Hinin bag-o la, an mga world leader, scientist, ngan technologist nagkomento parte ha mahihimo han artificial intelligence (AI). Nagsiring hira nga may-ada ito kapulsanan, pero nababaraka liwat hira han posibilidad nga gamiton ito ha sayop nga paagi.

•   “An AI usa han pinakamapulsanon nga teknolohiya yana, may potensyal ito nga mapaopay pa an kinabuhi han mga tawo . . . Pero may potensyal liwat ito nga ibutang kita ha kadelikadohan, manginlabot ha aton katungod pantawo ngan personal nga pagkinabuhi, ngan paluyahon an aton pagtapod ha demokrasya.”—Kamala Harris, vice president han United States, Mayo 4, 2023.

•   “Oo an artificial intelligence (AI) makakapaopay ha teknolohiya ha medisina, pero posible liwat ito makadaot ha aton pisikal ngan emosyonal nga kahimsog ha iba nga paagi,” siring han grupo han mga doktor ngan eksperto ha medisina ha iba-iba nga nasud nga ginpapangunahan ni Dr. Frederik Federspiel, ha artikulo nga iginpublikar han Mayo 9, 2023, ha BMJ Global Health. a

•   “An AI nagagamit na ha pagpasarang hin sayop nga impormasyon. Diri mag-iiha, posible mawad-an hin trabaho an mga tawo tungod hito. An pipira nga nagtatrabaho may kalabotan ha teknolohiya nababaraka gud nga ha tiarabot posible manelikado an mga tawo tungod han AI.”—The New York Times, Mayo 1, 2023.

 Panahon la an makakagsumat kon an AI gagamiton ba ha maopay o ha maraot. Ano an ginsisiring han Biblia?

 Iginpapakita han Biblia kon kay ano nga an mga tawo diri makakasiguro nga an ira mga imbensyon gagamiton la ha kaopayan.

1.  1. Bisan kon may maopay nga intensyon an mga tawo, diri nira mahibabaroan an negatibo nga epekto han ira ginbubuhat.

   •   “May dalan nga baga hin husto ha usa nga tawo, pero kamatayon ngay-an an kataposan hito.”—Proberbios 14:12.

2.  2. Diri makukontrol han usa nga tawo kon paonan-o gagamiton—o sayop nga gagamiton han iba—an iya imbensyon.

   •   ‘Kinahanglan ko bayaan an akon gintrabaho para ha tawo nga masunod ha akon. Ngan hin-o an maaram kon magigin maaramon ba hiya o diri? Bisan pa hito, hiya an magtatag-iya han ngatanan nga butang nga akon nakuha ha ilarom han adlaw pinaagi han duro nga pangalimbasog ngan han kinaadman.’—Eclesiastes 2:18, 19.

 Ginpapabug-atan hini kon kay ano nga kinahanglan naton an giya han aton Maglalarang.

 An aton Maglalarang nagsasaad nga diri gud niya tutugotan an mga tawo o an bisan ano nga teknolohiya nga ginhimo han tawo nga magbungkag han tuna o han katawohan.

•   “An tuna nagpapabilin ha waray kataposan.”—Eclesiastes 1:4.

•   “An magtadong magtatag-iya han tuna, ngan maukoy hira dida ha waray kataposan.”—Salmo 37:29.

 Pinaagi han Biblia, iginhahatag han aton Maglalarang an giya nga magriresulta hin may seguridad ngan mamurayawon nga kabubuwason. Basi mahibaro hin dugang pa mahitungod ha ginsisiring han Biblia, basaha an mga artikulo nga “May-ada ba Masasarigan nga Giya Para ha Mas Maopay nga Kabubuwason?” ngan “Makakaasa Ka sa Isang Magandang Kinabukasan.”