Han Oktubre 9, 2024, may nakakaalarma nga report an World Wildlife Fund parte ha epekto ha mga hayop tungod han mga ginbubuhat han tawo. Nagsiring ito nga “ha naglabay nga 50 ka tuig (1970-2020), naibanan an kadamu han mga hayop hin 73%.” An report nagpahamangno: “Diri pagpasobra an pagsiring nga an kabubuwason han Tuna nakadepende ha kon ano an mahitatabo ha masunod nga lima ka tuig.”

 Normal la nga damu nga tawo an nakalasan hito nga report. Hinigugma naton an aton maopay nga planeta ngan nangangalas kita nga makita nga nag-aantos an mga hayop. Naabat kita hin sugad hito tungod kay karuyag han Dios nga atamanon naton an mga hayop.—Genesis 1:27, 28; Proberbios 12:10.

 Salit bangin maghunahuna ka, ‘Kaya ba naton proteksyonan an mga hayop ha tuna? Ano an ginsisiring han Biblia?’

 Bisan kon buhaton naton an ngatanan para masalbar an mga hayop, diri ta ito mahihimo. An Dios gud la an makakahimo hito. Igintagna han Biblia ha Pahayag 11:18 nga ‘bubungkagon [han Dios] an mga nagbubungkag han tuna.’ Ini nga teksto nagtututdo ha aton hin duha nga punto:

1.  1. Diri tutugotan han Dios an mga tawo nga bug-os nga gub-on o bungkagon an tuna.

2.  2. Magios an Dios ha diri na maiha. Kay ano nga nakasiring kita hito? Kay mas naninelikado gud yana nga mapoo an mga hayop tungod han ginbubuhat han mga tawo kon ikompara hadto.

 Ano an bubuhaton han Dios para masolusyonan ini nga problema? Gagamiton niya an iya langitnon nga gobyerno, o Ginhadian, basi mandoan an bug-os nga tuna. (Mateo 6:10) Pinaagi hito nga gobyerno, an masinugtanon nga mga tawo tututdoan ngan babansayon ha pag-ataman ngan pagprotektar ha mga hayop ha bug-os nga tuna.—Isaias 11:9.