Han Domingo, Nobyembre 20, 2022, nahuman an COP27 United Nations Climate Change Conference. Bisan kon an mga lider ngan mga eksperto nga inatender ha conference inuyon nga maghatag hin kwarta ha pobre nga mga nasud basi mabuligan hira nga maatubang an mga epekto han kalamidad, damu an nauyon nga diri ini makakapugong han climate change.

•   “Nalilipay ako ha desisyon nga magkaada pundo para ha pagbulig ha mga apektado,” siring ni António Guterres, secretary-general han United Nations, han Nobyembre 19, 2022. “Pero maaram kami nga kulang pa ito . . . An aton planeta aada pa ha kritikal nga kahimtang.”

•   “An kalibotan naninelikado la gihapon tungod han climate change.”—Mary Robinson, presidente hadto han Ireland ngan dati nga UN High Commissioner for Human Rights, Nobyembre 20, 2022.

 An mga batan-on labi nga nababaraka ha tiarabot han aton planeta. Kondi, posible ba magkaurosa an mga nasud ngan tumanon an ira saad nga solusyonan an climate change? Ano an ginsisiring han Biblia?

 Iginsusumat han Biblia nga bisan pa han sinsero nga pangalimbasog han mga nasud, limitado gud la an ira mahihimo. Pansina inin duha nga rason:

•   “An butang nga baliko diri matatadong.”—Eclesiastes 1:15.

   Karuyag sidngon: Limitado la an mahihimo han mga gobyerno tungod kay an mga tawo waray laranga basi mandoan an ira kalugaringon. (Jeremias 10:23) Magkaurosa man an mga nasud, diri la gihapon nira masusolusyonan an mga problema han kalibotan, bisan ano pa nga pangalimbasog.

•   “Kay an mga tawo magigin mahigugmaon ha ira kalugaringon, mahigugmaon ha kwarta, . . . diri naruruyag ha bisan ano nga pakigsabot.”—2 Timoteo 3:2, 3.

   Karuyag sidngon: Husto nga igintagna han Biblia nga damu nga tawo yana an magigin makikalugaringon ngan diri makikig-urosa para ha kaopayan han ngatanan.

 Kondi, an kabubuwason han aton planeta diri nakadepende ha mga saad han mga gobyerno han tawo. An Dios nagtagana hin maopay gud nga Magmarando han kalibotan, hi Jesu-Kristo. Ini an siring han Biblia mahitungod ha iya:

•   “An gobyerno ibubutang ha iya sugbong. An iya ngaran tatawagon nga Maaramon nga Magsaragdon, Gamhanan nga Dios, Waray Kataposan nga Amay, Prinsipe han Kamurayawan.”—Isaias 9:6, footnote.

 Hi Jesus an Hadi han Ginhadian han Dios, o gobyerno ha langit. (Mateo 6:10) May-ada hiya han gahum, kinaadman, ngan han hingyap nga atamanon an aton planeta ngan an mga naukoy dida hito. (Salmo 72:12, 16) Ha iya pagmando, bubungkagon hini nga gobyerno ha langit an mga “nagbubungkag han tuna” ngan ipapahiuli an maopay nga kahimtang han planeta.—Pahayag 11:18; Isaias 35:1, 7.

 Basi mahibaro hin dugang mahitungod ha permanente nga solusyon han nakakadaot nga climate change, basaha an artikulo nga “Climate Change at ang Kinabukasan Natin—Ano ang Sinasabi ng Bibliya?”