“Disinoybe ka tuig ko na gud ini nga ginhihinulat!” Ano an ginhihinulat hini nga aton bugto? An Bag-o nga Kalibotan nga Hubad han Kristiano Griego nga Kasuratan ha Bengali, an iya kalugaringon nga yinaknan. Sugad-sugad hito an reaksyon han damu nga tawo kon iginrirelis ha ira yinaknan an Bag-o nga Kalibotan nga Hubad. Pero nahunahuna mo na ba kon ano an nahiuupod ha paghubad ngan pagpublikar hini nga mga Biblia?

 Siyahan, nagtutoka hin translation team ilarom han pagpanginano han Writing Committee han Nagmamando nga Lawas. Ano kaiha para ha usa nga team nga ihubad an Biblia? Ini an siring ni Nicholas Ahladis nga nagtatrabaho ha Translation Services ha Warwick, New York: “Damu an ginkukonsiderar, sugad han kadamu han mga translator nga magagamit para ha proyekto, han kakomplikado han yinaknan, ngan han nahibabaroan han mga magbarasa mahitungod han pagkinabuhi ha panahon han Biblia, pati na kon nag-iiba-iba ito nga yinaknan ha tagsa nga rehiyon. Kasagaran na nga usa tubtob tulo ka tuig an ginkikinahanglan han usa nga team para maihubad an Kristiano Griego nga Kasuratan ngan upat ka tuig o sobra pa para maihubad an bug-os nga Biblia. Mas maiha pa hito an paghubad han mga sign language.”

 Labot han translation team, may iba pa nga ginkikinahanglan ha paghubad han Biblia. Usa nga grupo hin kabugtoan nga iba-iba an kahimtang ha kinabuhi—ngan usahay tikang ha iba-iba nga nasud—an nag-uusisa han hubad, ngan ginbubuhat nira ito nga waray sweldo. An ira mga komento nabulig ha mga translator nga makahimo hin Biblia nga husto, klaro, ngan masayon masabtan. Importante ini, kay sugad han siring han usa nga brother nga nagbabansay ha mga translator han Biblia ha South Africa, “an mga translator naabat hin daku nga responsabilidad kan Jehova ngan ha mga nagbabasa han iya Pulong.”

 Katapos han paghubad, an mga Biblia kinahanglan ig-imprinta ngan ig-bookbind. Basi mahimo ini, an mga imprintahan nagamit hin diri maminos napulo nga materyales: papel, tinta, kobre, papilit, lining han kobre, silver leaf, mga ribbon, mga headband, spine stiffener, ngan capping material para maturugkop an bug-os nga Biblia. Han 2019, sobra 20 milyon ka dolyar (U.S.) an gin-gasto para la hini nga mga materyales nga ginagamit ha paghimo han Biblia. An kabugtoan ha Printery nagtrabaho hin sobra 300,000 ka oras hito nga tuig para maghimo ngan magpadara hin mga Biblia.

 Kay ano nga sugad kadaku nga panahon ngan kwarta an aton igin-gagahin para hito nga mga buruhaton? “An Biblia an pinakaimportante nga libro nga aton iginpupublikar,” siring ni Joel Blue han International Printing Department. “Salit karuyag naton nga an hitsura hito makahatag hin kadungganan ha Dios nga aton ginsisingba ngan ha mensahe nga aton iginsasangyaw.”

 Labot han komon nga mga edisyon han Bag-o nga Kalibotan nga Hubad, nagpupublikar liwat kita hin mga edisyon para ha mga magbarasa nga may espesyal nga panginahanglan. Pananglitan, iginpupublikar naton an braille nga Bag-o nga Kalibotan nga Hubad ha napulo nga yinaknan. An usa la nga Biblia ha braille nagkikinahanglan hin walo ka oras para mahimo, ngan an damu nga tomo hito nagkikinahanglan hin diri maminos 2.3 ka metro nga espasyo ha estante. Naghihimo liwat kita hin espesyal nga edisyon han Biblia para hadton aada ha mga prisohan diin mga libro la nga papel an kobre an igintutugot.

 An Bag-o nga Kalibotan nga Hubad nakakaapekto ha kinabuhi han mga magbarasa hito. An usa nga ehemplo amo an usa nga kongregasyon nga Kiluba an yinaknan ha Tombe, nga nahimumutang ha Democratic Republic of the Congo. Kon mabiyahe ka nga naagi ha kalsada, sobra 1,700 ka kilometro an kahirayo han Tombe tikang ha kapital han nasud. Usa la nga Biblia an nagagamit han mga Saksi didto, ngan kadaan nga Kiluba an mga pulong hito. Iton nag-uusahan nga Biblia ginpapasa-pasa han kabugtoan basi makag-andam hira han ira mga bahin ha katirok. Pero tikang han Agosto 2018, an kada tagsa ha kongregasyon mahimo na magkaada han kompleto nga Bag-o nga Kalibotan nga Hubad nga nagamit hin moderno nga Kiluba.

 Ini an siring han usa nga sister nga German an yinaknan mahitungod han ginrebisa nga Bag-o nga Kalibotan nga Hubad ha iya yinaknan: “Hadto, nasiring ako nga kinahanglan ko basahon an Biblia. Pero yana, nasiring na ako, ‘San-o ako utro magbabasa?’” Usa nga priso an nagsurat: “Gintagan ako hin kopya han Bag-o nga Kalibotan nga Hubad, ngan ginbabag-o na hito an akon kinabuhi. Han nagtikang ako pagbasa hini nga hubad, dida ko pa la nasabtan hin maopay an Pulong han Dios. Karuyag ko mahibaro hin dugang pa mahitungod ha mga Saksi ni Jehova ngan kon paonan-o magigin usa ha ira.”

 An ngatanan nga magbarasa han Bag-o nga Kalibotan nga Hubad mapasalamaton ha mga donasyon nga nabulig ha pagpublikar hito. Ini nga mga donasyon ha bug-os-kalibotan nga buruhaton iginpapadara gamit an mga pamaagi nga makikita ha donate.pr418.com. Salamat han iyo pagkamahinatagon.