Ha bug-os nga kalibotan damu nga nasud an nagkakabahin-bahin tungod ha politika. Sumala ha surbey han Pew Research Center han 2022, “ha 19 nga ginsurbey nga nasud, 65% han mga adulto an nasiring nga ha ira nasud duro gud an diri pagkauruyon han mga tawo nga nasuporta ha iba-iba nga partido.”

 Napansin mo ba nga nagtitikaduro an pagkabahin-bahin ha politika ha iyo lugar? Ano an hinungdan? May solusyon pa ba? Pansina an ginsisiring han Biblia.

 Igintagna han Biblia nga ha aton panahon, nga gintatawag nga “kataposan nga mga adlaw,” damu nga tawo an magkakaada pamatasan nga magpapakuri han pagkaada pagkaurosa.

•   “Ha kataposan nga mga adlaw maabot an peligroso nga mga panahon nga makuri pakiangayan. Kay an mga tawo magigin mahigugmaon ha ira kalugaringon, . . . diri naruruyag ha bisan ano nga pakigsabot.”—2 Timoteo 3:1-3.

 Bisan kon damu nga tawo an nangangalimbasog gud para maglampos an gobyerno, diri ito nahitatabo. An mga tawo nga magkaiba an opinyon nakukurian ngan imposible pa ngani nga magkaurosa ha pagsulbad han mga problema. An mga resulta nagpapamatuod ha maiha na nga ginsiring han Biblia.

•   “Ginmamandoan han tawo an iya igkasi-tawo ha iya ikakadaot.”—Eclesiastes 8:9.

 Pero iginsusumat han Biblia an solusyon—usa nga gobyerno nga an nagmamando makakawara han mga problema nga nagpapakuri ha mga tawo yana.

 Iginpapakilala han Biblia an usa nga lider nga kwalipikado gud: hi Jesu-Kristo. Hi Jesus may gahum, awtoridad, ngan hingyap nga pahinaboon an pagkaurosa ngan kamurayawan ha ngatanan nga katawohan.

•   “Ha iya mga adlaw an magtadong mag-uuswag, ngan an kamurayawan magigin hura.”—Salmo 72:7.

•   “An ngatanan nga nasud magsiserbi ha iya.”—Salmo 72:11.

 Hi Jesus an pinakamaopay nga lider kay hinigugma niya ngan karuyag niya buligan an mga tawo, labi na adton mga biktima han kawaray-hustisya.

•   “Iya tatalwason an pobre nga nangangaraba para hin bulig, sugad man an ubos nga tawo ngan an bisan hin-o nga waray parabulig. Malolooy hiya ha ubos nga tawo ngan ha pobre, ngan an kinabuhi han mga pobre iya tatalwason. Iya tatalwason hira tikang ha panalumpigos ngan kamadarahog.”—Salmo 72:12-14.

 Mahibaro hin dugang mahitungod ha Ginhadian han Dios, an langitnon nga gobyerno nga ginmamandoan ni Jesus. Kitaa kon paonan-o ka makakapahimulos hito ngan kon paonan-o mo ito masusuportaran.

•   Kitaa an video nga Ano an Ginhadian han Dios?

•   Basaha an artikulo nga “Ginhadian han Dios—Usa nga Gobyerno nga Waray Korapsyon.”