An girra ha Ukraine pati na an mga epekto han climate change, nagigin hinungdan han kakulang han suplay han pagkaon ha bug-os nga kalibotan. Apektado hini labi na an pobre nga mga nasud diin damu nga tawo an nakukurian pagkaada igo nga pagkaon.

•   “An produksyon ngan pagsuplay han pagkaon apektado tungod han kasamok, climate change, paghitaas han presyo han enerhiya ngan iba pa.”—António Guterres, UN secretary-general, Hulyo 17, 2023.

•   “Ginbabanabana han mga eksperto nga an pag-atras han Russia ha grain export agreement mas magpapagrabe pa ha bug-os-kalibotan nga krisis ha pagkaon ngan pagtikamahal han pagkaon ha pobre nga mga nasud, labi na ha North Africa ngan ha Middle East.”—Atalayar.com, Hulyo 23, 2023.

 Hibaroi kon ano an ginsisiring han Biblia parte ha krisis ha pagkaon ngan tiarabot.

•   Nagtagna hi Jesus: “An usa nga nasud makikig-away ha lain nga nasud ngan an usa nga ginhadian makikig-away ha lain nga ginhadian, ngan magkakaada kakulang hin mga pagkaon.”—Mateo 24:7.

•   An libro han Biblia nga Pahayag naghuhulagway han upat nga simboliko nga mangangabayo. An usa hito nga mangangabayo nagrirepresentar ha girra. Ginsusundan hiya hin usa pa nga nagrirepresentar han gutom, usa nga peryodo han panahon nga limitado an pagkaon ngan ginbabaligya ito ha hitaas gud nga presyo. “Hinkit-an ko in maitom nga kabayo. An nasakay hini nga kabayo nagdadara hin timbangan. Hinbatian ko in tingog . . . nga nagsiring, ‘Usa ka litro nga trigo ngan tulo ka litro nga sebada an mapapalit han usa ka adlaw nga suhol han nagtrabaho.’”—Ginpadayag 6:5, 6, An Maupay nga Sumat.

 Ini nga mga tagna han Biblia parte ha krisis ha pagkaon natutuman yana ha aton panahon nga gintatawag han Biblia nga “kataposan nga mga adlaw.” (2 Timoteo 3:1) Para mahibaro hin dugang parte ha “kataposan nga mga adlaw” ngan ha upat nga mangangabayo nga gin-uunabi han Pahayag, kitaa an video nga Nagbag-o an Kalibotan Tikang han 1914 ngan basaha an artikulo nga “An Upat nga Mangangabayo—Hin-o Hira?”

•   May praktikal nga mga sagdon an Biblia nga makakabulig ha aton nga maatubang an magkuri nga mga kahimtang, upod na an pagtikamahal han pagkaon o bisan pa ngani an kakulang hin pagkaon. Kitaa an pipira nga ehemplo hito ha artikulo nga “Paano Ka Makakapag-adjust Kapag Nabawasan ang Iyong Kita?”

•   An Biblia naghahatag liwat ha aton hin paglaom nga magigin maopay an kahimtang. Nagsasaad ito nga maabot an panahon nga “magkakaada hin hura nga lugas ha tuna” ngan an ngatanan magkakaada hura nga pagkaon. (Salmo 72:16) Para mahibaro hin dugang parte hini nga paglaom ha tiarabot ngan kon kay ano nga makakasarig ka hito, basaha an artikulo nga “Makakaasa Ka sa Isang Magandang Kinabukasan.”