PADAYON NGA MAGBANTAY!

2022: Tuig nga Puno hin Kabaraka Ngan Kasamok—Ano an Ginsisiring han Biblia?

I-PLAY

Han 2022, an girra, kakuri ha ekonomiya, ngan mga kalamidad amo an pirme naton nakikita ha mga balita. An Biblia la an makakagsaysay kon ano an karuyag sidngon hini nga mga panhitabo.

An karuyag sidngon han mga panhitabo han 2022

An mga panhitabo ha naglabay nga tuig nagpapakita hin dugang nga ebidensya nga nagkikinabuhi na kita ha gintatawag han Biblia nga “kataposan nga mga adlaw.” (2 Timoteo 3:1) Ito nga peryodo nagtikang han tuig 1914. Pansina kon paonan-o an mga panhitabo hinin bag-o la nagtutuman han mga igintagna han Biblia mahitungod ha aton panahon:

“Mga girra.”—Mateo 24:6.

“An 2022 [amo] an Tuig nga Bumalik an Makaharadlok nga Girra ha Europe.” a

Kitaa an artikulo nga “Gin-atake han Russia an Ukraine.”

“Kakulang hin mga pagkaon.”—Mateo 24:7.

“2022: Tuig nga Duro an Kagutom.” b

Kitaa an artikulo nga “An Girra ha Ukraine Nagpagrabe han Krisis ha Pagkaon ha Bug-os nga Kalibotan.”

“Mga epidemya.”—Lucas 21:11.

“An polio bumalik, nagdamu an kaso han monkeypox, ngan an COVID-19 nagpapadayon la gihapon, iginpapakita hini nga sitwasyon kon ano ka delikado an nakakatapon nga mga sakit ngan kon ano kaluya an mga tawo.” c

Kitaa an artikulo nga “6 ka Milyon nga Namatay ha COVID.”

“Makaharadlok nga mga kiritaon.”—Lucas 21:11.

“Mga heatwave, duro nga huraw, wildfire, ngan mga baha. Diri gud mangangalimtan an summer han 2022 tungod han damu nga kalamidad nga nagresulta hin duro nga kadaot, kamatay hin ginatos ka yukot nga mga tawo, ngan kawad-i hin mga urukyan han minilyon nga mga tawo ha bug-os nga kalibotan.” d

Kitaa an artikulo nga “Waray Kapariho nga Kapaso ha Bug-os nga Kalibotan.”

“Mga kasamok [o, “mga pagrebelde,” ftn.].”—Lucas 21:9.

“Tungod han problema ha ekonomiya, labi na ha pagtikamahal han mga paraliton, an mga tawo nasisina gud ngan nagresulta ito hin mga pagprotesta kontra ha gobyerno han 2022.” e

Kitaa an artikulo nga “Pagtikamahal han mga Paraliton ha Kalibotan.”

Ano an mahitatabo ha sunod nga tuig?

Waray gud maaram ha aton han eksakto nga mahitatabo ha 2023. Pero maaram kita nga ha diri na maiha, an Ginhadian han Dios, o an langitnon nga gobyerno, maghihimo hin dagku nga mga pagbag-o ha tuna. (Daniel 2:44) Wawad-on hito nga gobyerno an tanan nga hinungdan han pag-antos han tawo ngan sisiguruhon hito nga matuman an kaburut-on han Dios dinhi tuna.—Mateo 6:9, 10.

Gin-aaghat ka namon nga sundon an sagdon ni Jesu-Kristo nga “padayon nga magbantay” ha kon paonan-o an mga panhitabo ha kalibotan nagtutuman han mga tagna han Biblia. (Marcos 13:37) Alayon kontaka kami basi mahibaro hin dugang kon paonan-o an Biblia makakabulig ha imo yana ngan kon paonan-o ini makakahatag ha imo ngan ha imo pamilya hin tinuod nga paglaom para ha mas maopay nga kabubuwason.

a AP News, “2022 Was Year the Horror of War Returned to Europe,” ni Jill Lawless, Disyembre 8, 2022.

b World Food Programme, “A Global Food Crises.”

c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” ni Lawrence O. Gostin, JD, Septyembre 22, 2022.

d Earth.Org, “What’s Behind the Record-Breaking Extreme Weather Events of Summer 2022?” ni Martina Igini, Oktubre 24, 2022.

e Carnegie Endowment for International Peace, “Economic Anger Dominated Global Protests in 2022,” ni Thomas Carothers ngan ni Benjamin Feldman, Disyembre 8, 2022.