Han Mayo 19, 2022, an United Nations Security Council nahibaro tikang ha 75 nga higtaas-an-ranggo nga mga opisyal nga “an krisis ha pagkaon ha bug-os nga kalibotan, nga resulta han COVID-19 nga pandemya ngan climate change, mas naggrabe pa gud tungod han girra ha Ukraine salit damu nga lugar ha kalibotan an namimeligro nga magkaada gutom.” Waray pag-iha, an The Economist nagsiring nga “tungod han girra, an kalibotan diin damu na an problema magkakaada damu pa nga tawo nga magugutom.” An Biblia nagtagna nga an sugad nga krisis ha pagkaon mahitatabo ha aton panahon, pero naghahatag liwat ito hin bulig basi makaya naton ito.

•    Hi Jesus nagtagna: “An usa nga nasud makikig-away ha lain nga nasud ngan an usa nga ginhadian makikig-away ha lain nga ginhadian, ngan magkakaada kakulang hin mga pagkaon.”—Mateo 24:7.

•    An libro han Biblia nga Pahayag naghuhulagway hin upat nga simboliko nga mangangabayo. An usa hito nga mangangabayo nagrirepresentar ha mga girra. Ginsusundan hiya hin usa pa nga mangangabayo nga nagrirepresentar ha gutom, ha panahon nga magigin makuri nga makakuha hin pagkaon ngan magmamahal an mga presyo hito. “Hinkit-an ko in maitom nga kabayo, an nasakay hini nga kabayo nagdadara hin timbangan. Hinbatian ko in tingog . . . nga nasiring, ‘Usa ka litro nga trigo ngan tulo ka litro nga sebada an mapapalit han usa ka adlaw nga suhol han nagtrabaho.’”—Ginpadayag 6:5, 6, An Maupay nga Sumat.

 Ini nga mga tagna han Biblia mahitungod ha mga kakulang hin pagkaon natutuman na yana ha panahon nga gintatawag han Biblia nga “kataposan nga mga adlaw.” (2 Timoteo 3:1) Basi mahibaro hin dugang mahitungod ha “kataposan nga mga adlaw” ngan ha pagdalagan han upat nga mangangabayo han Pahayag, kitaa an video nga Nagbag-o an Kalibotan tikang han 1914 ngan basaha an artikulo nga “An Upat nga Mangangabayo—Hin-o Hira?”

•    An Biblia may praktikal nga mga sagdon nga makakabulig ha aton nga makaya an makuri nga mga kahimtang, sugad han pagmahal han presyo han mga pagkaon o kakulang pa ngani hin pagkaon. Kitaa an pipira nga ehemplo ha artikulo nga “Paano Ka Makakapag-adjust Kapag Nabawasan ang Iyong Kita?”

•    An Biblia naghahatag liwat hin paglaom nga magtitikaopay gihap an mga kahimtang. Nagsasaad liwat ito nga maabot an panahon nga “magkakaada hin hura nga lugas ha tuna” ngan hin damu nga pagkaon para ha ngatanan. (Salmo 72:16) Basi mahibaro hin dugang mahitungod ha paglaom nga iginhahatag han Biblia para ha tiarabot ngan kon kay ano nga makakasarig ka hito, basaha an artikulo nga “Makakaasa Ka sa Isang Magandang Kinabukasan.”