Sumala ha World Health Organization (WHO), han Mayo 23, 2022, may-ada na 6.27 ka milyon nga tawo an namatay tungod han COVID-19. Kondi, ha news release nga iginpublikar ha Mayo 5, 2022, ginbabanabana han WHO nga mas damu pa hito an namatay. Nagsiring ito nga han 2020 ngan 2021, “an bug-os nga kadamu han namatay tungod han COVID-19 nga pandemya o konektado hito . . . ginbabanabana nga mga 14.9 ka milyon.” May-ada ba ginsisiring an Biblia mahitungod hinin makasurubo nga mga trahedya?

•    Igintagna ni Jesus nga magkakaada “mga epidemya,” ha panahon nga gintatawag nga an “kataposan nga mga adlaw.”—Lucas 21:11; 2 Timoteo 3:1.

 An tagna ni Jesus natutuman yana. Basi mahibaro hin dugang pa, basaha an artikulo nga “Ano an Tigaman han ‘Kataposan nga mga Adlaw,’ o ‘Panahon han Kataposan’?”

•    “An Dios han ngatanan nga pagliaw . . . nagliliaw ha aton ha ngatanan naton nga pagsari.”—2 Corinto 1:3, 4.

 Damu ha mga namatayan hin hinigugma an naliaw ha mensahe han Biblia. Mahibaro hin dugang pa ha mga artikulo nga “Paglampos ha Pagtaguminatay—An Imo Mahimo Buhaton Yana” ngan “An Pinakamaopay nga Bulig ha mga Nagtataguminatay.”

•    “Kumanhi unta an imo Ginhadian. Matuman unta an imo kaburut-on dinhi ha tuna sugad han ha langit.”—Mateo 6:10.

 Diri na maiha sisiguruhon han “Ginhadian han Dios” nga “waray residente nga masiring: ‘May sakit ako.’” (Marcos 1:14, 15; Isaias 33:24) Kitaa an video nga Ano an Ginhadian han Dios? ngan mahibaro mahitungod hinin langitnon nga gobyerno ngan kon ano an bubuhaton hito.

 Gin-aaghat ka namon nga mahibaro hin dugang mahitungod ha ginsisiring han Biblia basi ikaw ngan an imo pamilya magpahimulos tikang ha maaramon nga sagdon ngan magpakalilipay nga saad hito.