•   “Iginreport han China an ‘pinakagrabe’ nga heatwave ngan an ikatulo han pinakamapaso nga summer nga nairekord ha ira kasaysayan.”—The Guardian, Septyembre 7, 2022.

•   “An duro nga huraw ha Greater Horn of Africa ginbabanabana nga magpapadayon pa ha ikalima ka tuig hito.”—UN News, Agosto 26, 2022.

•   “An kadak-an nga bahin han Europa naninelikado nga makaeksperyensya hin duro nga huraw, ngan posible ito an pinakagrabe nga huraw han naglabay nga 500 ka tuig.”—BBC News, Agosto 23, 2022.

 Ginbabanabana han damu nga eksperto nga an sugad nga mga huraw magpapadayon ngan magtitikagrabe pa. Magkakaada pa ba maopay nga tiarabot? Ano an ginsisiring han Biblia?

 Ini an igintagna han Biblia mahitungod ha aton panahon:

•   “Ha iba-iba nga mga lugar magkakaada kakulang hin mga pagkaon.”—Lucas 21:11.

 Kasagaran nga nagkakaada kakulang hin pagkaon tungod han duro nga huraw. An kakulang hin pagkaon, ngan an pag-antos ngan kamatayon nga resulta hito katumanan han tagna han Biblia.—Pahayag 6:6, 8.

 Iginsusumat han Biblia an nangunguna nga rason kon kay ano nga nagtitikagrabe an huraw. Nasiring ito:

•   “Diri para ha tawo bisan an paggiya han iya pitad.”—Jeremias 10:23.

 Nangangahulogan ini nga an mga tawo diri maglalampos ha “paggiya han [ira] pitad,” o pagmando ha ira kalugaringon. An ira sayop nga mga desisyon kasagaran nga nagriresulta hin duro nga huraw ngan kakulang hin tubig.

•   An kadam-an nga mga syentista nauyon nga an ginbubuhat han mga tawo an hinungdan han global warming, salit nagtitikadamu an naaapektohan han duro nga huraw ha bug-os nga kalibotan.

•   An kahakog ngan an mga balaud nga ginhimo nga waray hunahunaa an magigin epekto hito nagresulta hin kakalbo han kagurangan, polusyon, ngan sayop nga paggamit han natural nga mga bahandi han tuna. Tungod hito, namimeligro nga mawara an pipira nga gintitikangan han aton suplay han tubig.

 Pero an Biblia naghahatag hin paglaom.

 An Biblia nagsasaad nga susolusyonan han Dios an kakulang hin tubig yana. Paonan-o?

1.  1. ‘Bubungkagon han Dios an mga nagbubungkag han tuna.’ (Pahayag 11:18) Iya wawad-on an usa nga hinungdan han kakulang hin tubig yana—an magraot ngan hakog nga mga tawo nga an mga buhat nakakadaot ha palibot.—2 Timoteo 3:1, 2.

2.  2. “An tuna nga nauga ha kapaso magigin tubigon nga lugar nga puno hin tangbo.” (Isaias 35:1, 6, 7) Wawad-on han Dios an kadaot nga resulta han duro nga huraw ngan ini nga planeta hihimoon niya nga paraiso nga hura hin tubig.

3.  3. “Imo gin-aataman an tuna, ginhihimo ito nga mabungahon gud ngan matambok hinduro.” (Salmo 65:9) Tungod han bendisyon han Dios, an tuna magkakaada hin hura ngan masustansya nga pagkaon ngan malimpyo nga tubig para ha ngatanan.