Ha bug-os nga kalibotan, damu nga tawo an interesado ha pagin vegan.

•   “An pagin vegan usa nga paagi han panhunahuna ngan pagkinabuhi diin ginhihimo han mga tawo an ngatanan nira nga mahihimo basi malikyan an pagdaot o paggamit ha mga hayop sugad nga pagkaon, bado, o iba pa.”—The Vegan Society.

 Labot la han ira pagpaid ha mga hayop, an pipira nga mga tawo nagin vegan tungod kay karuyag nira mapauswag an palibot, ira kahimsog, o tungod han ira gintotoohan.

•   “An pagin vegan iba kay ha kadam-an nga klase hin diet, kay kasagaran nga ginhuhunahuna ito han mga tawo sugad nga usa nga pagtoo, desisyon may kalabotan ha moral, ngan usa nga paagi basi magin mas maopay an kalibotan.”—Britannica Academic.

 An pagin vegan ba amo an solusyon ha mga problema ha tuna? Ano an ginsisiring han Biblia?

 Iginpapakita han Biblia nga para ha aton Maglalarang, hi Jehova nga Dios, a an mga tawo mas labaw kay ha mga hayop ngan gintagan niya hira hin awtoridad ha ira. (Genesis 1:27, 28) Ha urhi, gintugotan han Dios nga magin pagkaon han mga tawo an mga hayop. (Genesis 9:3) Pero diri niya ginkukonsinter an maraot nga pagtratar ha mga hayop.—Proberbios 12:10.

 Sumala ha Biblia, personal nga desisyon an pagkaon hin karne. b Ha pagkita han Dios an aton ginpipili nga pagkaon diri nakakahimo ha aton nga mas maopay ha iba. (1 Corinto 8:8) Diri naton dapat hukman an usa ha iya ginpipili nga kaunon.—Roma 14:3.

 Iginpapakita han Biblia nga an aton paagi han pagkinabuhi diri makakasulbad ha mga problema hini nga kalibotan. An kadam-an nga problema hito tikang ha sistema ha politika, sosiedad, ngan ekonomiya, nga waray bisan hin-o nga makakasulbad. An Biblia nasiring:

•   “An butang nga baliko diri matatadong.”—Eclesiastes 1:15.

 Susulbaron han aton Maglalarang an mga problema naton yana. Iginhulagway han Biblia ha simboliko nga paagi kon ano an iya hihimoon.

•   “Ngan nakita ko an usa nga bag-o nga langit ngan usa nga bag-o nga tuna; kay an daan nga langit ngan an daan nga tuna naglabay na, ngan an dagat waray na.”—Pahayag 21:1.

 Sasaliwnan han Dios an mga gobyerno han tawo, o “daan nga langit,” hin “bag-o nga langit,” nga amo an iya gobyerno o langitnon nga Ginhadian. Pinaagi hito wawad-on an “daan nga tuna,” nga amo an magraot, ngan magmamando ito ha “bag-o nga tuna,” o adton andam magpasakop ha awtoridad hito.

 Pinaagi la ha pagmando han Ginhadian han Dios an mga tawo mahibabaro nga magkinabuhi nga mamurayawon kaupod an mga hayop ngan respetuhon an palibot.—Isaias 11:6-9.