Usa ka ba han minilyon nga naapektohan han grabe nga kalamidad? An grabe nga kahimtang han panahon ngan an nakakadaot nga mga epekto hito naieksperyensyahan naton ha iba-iba nga paagi. An mga bagyo ngan buhawi, kasagaran nga nagriresulta hin storm surge, pagbaha, ngan makusog nga hangin nga nagriresulta hin kadaot. Tungod han magkusog nga uran nagkakaada hin mga landslide ngan an mga kidlat nagriresulta hin mga wildfire. Daku liwat an kadaot nga epekto han mga El Niño, heat wave, ngan pag-uran hin yelo.

 Ha damu nga bahin han kalibotan, an grabe nga mga kalamidad nagtitikaagsob ngan nagtitikaduro. An International Federation of Red Cross and Red Crescent Societies nagreport: “Nagtitikadamu liwat an apektado han mga kalamidad tungod kay agsob magkaada baha, bagyo, ngan duro nga huraw, salit damu nga tawo an namamatay, nawawarayan hin trabaho ngan mga urukyan.”

 Ha sugad nga mga panhitabo, an mga tawo nag-aantos diri la ha pisikal kondi ha emosyon liwat. Bangin matruma hira tungod han kawad-i hin mga panag-iya, balay, o kamatyi pa ngani hin hinigugma.

 Kon nag-aantos ka han mga epekto han grabe nga kalamidad, mabubuligan ka han Biblia nga makailob. Naghahatag ito hin pagliaw, paglaom, ngan praktikal nga sagdon nga nakabulig ha damu nga biktima han grabe nga mga kalamidad. (Roma 15:4) Ginbabaton liwat hito an importante nga pakiana nga ginhihinunahuna han damu: Kay ano nga gintutugotan han Dios nga mahitabo ito—ginsisirotan ba niya ako?

 Igintututdo han Biblia nga diri an Dios an responsable han pag-antos han mga tawo. Nagpapasarig ito nga “an Dios diri masasarihan hin magraot nga mga butang ngan diri liwat niya ginsasarihan an bisan hin-o.” (Santiago 1:13) Karuyag sidngon diri hiya an nagpapahinabo han grabe nga mga kalamidad nga naieksperyensyahan han mga tawo yana.

 Oo, mababasa ha Biblia nga may mga panahon nga gumamit an Dios hin natural nga mga kalamidad basi sirotan an magraot nga tawo. Pero adto nga mga panhitabo diri pariho ha grabe nga mga kalamidad yana, nga tigda la nahitatabo ngan naaapektohan an mag-opay ngan an magraot. Ha kabaliktaran, iginpapakita han Biblia nga pirme ginpuproteksyonan han Dios an mga inosente, naghahatag hin abanse nga pahamangno, ngan iginsasaysay kon kay ano nga ginbubuhat niya an usa nga butang. Pananglitan, iginsaysay han Dios kon kay ano nga magpapahinabo hiya hin Baha ha bug-os nga kalibotan ha panahon ni Noe, naghatag hin abanse nga pahamangno antes niya buhaton ito, ngan ginproteksyonan hi Noe ngan an iya pamilya.—Genesis 6:13; 2 Pedro 2:5.

 Basi mahibaro hin dugang kon kay ano nga masisiring naton nga an mga kalamidad yana diri sirot tikang ha Dios, kitaa an artikulo nga “Ano an Ginsisiring han Biblia Mahitungod ha mga Kalamidad?”

 Iginsusumat han Biblia nga hi Jehova a nga Dios mahigugmaon ngan may empatiya. Pansina an masunod nga nakakaliaw nga mga teksto.

•   Isaias 63:9: “Durante han ngatanan nira nga kasakitan nasasakit [an Dios].”

   Karuyag sidngon: Nasasakitan hi Jehova nga makita an mga tawo nga nag-aantos.

•   1 Pedro 5:7: “Nagtatagad hiya ha iyo.”

   Karuyag sidngon: Karuyag ni Jehova nga maghingaopay ka.

 An gugma ngan empatiya ni Jehova nagpapagios ha iya. Igintatagana niya an pagliaw pinaagi ha praktikal nga sagdon han Biblia ngan an masasarigan nga paglaom nga ha tiarabot diri na magkakaada hin grabe nga mga kalamidad.—2 Corinto 1:3, 4.

 Iginsusumat han Biblia an saad ni Jehova basi kita “tagan hin kabubuwason ngan hin paglaom.” (Jeremias 29:11) Karuyag niya nga ma-enjoy han mga tawo an kinabuhi ha paraiso nga tuna, diri magkinabuhi nga nahahadlok ha kalamidad.—Genesis 1:28; 2:15; Isaias 32:18.

 Papahinaboon ito han Dios pinaagi han iya Ginhadian, usa nga gobyerno ha langit nga ginpapangunahan ni Jesus. (Mateo 6:10) Hi Jesus may-ada han ginkikinahanglan nga kinaadman ngan gahum basi wad-on an grabe nga mga kalamidad. Han nakanhi hi Jesus ha tuna iginpakita niya nga may-ada hiya gahum nga kontrolon an kahimtang han panahon. (Marcos 4:37-41) Magmamando hiya nga may pagsabot ngan kinaadman, tututdoan an mga tawo kon paonan-o aatamanon an palibot ngan magkikinabuhi ha paagi nga diri magdadaot hito. (Isaias 11:2) Ha pagmando ni Jesus, an mga tawo diri na gud makakaeksperyensya hin grabe nga mga kalamidad.

 Bangin magpakiana ka, ‘San-o gagamiton ni Jesus an iya gahum ha pagkontrol han kahimtang han panahon?’ Basi mabaton ito, kitaa an artikulo nga “San-o Mamandoan han Ginhadian han Dios an Tuna?”

 An sagdon han Biblia makakabulig ha imo antes, ha panahon, ngan katapos han grabe nga kalamidad.

•   Antes han kalamidad: Pag-andam nga gumios dayon.

   An ginsisiring han Biblia: “An maaramon nga tawo nakakakita han peligro ngan natago, pero an mga waray eksperyensya nagpapadayon la ngan nag-aantos han mga resulta.”—Proberbios 22:3.

   Karuyag sidngon: Hunahunaa hin abanse an mga kalamidad nga posible mahitabo ha iyo lugar basi makagios ka dayon ngan maproteksyonan an imo pamilya.

   Eksperyensya: “Han adlaw nga nagkaada wildfire, andam gud kami. Nadara namon an amon mga emergency go bag, mga medisina, ngan mga bado. An mga tawo ha amon palibot nalilisang ngan diri hira maaram han ira bubuhaton. Pero may-ada kami han ngatanan nga amon ginkikinahanglan, ngan tungod hito mapasalamaton gud ako!”—Tamara, California, U.S.A.

•   Ha panahon han kalamidad: Pagpokus ha kon ano an mas importante.

   An ginsisiring han Biblia: “Bisan kon an usa nga tawo may kahuraan, an mga butang nga iya gintatag-iya diri naghahatag ha iya hin kinabuhi.”—Lucas 12:15.

   Karuyag sidngon: Mas importante an kinabuhi kay ha mga panag-iya.

   Eksperyensya: “Han nagkaada Bagyo nga Lawin b naruba an amon balay, diri ako maaram kon ano an akon bubuhaton. Pero usa han akon mga ginbuhat amo an pag-ampo hin sinsero kan Jehova nga Dios. Napamalandong ko nga materyal la nga mga butang an nawara ha amon, diri an amon kinabuhi.”—Leslie, Philippines.

•   Katapos han kalamidad: An yana la anay an problemaha, ayaw an buwas.

   An ginsisiring han Biblia: “Ayaw gud kamo kabaraka mahitungod han sunod nga adlaw, kay an sunod nga adlaw may kalugaringon nga mga kabaraka.”—Mateo 6:34.

   Karuyag sidngon: Ayaw sobra paghinunahunaa an mga posible mahitabo.

   Eksperyensya: “Han nabahaan an akon balay tungod han Bagyo nga Irma, damu gud an akon kinahanglan pagdesisyonan ngan naistres gud ako. Ginpangalimbasogan ko nga sundon an sagdon han Biblia nga diri magkinabaraka mahitungod han sunod nga adlaw. Nakita ko nga ha bulig ni Jehova, makakaya ko an mga butang nga baga’n imposible para ha akon.”—Sally, Florida, U.S.A.

 Para ha dugang nga praktikal nga mga suhestyon, kitaa an artikulo nga “Kon May Umabot nga Kalamidad—Paonan-o Makakatalwas?”