Han Mayo 24, 2022, usa nga makasurubo gud nga trahedya an nahitabo ha gutiay nga bungto han Uvalde, ha Texas, U.S.A. Sumala ha The New York Times, “ginpatay han usa nga lalaki nga may pusil an 19 nga kabataan ngan duha nga titser . . . ha Robb Elementary School.”

 Makasurubo, komon na la an sugad nga makaharadlok nga mga panhitabo. An USA Today nagreport nga ha United States pa la, “may-ada 249 nga pamusil ha eskwelahan han naglabay nga tuig—mas damu ito kay ha bisan ano nga tuig tikang han 1970.”

 Kay ano nga nahitatabo an sugad nga kamadarahog? Paonan-o naton maiilob an sugad nga magraot nga mga buhat? May paglaom pa ba nga mawara an kamadarahog? Ito nga mga pakiana ginbabaton han Biblia.

•    Ginhuhulagway han Biblia an aton panahon sugad nga “kataposan nga mga adlaw” diin damu nga tawo an “waray kinaiya nga gugma” ngan “mapintas,” salit nagbubuhat hira hin madarahog ngan magraot gud nga mga butang. An sugad nga mga tawo “mas magtitikaraot pa gud.” (2 Timoteo 3:1-5, 13) Basi mahibaro hin dugang, basaha an artikulo nga “Inihula Ba ng Biblia na Magiging Ganito ang Ugali ng mga Tao sa Ngayon?”

 Damu nga tawo an nagpapakiana, ‘Kay ano nga diri ginpupugngan han Dios an makasurubo nga mga trahedya sugad han pamusil ha eskwelahan?’ Basi mahibaroan an baton han Biblia, basaha an artikulo nga “Kay Ano nga Nahitatabo an Magraot nga Butang ha Mag-opay nga Tawo?”

•    “An ngatanan nga iginsurat hadto iginsurat ha pagtutdo ha aton, basi . . . pinaagi han pagliaw tikang ha Kasuratan magkaada kita paglaom.”—Roma 15:4.

 An mga prinsipyo ha Biblia makakabulig ha imo nga makapailob ha kamadarahog hini nga kalibotan. Para ha dugang nga impormasyon, kitaa an magasin nga Gumising! nga may ulohan nga “Magwawakas Pa Kaya ang Karahasan?”

 Para ha mga suhestyon kon paonan-o mabubuligan han mga kag-anak an ira mga anak nga diri sobra nga maapektohan ha makaharadlok nga mga balita, basaha an artikulo nga “Ang Masasamang Balita at ang Iyong mga Anak.”

•    “Iya tatalwason hira tikang ha panalumpigos ngan kamadarahog.”—Salmo 72:14.

•    “Ira papandayon an ira mga espada basi magin mga punta han arado ngan an ira mga bangkaw basi magin mga garab. An nasud diri mag-aalsa hin espada kontra ha iba nga nasud, ngan diri na hira mag-aaram hin pakiggirra.”—Micas 4:3.

 Bubuhaton han Dios an mga butang nga diri kaya buhaton han mga tawo. Bubungkagon han iya gobyerno ha langit an ngatanan nga armas ngan wawad-on an ngatanan nga kamadarahog. Para mahibaro hin dugang kon ano an bubuhaton han Ginhadian han Dios, basaha an artikulo nga “Ha Pagmando han Ginhadian han Dios ‘Magkakaada Kahuraan hin Kamurayawan.’”