An United Nations nagreport:

•   Tikang han Oktubre 7 tubtob Oktubre 23, 2023, an girra ha Gaza ngan Israel may namatay na nga sobra 6,400 ngan nasamaran nga 15,200, kadam-an ha ira mga sibilyan. Dugang pa, ginatos ka yukot an napiritan nga bumaya ha ira mga balay.

•   Tubtob han Septyembre 24, 2023, an girra han Russia ngan Ukraine may namatay na nga 9,701 nga sibilyan ngan nasamaran nga 17,748 ha Ukraine.

 Ano nga paglaom an iginhahatag han Biblia ha mga nag-aantos tungod han girra?

 Igintagna han Biblia nga ‘papaundangon [han Dios] an mga girra ha bug-os nga tuna.’ (Salmo 46:9) Gagamiton niya an langitnon nga gobyerno, o ginhadian, basi saliwnan an ngatanan nga gobyerno han tawo. (Daniel 2:44) Wawad-on han Ginhadian han Dios an pag-antos han katawohan.

 Pansina an bubuhaton ni Jesu-Kristo, an Hadi han Ginhadian han Dios:

•   “Iya tatalwason an pobre nga nangangaraba para hin bulig, sugad man an ubos nga tawo ngan an bisan hin-o nga waray parabulig. Malolooy hiya ha ubos nga tawo ngan ha pobre, ngan an kinabuhi han mga pobre iya tatalwason. Iya tatalwason hira tikang ha panalumpigos ngan kamadarahog.”—Salmo 72:12-14.

 Pinaagi han iya Ginhadian, wawad-on han Dios an ngatanan nga kasakit ngan pag-antos nga resulta han girra ngan kamadarahog.

•   “Papahiron niya an ngatanan nga luha ha ira mga mata, ngan mawawara na an kamatayon, pati an kabidoan, pagtangis, ngan kasakit. An daan nga mga butang naglabay na.”—Pahayag 21:4.

 Diri na maiha, manginginlabot an Ginhadian han Dios ha mga buruhaton ha tuna. Igintagna han Biblia an “mga girra ngan hin mga sumat mahitungod han mga girra” nga nahitatabo yana. (Mateo 24:6) Ini ngan an iba pa nga panhitabo nagpapakita nga nabubuhi na kita ha “kataposan nga mga adlaw” han pagmando han tawo.—2 Timoteo 3:1.