An mga ngula yana mga 70 ka milyon na ha bug-os nga kalibotan, ngan damu ha ira an nakikigkomunikar gamit an usa han sobra 200 nga sign language. Makasurubo, an mga ngula kasagaran nga nag-aantos tungod han diri patas nga pagtratar han iba, sugad han iginpapakita han masunod:

•   “Ha bug-os nga kalibotan, kasagaran nga ginbabalewaray an mga katungod han mga ngula ngan mga bungol.”—National Association of the Deaf (U.S.).

•   “An mga ngula ha pobre nga mga nasud usa han pinakapobre nga mga tawo ha kalibotan, ngan makuri para ha ira nga magkaada tama nga edukasyon, trabaho, ngan impormasyon.”—World Federation of the Deaf.

 Ano an inaabat han Dios ha mga ngula? Ano an ginsisiring han Biblia parte ha mga ngula? Ngan paonan-o hira ginbubuligan yana han mga Saksi ni Jehova?

An Pagkita han Dios ha mga Ngula

 Iginpapakita han Biblia nga gin-aataman ni Jehova a nga Dios an mga ngula. Karuyag niya nga trataron hira hin patas ngan makapahimulos ha edukasyon nga iya igintatagana.

 Teksto: “Ayaw igsumpa an tawo nga bungol.”—Levitico 19:14.

 Teksto: “An Dios waray pinaurog.”—Buhat 10:34.

 Teksto: “Ginlibot ni Jesus an ngatanan nga syudad ngan mga baryo, . . . ngan nagsasangyaw han maopay nga sumat han Ginhadian.”—Mateo 9:35.

 Teksto: Ginhimo pa ngani ni Jesus “nga makabati an mga bungol ngan makayakan an mga ngula.”—Marcos 7:37.

 Teksto: “Maaabrihan an mga talinga han mga bungol.”—Isaias 35:5.

 Karuyag sidngon: Igintagna ni Jehova nga an mga bungol makakabati.—Isaias 29:18.

Kon Paonan-o Ginbubuligan Yana han mga Saksi ni Jehova an mga Ngula

 Iginsasangyaw han mga Saksi ni Jehova ha mga ngula ha bug-os nga kalibotan an mensahe han Dios nga paglaom. Paonan-o namon ito ginhihimo? Nagpupublikar kami hin Biblia ngan mga video para ha pag-aram han Biblia ha sobra 100 nga sign language. Nag-o-offer liwat kami hin pag-aram ha Biblia ngan nag-oorganisar hin Kristiano nga mga katirok ha sign language. Igintatagana namon ini ngatanan nga waray bayad para hadton naruruyag han bulig han Dios. Kay ano? Kay nagsugo hi Jesus: “Ginkarawat niyo nga waray bayad, ihatag nga waray bayad.”—Mateo 10:8.

 Puydi mo makita ini nga mga publikasyon online o ma-download ha imo gadyet pinaagi han masunod:

 JW.ORG. I-click an language icon ha igbaw han bisan ano nga page han website basi makabiling ka hin mga impormasyon ha espisipiko nga sign language.

 JW Library Sign Language app. Ig-install inin libre nga app ha imo gadyet, ngan mahimo ka maka-download o maka-stream hin sign-language nga mga video.

Ano nga mga Bulig Parte ha Pag-aram ha Biblia an Amon Igintatagana?

 An Biblia ha sign language. An Bag-o nga Kalibotan nga Hubad han Baraan nga Kasuratan ha American Sign Language amo an pinakasiyahan nga kompleto nga sign-language nga Biblia ha bug-os nga kalibotan. An bug-os nga Bag-o nga Kalibotan nga Hubad o an bahin hito available na yana ha damu nga sign language, ngan damu pa nga linggwahe an nahidudugang kada tuig. (Basi makita an lista han mga linggwahe o makita an Biblia online, kitaa an kahon nga “ An Bag-o nga Kalibotan nga Hubad han Biblia ha Sign Language.”)

•   Kitaa an video nga The Complete New World Translation Is Available in ASL basi mahibaroan kon paonan-o namon ginhihimo an Biblia ha sign language.

•   Para mas ma-enjoy an pagbasa ha Biblia, ig-install an JW Library Sign Language app. Ini nga app mabulig ha imo nga espisipiko nga makapili hin mga bersikulo ha sign-language nga Biblia.

•   Hira Dmytro ngan Vita mga ngula nga mga kag-anak, pero an ira mga anak diri mga ngula. Kitaa kon paonan-o nagpapahimulos an ira pamilya ha pagkita hin Biblia kada adlaw ha sign language.

 Mga video nga nagtututdo parte ha Biblia. Nagpupublikar an mga Saksi ni Jehova hin mga video ha sign language basi buligan an mga tawo nga masabtan ngan maiaplikar an praktikal nga mga sagdon han Biblia para ha mga . . .

•   Mag-asawa ngan pamilya

•   Tin-edyer ngan mga batan-on

•   Kabataan

 One-on-one nga interactive nga pag-aram ha Biblia. Hibaroi an mensahe han Biblia ha sign language ha kalugaringon mo nga kalaksihon ha bulig han usa nga personal nga instruktor. Pag-request nga ipakita ha imo kon paonan-o ginhihimo an libre nga pag-aram ha Biblia.

 Hi Jeson Senajonon naukoy ha Pilipinas. Kitaa kon paonan-o an amon pag-aram ha Biblia nakabulig ha iya nga magkaada duok nga pakigsangkay ha Dios.

 Hi Mario Antúnez pastor hadto ha usa nga singbahan ha Honduras. Hibaroi kon paonan-o niya nabilngan an mga baton han iya mga pakiana ha Biblia samtang iya ito iginsasaysay ha iya eksperyensya nga “Mas Damu an Akon Pakiana Kay han Baton.”

 Mga katirok ngan mga event. May-ada kami mga kongregasyon ngan mga grupo ha sign language ha bug-os nga kalibotan, diin an mga ngula nagkakatirok basi mag-aram ngan magsingba kada semana. Kada tuig, nag-oorganisar liwat kami hin dagku nga mga event ha sign language basi pag-adman an Biblia. Ha amon mga katirok ngan mga event, may tactile interpreting para hadton mga ngula ngan buta. Naghihimo liwat kami hin braille nga mga publikasyon nga waray bayad.

•   Pamiling hin kongregasyon nga hirani ha imo.

•   Mahibaro ha amon tinuig nga mga kombensyon ngan mga asembleya.

•   Tambong ha Memoryal han kamatayon ni Jesus, nga amo an amon pinakaimportante nga okasyon han tuig.

 Hi José Luis Ayala naukoy ha Mexico. Igin-anak hiya nga ngula ngan ha urhi nagin buta. Hibaroi kon paonan-o hiya ginbuligan basi magin epektibo nga magturutdo han Biblia.