Daku gud an nagagasto ha girra.

•   “An militar ha bug-os nga kalibotan naggasto hin $2.2 trilyon para ha damu nga girra, nga amo an pinakadaku nga gasto ha girra.”—The Washington Post, Pebrero 13, 2024.

 Pero diri la kwarta an nawawara tungod han mga girra. Pansina ini nga usa nga ehemplo: An girra ha Ukraine.

•   Mga sundalo. An pipira nga eksperto natoo nga haros 500,000 na nga sundalo an namatay o nasamaran ha girra nga nagtikang duha ka tuig na an naglabay.

•   Mga sibilyan. Sumala ha United Nations, sobra 28,000 na an namatay o nasamaran. Pero usa nga hitaas nga opisyal han UN an nagsiring: “Diri posible nga maihap an kadamu han kinabuhi nga naguba tungod han girra.” a

 Grabe gud an pag-antos han mga tawo tungod han girra ngan araway nga nahitatabo ha kalibotan.

•   114 ka milyon. An kadamu han tawo nga nag-ebakwit tungod han girra ngan kamadarahog ha bug-os nga kalibotan tubtob han Septyembre 2023.

•   783 ka milyon. An kadamu han tawo nga waray igo nga pagkaon. “An girra la gihapon an nangunguna nga hinungdan han kakulang hin pagkaon, ngan ha bug-os-kalibotan, 70 porsyento han mga tawo nga waray igo nga pagkaon an naukoy ha mga lugar nga apektado han girra ngan kamadarahog.”—World Food Programme.

 Matatapos pa ba an girra? Magkakaada pa ba kamurayawan? Mawawara pa ba an kapobrehan ngan magkakaada na igo nga pagkaon para ha ngatanan? Ano an ginsisiring han Biblia?

 Igintagna ha Biblia an mga girra ha kalibotan, ngan gin-gamit an usa nga mangangabayo ha pagsimbolo hito.

•   “May lain pa nga ginawas, usa nga kabayo nga pula an kolor, ngan an nasakay hito gintagan hin awtoridad ha pagkuha han kamurayawan ha tuna basi patayon nira an usa kag usa, ngan gintagan hiya hin daku nga espada.”—Pahayag 6:4.

 Ito nga simboliko nga mangangabayo ginsusundan hin duha pa nga nagrirepresentar hin gutom ngan kamatayon tungod han peste o iba pa nga mga hinungdan. (Pahayag 6:5-8) Basi mahibaro hin dugang pa parte hini nga tagna ha Biblia ngan kon kay ano nga makakasiguro kita nga natutuman ini ha aton panahon, basaha an artikulo nga “An Upat nga Mangangabayo—Hin-o Hira?”

 Diri na mag-iiha, an mga butang ha kalibotan diri na gagamiton ha girra. Pero, diri ini mahitatabo tungod han pangalimbasog han tawo. An Biblia nasiring:

•   An Dios “[magpapaundang han] mga girra ha bug-os nga tuna.”—Salmo 46:9.

•   Wawad-on han Dios an magraot nga epekto tungod han girra. “Papahiron niya an ngatanan nga luha ha ira mga mata, ngan mawawara na an kamatayon, pati an kabidoan, pagtangis, ngan kasakit. An daan nga mga butang naglabay na.”—Pahayag 21:4.

•   Sisiguruhon han Dios nga magkakaada waray kataposan nga kamurayawan an ngatanan. “An akon katawohan maukoy ha murayaw nga urukyan, ha talwas nga mga urukyan ngan ha murayaw nga mga pahuwayan.”—Isaias 32:18.

 Sumala ha mga tagna ha Biblia, an mga girra ngan iba nga mga panhitabo nga aton nakikita yana nagpapakita nga ini nga kamurayawan hirani na naton maeksperyensyahan.

 Paonan-o papahinaboon han Dios ini nga kamurayawan? Bubuhaton niya ini pinaagi han iya langitnon nga gobyerno, o Ginhadian. (Mateo 6:10) Para mahibaro kon ano ini nga Ginhadian ngan kon paonan-o ini makakaapekto ha imo, kitaa an video nga Ano an Ginhadian han Dios?