PADAYON NGA MAGBANTAY!

Gindus-og Paabanti han mga Syentista an Oras han Doomsday Clock—Ano an Ginsisiring han Biblia?

I-PLAY

Han Enero 24, 2023, nagsiring an mga syentista nga an Doomsday Clock a mas hirani na ha katutnga han gab-i, nga nagsisimbolo ha kataposan han kalibotan.

“Han Martes, an ‘Doomsday Clock’ nga nagsisimbolo ha mga peligro nga magbubungkag ha mga tawo mas hirani na gud ha katutnga han gab-i tungod ha girra ha Ukraine, kahadlok ha girra nuklear, ngan nagtitikaraot nga klima han tuna.”—AFP International Text Wire.
“Iginpahibaro han mga syentista nga han Martes, an ‘Doomsday Clock’ gindus-og paabanti hin 90 ka segundo antes magkatutnga han gab-i—nga nagpapasabot nga an mga tawo hirani na gud ha kabungkagan.”—ABC News.
“Usa nga grupo han mga syentista ha iba-iba nga nasud an nagpahamangno nga an mga tawo nga nabubuhi yana mas naninelikado gud kay ha kakan-o pa man.”—The Guardian.

Hirani na ba mabungkag an mga tawo ngan an aton planeta? Angay ba kita mahadlok ha kon ano an mahitatabo ha tiarabot? Ano an ginsisiring han Biblia?

Kon ano an mahitatabo ha tiarabot

Sumala ha Biblia, “an tuna nagpapabilin ha waray kataposan” ngan may mga tawo nga ‘maukoy dida ha waray kataposan.’ (Eclesiastes 1:4; Salmo 37:29) Salit an mga tawo diri makakagbungkag han tuna o makakahimo nga diri na maukyan an aton planeta.

Pero an Biblia may gin-uunabi nga kataposan. Pananglitan, nasiring ito nga “an kalibotan mawawara.”—1 Juan 2:17.

Basi mahibaroan kon ano an karuyag sidngon han Biblia kon nag-uunabi ito mahitungod han kataposan han kalibotan, basaha an artikulo nga “Malapit Na Ba ang Katapusan ng Mundo? Sinasabi Ba sa Bibliya na Magugunaw ang Mundo?”
Basi mahibaro kon ano an ginsisiring han Biblia mahitungod han pagkasunod-sunod han tiarabot nga mga panhitabo ha kalibotan, basaha an artikulo nga “Kailan ang Katapusan ng Mundo?”

Magpabilin nga positibo

An Biblia makakabulig ha aton nga magpabilin nga positibo bisan pa han mga problema yana ha kalibotan. Paonan-o?

An Biblia naghahatag ha aton hin praktikal nga sagdon. (2 Timoteo 3:16, 17) Pananglitan, basaha an artikulo nga “Kung Paano Mababawasan ang Pag-aalala” basi mahibaroan kon paonan-o an Biblia makakabulig ha imo nga magpabilin nga positibo bisan pa han mga problema ha kinabuhi.
An Biblia naghahatag ha aton hin masasarigan nga paglaom para ha tiarabot. (Roma 15:4) Eksakto an pagkasaysay hito ha kon ano an aton malalaoman yana ngan ha tiarabot, nga makakabulig ha aton nga magpabilin nga may pagsarig samtang gin-aatubang an mga panhitabo ha kalibotan.

Basi bug-os ka nga magpahimulos ha Biblia, nalilipay kami ha pag-imbitar ha imo nga testingan yana an amon libre nga programa han pag-aram ha Biblia.

a “An Doomsday Clock usa nga simbolo nga nagpapahamangno ha publiko nga hirani na gud kita ha pagbungkag han aton kalibotan pinaagi han peligroso nga mga teknolohiya nga ginhimo han tawo mismo. Usa ito nga pagkompara, nga nagpapahinumdom han mga peligro nga kinahanglan naton sulbaron kon karuyag naton magpabilin hini nga planeta.”—Bulletin of the Atomic Scientists.