“Madagmit kita nga tipakadto ha duro nga kadaot han klima. Paglunod han dagku nga syudad. Waray kapariho nga mga heat wave. Makaharadlok nga mga bagyo. Kakulang hin tubig ha damu nga lugar. Kawara han usa ka milyon nga klase hin mga tanom ngan hayop. Diri ini istorya la o pagpasobra. Ini an ginsisiring ha aton han mga syentista nga magigin resulta han aton mga patakaran yana may kalabotan ha paggamit han enerhiya.”—Pahayag ni António Guterres, secretary-general han United Nations, mahitungod ha report han Intergovernmental Panel on Climate Change han Abril 4, 2022.

 “Nagpapahamangno an mga syentista nga diri mag-iiha, an haros 423 nga national park [ha United States] madadaot tungod ha pagbag-o han klima, labi na kay masayon gud la ito maapektohan han pagpaso han temperatura. An magraot nga butang nga mahimo mahitabo pariho han mga kalamidad nga mababasa ha Biblia: sunog ngan baha, natutunaw nga mga yelo, nagtitikahitaas nga lebel han dagat, ngan mga heat wave.”—“Flooding Chaos in Yellowstone, a Sign of Crises to Come,” The New York Times, Hunyo 15, 2022.

 Masusulbad pa ba an mga problema ha palibot? Kon oo, hin-o an magsusulbad hito? Pansina an ginsisiring han Biblia.

 An Biblia nasiring nga ‘bubungkagon [han Dios] an mga nagbubungkag han tuna.’ (Pahayag 11:18) May tulo nga igintututdo ha aton ini nga bersikulo ha Biblia:

1.  1. An ginbubuhat han mga tawo magriresulta hin daku nga kadaot ha tuna.

2.  2. Matatapos an pagbungkag han tuna.

3.  3. An Dios, diri an mga tawo, an magsusulbad han mga problema ha palibot.

 An Biblia nasiring nga “an tuna nagpapabilin ha waray kataposan.” (Eclesiastes 1:4) Pirme ito uukyan.

•   “An magtadong magtatag-iya han tuna, ngan maukoy hira dida ha waray kataposan.”—Salmo 37:29.

 Bug-os nga ibabalik an maopay nga kahimtang han aton planeta.

•   “An kamingawan ngan an uga nga tuna magrarayhak, ngan an disyerto nga kapatagan magkakalipay ngan mamumukad pariho han tanom nga safron.”—Isaias 35:1.