Usa han eksayting nga ginpamulat han mga Saksi ni Jehova yana nga tuig amo an pagrelis han Episode 1 han An Maopay nga Sumat Sumala kan Jesus. Minilyon na an nagkita hito. Ngan siyahan pa la ito ha 18 nga episode! Ano an nahitatabo ha luyo han kamera basi magin posible ini nga mga serye han video, ngan paonan-o ka nakakasuporta hito nga mga pangalimbasog?

 Ha Australasia branch, diin kaurogan nga ginsu-shooting an mga serye han Maopay nga Sumat, mga 50 tubtob 80 ka tawo an aadto ha kada eksena. a May kabugtoan nga nag-aandam han paniudto, pangiklop ngan isnak para ha ngatanan nga aktor ngan ha iba pa nga nabulig han pelikula. Abanse nga ginpaplano kon ano an aandamon nga mga pagkaon. “Napalit kami hin mga pagkaon ha iba-iba nga suplayer basi an amon mapalit maopay an kalidad ngan barato an presyo,” siring ni Esther nga nagtatrabaho ha Food Service Department. “Pirme namon gin-a-adjust an kadamu han amon ginluluto basi masiguro nga waray makakarag nga pagkaon.” Kada adlaw, mga upat ka dolyar (U.S) an nagagasto para ha pagkaon ha kada tawo.

 Diri la pagkaon an kinahanglan han mga aktor ngan han iba pa nga nabulig han pelikula. Kinahanglan liwat nira hin proteksyon tikang ha mapaso hinduro nga adlaw. Kay masirak ha Australia ngan may-ada didto hitaas nga lebel han ultraviolet radiation. Basi malikayan ito nga duro nga kapaso ngan kakapoy, an maduruto nga mga production assistant naghimo hin mga tent ngan mga cooling station, ngan ginsiguro nira nga may-ada mga sunscreen, mga payong, ngan tubig nga maiinom. Hi Kevin, nga nagtatrabaho ha Audio/Video Services nagsiring: “Kaurogan hini nga mga production assistant mga commuter Bethelite. Mapainubsanon ngan malipayon nga ginbubuhat nira ini ngan an iba pa nga toka. Diri gud maglalampos ini nga proyekto kon waray hira.”

 Diri ngatanan nga eksena ginsu-shooting ha mga pasilidad han branch office kay diri ito magigin reyalistiko. Salit kinahanglan kumadto ha iba nga lokasyon. Basi masubad an eksena ha panahon han Biblia, diin dapat waray mga linya hin kuryente, sementado nga mga kalsada, ngan moderno nga mga balay, kinahanglan magbiyahe an mga aktor ngan iba pa nga nabulig ha paghimo han pelikula ha higrayo nga lugar. An ira mga costume, mga props, ngan mga equipment dapat maikarga hin maopay ngan maibiyahe ngadto ha lokasyon han shooting. Antes magtikang an shooting, ginsisiguro han mga assistant production coordinator nga may-ada mga generator, maiinom nga tubig, ngan mga CR. An mga aktor ngan iba pa nga bulig ha paghimo han pelikula ginpapaukoy ha hirani nga balay han kabugtoan, ha mga trailer, o ha mga hotel.

 An pag-shooting ha iba nga lugar magasto gud, makapoy, ngan nagkikinahanglan hin damu nga panahon para ha ngatanan nga kaapi han proyekto. Salit han 2023, gin-aprobaran han Nagmamando nga Lawas an pagpalit hin video wall nga nagkakantidad hin 2.5 milyon ka dolyar (U.S.) basi makahimo hin background nga baga hin aadto ka na ha iba nga lugar. Ini nga teknolohiya nagamit hin high-resolution nga mga video screen ngan may-ada ito mga lighting nga puydi ma-adjust basi magin reyalistiko an background nga sugad hin nag-shooting hira ha tinuod nga lugar. Sugad nga resulta, nalilikayan an magasto nga pag-shooting ha iba nga lokasyon. Hi Darren, nga membro han Branch Committee han Australasia nagsiring: “An pag-shooting gamit ini nga video wall nakabulig ha mga aktor nga diri duro nga makapoy ngan nakabulig ini ha mga naghihimo han video nga uroutruhon an pag-shooting han kada eksena. Pananglitan kon nagsu-shooting kami ha gawas, gutiay gud la an amon panahon basi makuha an eksena han pagtunod han adlaw. Pero pinaagi hini nga video wall, puydi la uroutruhon an eksena han pagtunod han adlaw tubtob nga makuha namon an pinakamaopay nga eksena.”

 Ginatos nga mga aktor ngan iba pa nga mabulig ha paghimo han mga video an ginkikinahanglan ha kada episode han Maopay nga Sumat nga serye. Ano an inabat hini nga kabugtoan parte ha tanan nga pangalimbasog ha pagtagana ngan pag-ataman ha ira?

 Hi Amber, nga nagbiyahe hin sobra 700 ka kilometro tikang ha iya balay ha Melbourne basi bumulig hini nga proyekto nagsurat: “Pag-abot ko gud ha airport, gin-ataman gud ako hin maopay han kabugtoan ha Bethel. Damu nga Bethelite an nag-imbitar ha akon basi mangaon o magtsaa. Ha panahon han shooting, inabat ko an pagin komportable ngan an gugma ha akon han kabugtoan. Damu gud an akon nakarawat nga bendisyon ha akon pagboluntaryo. Waray ko gud abata nga nagsakripisyo ako!”

 Hi Derek nga nagtrabaho ha production team nagsiring: “Damu gud nga departamento an nagsuporta ha amon tikang pa ha tinikangan. Mapasalamaton gud ako nga makaupod an kabugtoan nga nagsakripisyo han ira panahon, panag-iya ngan kusog para hini nga proyekto. Mabinuligon gud hira ngan buotan. Sigurado nga ginbendisyonan gud kami ngatanan ni Jehova. Kombinsido gud ako nga interesado hiya diri la ha resulta han amon ginbubuhat kondi pati liwat ha kon paonan-o namon ginbubuhat an buruhaton.”

 Salamat han iyo ginhatag nga mga donasyon upod na ha mga nagdonar pinaagi han donate.pr418.com. Tungod hito, nagin posible an paghimo hini nga mga video.