Ha bug-os nga kalibotan, damu nga tawo an apektado han nakakadaot nga mga baha. Pansina ini nga mga report:

•   “Ha sulod hin pipira ka adlaw, nairekord han sentro nga syudad han China an pinakamakusog nga uran hito, tikang han naglabay nga diri maminos 140 ka tuig katapos bahaon hin . . . 744.8 milimetro (29.3 pulgada) nga uran butnga han Sabado ngan Mierkoles.”—AP News, Agosto 2, 2023.

•   “Ha Huwebes nga amo an ikaduha ka adlaw han bagyo nga Khanun, nagdara ito hin makusog nga uran ngan hangin ha sur nga bahin han Japan. Sugad nga resulta, may namatay hin diri maminos duha ka tawo. . . . An bagyo ginlalaoman nga magpapauran hin mga 0.6 metro (2 piye) ha kabukiran ha sentro han Taiwan.”—Deutsche Welle, Agosto 3, 2023.

•   “An pagbaha han weekend [ha Nova Scotia] resulta han pinakamakusog gud nga uran nga nahitabo ha rehiyon han Atlantic Canada tikang han naglabay nga 50 ka tuig.”—BBC News, Hulyo 24, 2023.

 Ano an ginsisiring han Biblia parte hito nga mga panhitabo?

 Igintututdo han Biblia nga nagkikinabuhi kita ha peryodo han panahon nga gintatawag nga “kataposan nga mga adlaw.” (2 Timoteo 3:1) Igintagna ni Jesus nga ha aton panahon, makakakita kita hin “makaharadlok nga mga kiritaon,” o panhitabo. (Lucas 21:11) An climate change usa han nangunguna nga hinungdan han mas patigda-tigda, mas nagtitikaagsob, ngan mas nagtitikagrabe nga mga kahimtang han panahon.

 Nasiring an Biblia nga an damu nga makaharadlok nga mga butang nga nahitatabo yana ha tuna, ha pagkamatuod naghahatag ha aton hin rason para maglaom. Kay ano? Hi Jesus nagsiring: “Kon makita na niyo nga nahitatabo ini nga mga butang, hibaroi nga hirani na an Ginhadian han Dios.”—Lucas 21:31; Mateo 24:3.

 An mga panhitabo yana nagpapakita nga ha diri na maiha an Ginhadian han Dios bug-os nga magkukontrol han natural nga mga elemento, sugad han sikolo han tubig.—Job 36:27, 28; Salmo 107:29.

 Basi mahibaro hin dugang kon paonan-o an Ginhadian han Dios magpapahiuli han maopay nga kahimtang han tuna, kitaa an artikulo nga “Sino ang Magliligtas sa Lupa?”