Han Hulyo 2022, nahitabo ha iba-iba nga lugar ha kalibotan an makangingirhat nga mga pamusil:

•   “Han ginpatay an pinakakilala nga politiko ha Japan [an Prime Minister hadto nga hi Shinzo Abe], nataranta an bug-os nga nasud ngan nangirhat an mga tawo ha bug-os nga kalibotan, labi na kay diri damu an madarahog nga mga krimen hini nga nasud ngan istrikto an mga balaud dinhi may kalabotan ha paggamit hin pusil.”—Hulyo 10, 2022, The Japan Times.

•   “Mga taga-Denmark nangirhat ha pamusil nga nakamatay hin tulo ha shopping mall ha Copenhagen.”—Hulyo 4, 2022, Reuters.

•   “South Africa: 15 an patay katapos han pamusil ha bar ha bungto han Soweto.”—Hulyo 10, 2022, The Guardian.

•   “Sobra 220 an namatay ha pamusil ha U.S. ha panahon han holiday ha weekend han Hulyo 4.”—Hulyo 5, 2022, CBS News.

 May paglaom pa ba nga matapos an sugad nga kamadarahog? Ano an ginsisiring han Biblia?

 Gintatawag han Biblia an aton panahon nga an “kataposan nga mga adlaw,” usa nga panahon diin an mga tawo magigin mapintas, brutal, ngan mabangis. (2 Timoteo 3:1, 3) An sugad nga kamadarahog nagigin hinungdan nga an mga tawo magkinabuhi nga may kahadlok. (Lucas 21:11) Pero nagsasaad an Biblia nga diri na maiha, matatapos an kamadarahog ngan an “katawohan maukoy ha murayaw nga urukyan, ha talwas nga mga urukyan ngan ha murayaw nga mga pahuwayan.” (Isaias 32:18) Paonan-o matatapos an kamadarahog?

 Wawad-on han Dios an magraot ngan bubungkagon an ngatanan nga armas.

•   “An magraot pupoohon tikang ha tuna.”—Proberbios 2:22.

•   “Ginpapaundang [han Dios] an mga girra ha bug-os nga tuna. Iya ginbabari an pana ngan gin-uutod-utod an bangkaw; iya ginsusunog ha kalayo an mga karomata han kasundalohan.”—Salmo 46:9.

 Wawad-on han Dios an mga hinungdan han kamadarahog pinaagi ha pagtutdo ha mga tawo nga magkinabuhi nga mamurayawon.

•   “Diri hira mandadaot o manruruba ha akon bug-os nga baraan nga bukid, kay an tuna mapupuno gud han kahibaro mahitungod kan Jehova sugad la nga an dagat nalulukop hin katubigan.”—Isaias 11:9.

•   Yana pa la, gintututdoan na han Dios an mga tawo ha bug-os nga kalibotan nga likayan an kamadarahog ngan an paggamit hin mga armas, nga ‘pandayon an ira mga espada basi magin mga punta han arado ngan an ira mga bangkaw basi magin mga garab.’—Micas 4:3.

 Basi mahibaro hin dugang mahitungod han saad han Biblia nga kalibotan diin waray na kahadlok, basaha an artikulo nga “Wala Nang Takot—Posible Kaya Ito?”

 Basi mahibaro hin dugang mahitungod han permanente nga solusyon ha kamadarahog, basaha an artikulo nga “Kapayapaan sa Lupa sa Wakas!”