugma an nagpagios ha Dios nga sugoon an iya Anak nganhi ha tuna basi mamatay para ha aton. Oo, an halad-lukat amo an pinakadaku nga kapahayagan han gugma han Dios para ha aton. Salit ito an hinungdan kon kay ano nga an mga Saksi ni Jehova nagkakatirok kada tuig ha anibersaryo han kamatayon ni Jesus. Matin-aw na ba ha imo kon kay ano nga kinahanglan hinumdoman an kamatayon ni Jesus?

Shirley: Oo. Salamat han imo panahon.