An Biblia daan na hinduro nga libro. Mationan-o ito kadaan? Gintikangan pagsurat an Biblia ha Butnga Sinirangan mga 3,500 ka tuig na an naglabay. Kon itatanding, ito gihapon an panahon han mag-eksister an bantogan nga Shang dynasty han Tsina ngan mga napulo ka siglo antes magtikang an Budhismo ha India.—Kitaa an kahon nga “ Mga Impormasyon Mahitungod ha Biblia.”

Basi makabulig ngan magin mapulsanon nga giya an usa nga libro, kinahanglan masayon ito masabtan han mga tawo ngan makita nga importante ito ha ira. Sugad gud hito an Biblia. Naghahatag ito hin makapatagbaw nga baton ha pinakaimportante nga mga pakiana ha kinabuhi.

Pananglitan, naipakiana mo na ba, ‘Kay ano nga aanhi kita?’ Ini nga pakiana nakagupong ha mga tawo ha sulod hin yinukot ka tuig na, ngan bisan tubtob yana. Kondi an baton makikita ha siyahan nga duha nga kapitulo han siyahan nga libro han Biblia, an Genesis. Ito nga asoy magdadara ha imo “ha tinikangan”—binilyon ka tuig na an naglabay—han ginlarang an aton uniberso, upod na an mga galaksi, bitoon, ngan an tuna. (Genesis 1:1) Katapos sunod-sunod nga ginhuhulagway hito kon ano an mga nahitabo basi maukyan an tuna, kon paonan-o umiksister an iba-iba nga klase han kinabuhi, ngan kon paonan-o ginlarang an tawo—sugad man an katuyoan hini ngatanan.

An Biblia naghahatag hin praktikal nga sagdon basi mabuligan kita nga masulbad an mga problema kada adlaw. Masayon ito masabtan tungod han duha nga rason.

Siyahan, an mga pulong han Biblia klaro, direkta, ngan makaruruyag. Imbes nga gumamit hin mga pulong nga makuri masabtan o misteryoso, naggamit ito hin mga pulong nga direkta o nakakapukaw han aton mga sentido. Bisan an magkuri nga mga ideya iginpapahayag pinaagi hin mga pulong nga komon nga ginagamit kada adlaw.

Pananglitan, gumamit hi Jesus hin simple nga mga ilustrasyon nga iginbasar ha mga panhitabo ngan ha mga butang nga komon ha adlaw-adlaw nga pagkinabuhi han tawo basi tutdoan hira hin mga leksyon nga nakakabantad han kasingkasing. Damu hini an mababasa ha aton gintatawag nga Sermon ha Bukid, nga aada ha kapitulo 5 tubtob 7 ha libro han Biblia nga Mateo. Gintawag ito han usa nga komentarista sugad nga “usa nga praktikal nga pahayag” ngan nagsiring nga an katuyoan  hito “diri basi mapuno an aton hunahuna hin mga ideya, kondi basi giyahan ngan tadungon an aton paggawi.” Mahimo mo mabasa ini nga mga kapitulo ha sulod hin 15 tubtob 20 minutos, ngan mahipapausa ka gud ha simple kondi mapwersa nga mga pulong ni Jesus.

Ikaduha, masayon masabtan an Biblia tungod han ginhihisgotan hito. Diri ito libro mahitungod han mitolohiya o mga susmatanon. Lugod, kadam-an han mababasa ha Biblia sugad han siring han The World Book Encyclopedia, “mahitungod ha bantogan ngan ordinaryo nga mga tawo” ngan han ira “mga pangalimbasog, ginlalaoman, kapakyasan, ngan kalamposan.” Salit masayon naton masabtan ini nga mga asoy mahitungod han tinuod nga mga tawo ngan mga panhitabo, ngan han importante nga mga leksyon nga igintututdo hito.—Roma 15:4.

Basi masabtan an usa nga libro, kinahanglan mo ito mabasa ha yinaknan nga imo hinbabaroan. Yana, posible nga may-ada Biblia ha imo yinaknan, diin ka man naukoy o anoman an imo nasyonalidad. Hunahunaa an urusahon nga mga nahidadabi basi magin posible ito.

Paghubad. An Biblia siyahan nga iginsurat ha Hebreo, Aramaiko, ngan Griego. Natural la nga tungod hito, diri damu an nakabasa han Biblia. Basi mabasa ito ha iba-iba nga pinulongan, duro nga pangalimbasog an ginhihimo han sinsero nga mga parahubad. Tungod hito, naihubad na yana an Biblia, ha bug-os o ha bahin, ha mga 2,700 nga yinaknan. Nangangahulogan ini nga sobra 90 porsyento han populasyon an makakabasa bisan han pipira la nga bahin hito ha ira kalugaringon nga pinulongan.

Pagpublikar. An orihinal nga kopya han Biblia iginsurat ha nadudunot nga materyales, sugad han anit ngan papiro. Basi ito mabasa han iba, kinahanglan ito mano-mano nga kopyahon hin detalyado ha damu ka beses. Mahal adto nga mga kopya salit diri damu an nagkaada hito. Kondi han naimbento an Gutenberg nga imprintahan mga sobra 550 ka tuig na an naglabay, nagin malaksi an pagpanaltag han Biblia. Sumala ha usa nga pagkarkula, sobra lima ka bilyon nga kopya han Biblia, ha bug-os o ha bahin, an naipanaltag na.

Waray iba nga libro mahitungod han relihiyon an maitatanding ha Biblia may kalabotan hini. Matin-aw, an Biblia usa nga libro nga mahimo masabtan. Kondi, mahimo magin usa nga ayat an pagsabot hini. Pero may-ada ka makukuha nga bulig. Diin? Ngan paonan-o ka magpapahimulos hito? Hibaroi an mga baton ha sunod nga artikulo.