Damu nga kasamok ha politika an nahitatabo ha kalibotan.

•   Ha Mexico, an pagpatay ha 39 nga kandidato ha politika, nga amo an pinakadamu ha bug-os nga kasaysayan, upod an iba pa nga klase han kasamok ha politika nakapabaraka gud ha mga tawo ha panahon han 2023-2024 nga eleksyon.

•   Ha Europe, diri pa la maiha, nagkaada hin damu nga insidente hin kasamok ha politika upod na an plano nga pagpatay han primero ministro han Slovakia han Mayo 15, 2024.

•   Nabaraka an mga tawo ha United States tungod han ikaduha nga pag-ikarapatay gud ha presidente hadto nga hi Donald Trump han Septyembre 15, 2024.

 Kay ano nga duro an kasamok ha politika? Matatapos pa ba ito? Ano an ginsisiring han Biblia?

 Igintagna han Biblia nga ha aton panahon, nga gintatawag nga “an kataposan nga mga adlaw,” damu nga tawo an magkakaada batasan nga magriresulta hin kamadarahog ngan diri pagkauruyon.

•   “Ha kataposan nga mga adlaw maabot an peligroso nga mga panahon nga makuri pakiangayan. Kay an mga tawo magigin . . . diri mapasalamaton, diri maunungon, . . . diri naruruyag ha bisan ano nga pakigsabot, . . . mapintas, . . . mga traydor, matig-a an ulo, mahilig magrakudaku.”—2 Timoteo 3:1-4.

 Igintagna liwat han Biblia nga an mga kasamok sugad han pagrebelde ngan politikal nga kasamok magigin bahin hini nga panahon. (Lucas 21:9, footnote) Pero an kasamok ha politika ngan pagkabahin-bahin diri magpapadayon.

 Iginsaysay han Biblia nga an ngatanan nga gobyerno han tawo babalyoan han Dios han iya kalugaringon nga langitnon nga gobyerno.

•   “An Dios han langit mag-iestablisar hin ginhadian. Ngan . . . dudugmukon ngan bubungkagon hini ito ngatanan nga ginhadian, ngan ini gud la an magpapadayon ha kadayonan.”—Daniel 2:44.

 Tungod ha Ginhadian han Dios, magkakaurosa gud an mga tawo ngan magkakaada kamurayawan ha bug-os nga kalibotan.

•   An Magmarando hito, hi Jesu-Kristo, gintatawag nga “Prinsipe han Kamurayawan,” ngan sisiguruhon niya nga “an kamurayawan magigin waray kataposan.”—Isaias 9:6, 7.

•   Bisan yana, an mga nasasakopan hito nahibabaro pagkinabuhi hin mamurayawon. Sugad nga resulta, an Biblia nasiring: “Ira papandayon an ira mga espada basi magin mga punta han arado ngan an ira mga bangkaw basi magin mga garab. An nasud diri mag-aalsa hin espada kontra ha iba nga nasud, ngan diri na hira mag-aaram hin pakiggirra.”—Isaias 2:3, 4.

 Basi mahibaro hin dugang, basaha an artikulo nga “Ano an Bubuhaton han Ginhadian han Dios?” ngan kitaa an video nga Ano an Ginhadian han Dios?