Nakakauyam o nakakarepresko? Hain hito an imo inaabat kon nagbabasa ka han Biblia? An imo baton nadepende gud ha kon paonan-o mo gintatagad an pagbasa. Usisahon naton kon ano an imo mahihimo basi madugangan an imo interes ngan kalipay ha pagbasa.

Pagpili hin hubad nga matataporan ngan moderno an mga pulong. Kon damu an mga pulong nga makuri ngan kadaan na ha imo ginbabasa, posible nga diri ka ganahan ha pagbasa. Salit pamiling hin Biblia nga an mga pulong masayon masabtan ngan makakabantad han imo kasingkasing. Kondi sadang liwat magin maopay ito ngan husto an pagkahubad. *

Pahimulusi an moderno nga teknolohiya. Yana, an Biblia diri la mababasa sugad nga inimprinta nga libro. May mga Biblia nga mababasa ha Internet o mada-download ha kompyuter, tablet, o celfon. May mga bersyon nga may dugang nga mga feature nga mabulig ha imo nga makita dayon an mga bersikulo ha pariho nga topiko o an iba nga mga bersyon. Kon karuyag mo mamati kay ha magbasa, an Biblia aada liwat ha audio format. Damu an nalilipay pagpamati samtang nagbibiyahe, naglalaba, o nagbubuhat hin bisan ano nga nagtutugot ha ira nga mamati. Kay ano nga diri sarihan an pamaagi nga haom ha imo?

Gamita an mga publikasyon nga makakabulig ha pag-aram ha Biblia. Ini nga mga publikasyon makakabulig ha imo nga mas magpahimulos ha imo pagbasa. May mga mapa han mga lugar nga mababasa ha Biblia nga mabulig ha imo nga mahibaroan an mga lokasyon han mga lugar nga imo nabasa, ngan mahanduraw an  mga panhitabo. An mga artikulo sugad han mababasa dinhi hini nga magasin o ha jw.org makakabulig ha imo nga masabtan an damu nga bahin han Biblia.

Iba-ibaha an imo paagi. Kon baga hin mabug-at an pagbasa han Biblia tikang ha tinikangan tubtob ha kataposan, kay ano nga diri mo anay pukawon an imo interes pinaagi ha pagbasa han bahin nga karuyag mo gud? Kon karuyag mo mahibaro mahitungod hin kilala nga mga tawohan ha Biblia, mahimo mo sarihan an pagbasa mahitungod han ira kinabuhi. Mababasa an sampol hini nga pamaagi ha kahon nga “ Usisaha an Biblia Pinaagi ha Pagkilala han mga Tawohan Hito.” O puydi mo sarihan an pagbasa han Biblia uyon ha topiko o ha pagkasunod-sunod han mga panhitabo. Kay ano nga diri sarihan an usa hini nga pamaagi?