Ha bug-os nga kalibotan, damu nga tawo nga nag-aangkon nga sumurunod ni Jesu-Kristo an nakikigbahin gud ha politika. An iba nangangalimbasog nga ipakilala an ira relihiyoso nga mga gintotoohan ngan suruklan ha moral pinaagi ha pagsuporta ha usa nga kandidato o partido. Salit agsob gamiton han mga politiko an mga popular nga isyu parte ha moral ngan kahimtang han komunidad basi makuha an suporta han mga relihiyoso nga tawo. Komon na la para ha mga lider han relihiyon nga kumandidato ha usa nga posisyon ha gobyerno. Ngan ha pipira nga nasud, an usa nga gintatawag nga “Kristiano” nga relihiyon bangin kilalahon pa ngani sugad nga opisyal nga relihiyon han nasud.

 Para ha imo, angay ba makigbahin ha politika an mga sumurunod ni Jesu-Kristo? Mahibabaroan mo an baton pinaagi ha pag-usisa han ehemplo ni Jesus. Hiya nagsiring: “Iginpakita ko an susbaranan para ha iyo, nga sugad la han akon ginbuhat ha iyo, ito liwat an kinahanglan niyo buhaton.” (Juan 13:15) Ano nga susbaranan an iginpakita ni Jesus may kalabotan ha politika?

 Waray. Hi Jesus waray makigbahin ha politika hini nga kalibotan.

 Hi Jesus waray maghingyap hin posisyon ha gobyerno. Nagdumiri hiya nga magin magmarando han tawhanon nga mga gobyerno han igintanyag ha iya ni Satanas nga Yawa “an ngatanan nga ginhadian han kalibotan.” (Mateo 4:8-10) a Ha iba nga higayon, han nakita han mga tawo nga hi Jesus may mga kalidad han pagin maopay nga lider, ginpirit nira hiya nga sumulod ha politika. An Biblia nagsiring: “Hi Jesus, nga maaram nga maabot hira ngan kukuhaon hiya basi himoon nga hadi, kinadto utro ha bukid nga nag-uusahan.” (Juan 6:15) Hi Jesus waray magpadara ha karuyag han mga tawo. Lugod, nagdumiri hiya nga makigbahin ha politika.

 Hi Jesus waray gindapigan ha mga isyu ha politika. Pananglitan, ha panahon ni Jesus an mga Judio nadiri ha pagbayad hin buhis ha gobyerno han Roma ngan para ha ira diri ito patas. Han nangalimbasog hira nga mahibaroan an panhunahuna ni Jesus hini nga isyu, waray hiya makigdebate kon tama ba nga magbayad hin buhis. Nagsiring hiya ha ira: “Ihatag ha Cesar an mga butang han Cesar, pero ihatag ha Dios an mga butang han Dios.” (Marcos 12:13-17) Nagpabilin hiya nga neutral ha isyu han politika pero iginpakita niya nga an buhis nga gin-aaro han gobyerno han Roma, nga nagrirepresentar ha Cesar, kinahanglan ihatag. Ngan igintutdo liwat niya nga limitado la an pagpasakop ha sekular nga awtoridad. Diri dapat ihatag ha gobyerno an mga butang nga para la ha Dios, upod na hito an debosyon ngan pagsingba.—Mateo 4:10; 22:37, 38.

 Ginsuportaran ngan gintutdo ni Jesus an Ginhadian han Dios, usa nga langitnon nga gobyerno. (Lucas 4:43) Waray hiya makigbahin ha politika kay maaram hiya nga an Ginhadian han Dios, diri an gobyerno han tawo, an makakatuman han karuyag han Dios para ha tuna. (Mateo 6:10) Maaram gud hiya nga diri gagamiton han Ginhadian han Dios an gobyerno han tawo, kondi sasaliwnan ito.—Daniel 2:44.

 Waray. Ginsugot han mga sumurunod ni Jesus an iya sugo nga diri magin “bahin han kalibotan.” (Juan 15:19) Ginsunod nira an iya ehemplo ngan nagpabilin nga diri bahin ha politika hini nga kalibotan. (Juan 17:16; 18:36) Imbes nga makigbahin ha politika, ginsunod nira an sugo ni Jesus—an pagsangyaw ngan pagtutdo han Ginhadian han Dios.—Mateo 28:18-20; Buhat 10:42.

 Gin-una han siyahan-siglo nga mga Kristiano ha ira kinabuhi an pagsugot ha Dios, pero maaram liwat hira nga dapat respetuhon an sekular nga awtoridad. (Buhat 5:29; 1 Pedro 2:13, 17) Ginsunod nira an mga balaud ngan nagbayad hin mga buhis. (Roma 13:1, 7) Bisan kon waray hira makigbahin ha politika, nagpahimulos hira ha legal nga mga proteksyon ngan serbisyo nga ginhatag han gobyerno.—Buhat 25:10, 11; Filipos 1:7.

 Klaro nga iginpakita ha Biblia nga waray hi Jesus makigbahin ha politika o an iya mga sumurunod hadto. Tungod hito, sugad nga mga Kristiano, an mga Saksi ni Jehova ha bug-os nga kalibotan nagpapabilin gud nga neutral. Pariho ha siyahan-siglo nga mga Kristiano, ira ginbubuhat an buruhaton nga ginsugo ni Jesus—iginsasangyaw nira “inin maopay nga sumat han Ginhadian.”—Mateo 24:14.