Gutiay La ba Ito nga Sayop nga Pagsabot?
Usa nga bata an nakakita hin aso nga nagawas tikang ha pabrika nga baga hin dampog pagkit-on. Tungod hito, naghunahuna hiya nga an pabrika naghihimo hin dampog. Iton gutiay nga sayop nga pagsabot han bata baga hin pataraw-an. Kondi, an dagku nga sayop nga pagsabot mahimo magkaada daku nga epekto ha aton kinabuhi. Pananglitan, an sayop nga pagsabot ha impormasyon ha surudlan han usa nga medisina mahimo magkaada nakakadaot nga resulta.
Kondi an sayop nga pagsabot mahitungod ha katutdoan ha Biblia labi nga mas nakakadaot gud. Pananglitan, sayop an pagsabot han iba ha katutdoan ni Jesus. (Juan 6:48-68) Imbes nga mahibaro hin dugang, ira ginsalikway an tanan nga iya igintutdo. Kakarag gud nga waray nira pahimulsi an katutdoan ni Jesus!
Nagbabasa ka ba han Biblia para hin giya? Kon oo, maopay ito. Kondi, posible ba nga magsayop ka ha pagsabot han imo nabasa? Nahitatabo ito ha damu nga tawo. Tagda an tulo nga komon nga sayop nga pagsabot.
-
May mga tawo nga sayop an pagsabot ha sugo han Biblia nga “kahadluki an Dios.” Natoo hira nga negatibo nga kahadlok ha Dios an gin-aaghat hito. (Eklesiastes 12:13) Pero diri karuyag han Dios nga ito an abaton han mga nagsisingba ha iya. Hiya nagsiring: “Diri ka mahadluk, kay ako upud ha imo; ayaw kaholop, kay ako an imo Dios; ako magpaparig-on ha imo; oo, ako mabulig ha imo.” (Isaias 41:10) Salit simple la an kahulogan han kahadlok ha Dios, ito an pag-abat hin hilarom nga pagtahod ha iya.
-
Bubungkagon ba an tuna pinaagi hin kalayo?
Sayop an pagsabot han pipira hinin giniyahan nga mga pulong: “Ha tagsa nga butang mayada usa ka panahon, . . . may panahon ha pagkatawo, ngan may panahon ha pagkamatay.” Naghuhunahuna hira nga igintanda nga daan han Dios kon san-o mamamatay an usa. (Eklesiastes 3:1, 2) Kondi ha pagkamatuod, an gin-uunabi hito nga teksto amo an mahitungod ha sikolo han kinabuhi, ngan nagdugang ito nga an kamatayon amo an dadangatan han tanan. An Pulong han Dios nagtututdo liwat nga an aton mga desisyon mahimo makaapekto ha kahilawig han aton kinabuhi. Pananglitan, mababasa naton: “An kahadluk kan Jehova nagpapahilaba han mga adlaw [o, kinabuhi].” (Proberbios 10:27; Salmos 90:10; Isaias 55:3) Ha ano nga paagi? Pananglitan, an pagtahod ha Pulong han Dios magpapagios ha aton nga likyan an mga buhat nga makakadaot han aton kahimsog, sugad han paghubog ngan imoralidad.—1 Corinto 6:9, 10.
-
Literal nga ginsasabot han iba an ginsisiring han Biblia nga an langit ngan tuna “nakareserba ha kalayo,” ngan naghuhunahuna hira nga bubungkagon han Dios an tuna. (2 Pedro 3:7) Kondi an Dios nagsasaad nga diri gud niya tutugotan nga mabungkag an tuna. Hiya ‘nagbutang han mga karig-onan han tuna, basi nga ito diri makiwa ha waray katapusan.’ (Salmos 104:5; Isaias 45:18) Salit diri an literal nga tuna an mabubungkag, kondi an maraot nga sistema han mga butang, nga sugad hin bubungkagon pinaagi hin kalayo. Ngan kon may kalabotan ha langit, kon literal an pagkagamit hito, nagtutudlok ito ha panganuron, o ha damu an bitoon nga uniberso, o ha urukyan han Dios. Waray bisan usa hini an mabubungkag.
KAY ANO NGA USAHAY SAYOP NGA GINSASABOT AN BIBLIA?
Sugad han iginpapakita hito nga mga ehemplo, agsob nga sayop an pagsabot han mga tawo ha mga teksto nga ira nababasa ha Biblia. Pero kay ano nga gintutugotan han Dios nga mahitabo ito? An iba bangin mangatadongan: ‘Kon an Dios an maaramon ha ngatanan ngan maaram han ngatanan, puydi unta hiya makaghatag hin libro nga klaro hinduro an pagkasurat ngan masayon masabtan han tanan. Kay ano nga waray niya ito buhata?’ Tagda an tulo nga hinungdan kon kay ano nga agsob nga sayop an pagsabot ha Biblia.
-
An Biblia gindisenyo basi masabtan han mga mapainubsanon ngan andam mahibaro. Hi Jesus nagsiring ha iya Amay: “Amay, Ginoo han langit ngan Lucas 10:21) An Biblia iginsurat ha paagi nga adton may-ada la han husto nga disposisyon an makakasabot. An tawo nga mapahitas-on—an komon nga kinaiya han “mga maaramon ngan edukado”—may tendensya nga magkaada sayop nga pagsabot ha Biblia. Kondi an mga nagbabasa nga may disposisyon nga pariho han kanan “kabataan”—mapainubsanon ngan andam mahibaro—mas nakakasabot han mensahe han Dios. Maopay gud an pagkadisenyo han Dios ha Biblia!
han tuna, gindadayaw ko ikaw ha kadaygan, kay ini nga mga kamatuoran imo gintago tikang ha mga maaramon ngan edukado ngan iginpahayag ini ha kabataan.” ( -
An Biblia iginsurat para ha mga sinsero nga naruruyag han bulig han Dios basi masabtan ito. Iginpakita ni Jesus nga an mga tawo magkikinahanglan hin bulig basi bug-os nga masabtan an iya katutdoan. Paonan-o nira makakarawat ito? Hiya nagsaysay: “An parabulig, an baraan nga espiritu, nga ipapadara han Amay ha akon ngaran, ito an magtututdo ha iyo han ngatanan nga butang.” (Juan 14:26) Salit naghahatag an Dios hin baraan nga espiritu—an iya gamhanan nga aktibo nga pwersa—basi buligan an mga tawo nga masabtan an Biblia. Kondi, diri niya ito iginhahatag ha mga diri nasarig ha iya bulig, salit sugad hin makuri masabtan an Biblia para ha ira. Nagpapagios liwat ito ha mga Kristiano nga may kahibaro nga buligan an mga naruruyag magkaada dugang nga pagsabot.—Buhat 8:26-35.
-
An iba nga teksto mahimo la masabtan han mga tawo ha husto nga panahon. Pananglitan, ginsugo hi propeta Daniel nga magsurat hin mensahe para ha tidaraon. Usa nga anghel an nagsiring: “Daniel, sadhi an mga polong, ngan lakrehi an basahon, bisan ngadto ha panahon ha katapusan.” Ha sulod hin ginatos ka tuig, damu an nagbabasa han libro han Biblia nga Daniel, kondi diri gud nira ito bug-os nga nasasabtan. Ha pagkamatuod, bisan hi Daniel waray makasabot han iba nga iya iginsurat. Mapainubsanon nga ginkarawat niya: “Ako nakabati, kondi waray ako sabut.” Ha urhi, husto nga masasabtan han mga tawo an tagna han Dios nga iginsurat ni Daniel, kondi ha espisipiko la nga panahon nga igintanda han Dios. An anghel nagsaysay: “Lakat ha imo dalan, Daniel; kay an mga polong sinadhan ngan linakrehan ngada ha panahon ha katapusan.” Hin-o an makakasabot han mensahe han Dios? “Waray han mga magraut masabut; kondi hira nga makinaadmanon masabut.” (Daniel 12:4, 8-10) Salit diri iginpapahayag han Dios an kahulogan han pipira nga teksto samtang diri pa naabot an husto nga panahon.
May panahon ba nga nagkaada sayop nga pagsabot an mga Saksi ni Jehova ha pipira nga teksto ha Biblia? Oo. Pero han inabot an panahon basi ipatin-aw han Dios an kahulogan han pipira nga teksto, nagin andam an mga Saksi nga bag-uhon an ira pagsabot. Natoo hira nga sadang nira subaron an mga apostol han Kristo, nga mapainubsanon nga ginbabag-o an ira pagsabot kon gintatadong hira ni Jesus.—Buhat 1:6, 7.
An ideya han bata mahitungod ha kon diin nagtitikang an mga dampog bangin gutiay la nga sayop nga pagsabot. Kondi, importante gud an igintututdo han Biblia. Mapulsanon gud an mensahe hito, salit diri igo nga mangalimbasog an usa nga masabtan ito pinaagi han iya personal la nga pagbasa. Salit pamiling hin bulig basi masabtan mo an imo ginbabasa. Pagpabulig ha mga tawo nga nag-aaram han Biblia nga may mapainubsanon nga disposisyon, nasarig ha baraan nga espiritu han Dios, ngan kombinsido nga nagkikinabuhi na kita ha panahon han kasaysayan diin karuyag han Dios nga masabtan naton an Biblia. Ayaw pag-alang ha pakiistorya ha mga Saksi ni Jehova o ha pagbasa han ira ginsaliksik hin maopay nga mga artikulo ha jw.org nga website. An Biblia nagsasaad: “Kon ikaw magsangpit ha katinoan [o, pagsabot], . . . makakaagi [ka] han paghibaro han Dios.”—Proberbios 2:3-5.