An mga Saksi ni Jehova naghihimo hin importante nga buruhaton ha pagbulig ha mga tawo ha sobra 200 nga katunaan. Pero mga 35 la hito nga katunaan an nakakakarawat hin lokal nga donasyon nga igo para ha ira kagarastohan. Paonan-o nasusuportaran an kagarastohan han mga lugar nga limitado ha pinansyal?

 Gin-uusisa han Nagmamando nga Lawas han mga Saksi ni Jehova an espirituwal nga panginahanglan ngan mga buruhaton han ira mga igkasi-Saksi ha bug-os nga kalibotan. Ginbabadyet hin maopay an mga pundo ngan ginagamit ha husto nga paagi. Kon an usa nga branch nakakakarawat hin pundo nga sobra para ha ira lokal nga buruhaton, iginhahatag nira an ira sobra ha mga lugar nga kulang an pundo. Ginsusunod hini nga kahikayan an ehemplo han siyahan-siglo nga mga Kristiano, nga binulig ha usa kag usa ‘pinaagi han pagsarahid.’ (2 Corinto 8:14) Gin-gamit nira an ira sobra basi mapun-an an kakulangan han mga Kristiano nga nagkukuri.

 Ano an inaabat han kabugtoan nga nakakarawat han sobra nga pundo tikang ha iba nga branch? Pananglitan, ha Tanzania, diin sobra katunga han populasyon an may kità nga diri naabot hin duha ka dolyar an usa ka adlaw, gin-gamit ito nga sobra nga pundo ha pag-renovate han Kingdom Hall nga ginagamit han Mafinga Congregation. An kongregasyon nagsurat: “Tikang han renovation, mas nagdamu an naatender ha amon mga katirok! Nagpapasalamat gud kami ha organisasyon ni Jehova ngan ha kabugtoan ha bug-os nga kalibotan kay tungod han ira pagin mahinatagon, nagkaada kami mahusay nga lugar para ha pagsingba.”

 An pipira han aton kabugtoan ha Sri Lanka nakaeksperyensya hin kakulang hin pagkaon tungod han COVID-19 nga pandemya. Usa hito hi Imara Fernando ngan an iya anak nga hi Enosh. Pero tungod han mga donasyon tikang ha iba nga nasud, nakarawat nira an ira ginkikinahanglan nga bulig. Ha ira hinimo nga kard, hira nagsurat: “Nagpapasalamat kami ha kabugtoan nga nagpakita hin gugma ha amon hinin makuri nga mga panahon. Malipayon gud kami nga nagin bahin kami hini nga pamilya, ngan padayon namon nga igin-aampo kan Jehova nga buligan an ngatanan naton nga kabugtoan hinin kataposan nga mga adlaw.”

 Diin man naukoy an aton kabugtoan, napapagios hira nga ipaangbit ha iba an bisan ano nga may-ada hira. Pananglitan, hi Enosh naghimo hin gutiay nga kahon nga iya bubutangan han iya donasyon para makabulig ha mga pamilya nga nanginginahanglan. Iginpapakita liwat ni Guadalupe Álvarez an sugad hito nga pagkamahinatagon. Naukoy hiya ha usa nga lugar ha Mexico diin pipira la an nakakakarawat han minimum nga sweldo o may regular nga kità. Pero nagdudonar hiya han iya maaakos. Hiya nagsurat: “Mapasalamaton ako kan Jehova han iya pagkamaopay ngan maunungon nga gugma. Maaram ako nga an akon donasyon idudugang ha donasyon han iba ngan magagamit han kabugtoan nga nanginginahanglan.”

 An mga branch office nga nagpapadara hin kwarta ha mga lugar nga nanginginahanglan nalilipay ha pagbuhat hito. “Damu ka tuig nga an buruhaton ha amon nasud nagkinahanglan han pinansyal nga suporta han iba nga nasud,” siring ni Anthony Carvalho, nga membro han Branch Committee ha Brazil. “Tungod hito nga suporta, nakita namon an daku nga pag-uswag. Yana, nagbag-o na an amon pinansyal nga kahimtang, ngan pribilehiyo namon nga makabulig liwat ha iba. Ginhuhunahuna han kabugtoan ha Brazil an pagsangyaw nga buruhaton ha bug-os nga kalibotan ngan kon ano an ira mahihimo para makabulig sugad nga mga disipulo ni Jesus nga andam magsakripisyo.”

 Paonan-o masusuportaran han mga Saksi ni Jehova ha pinakamaopay nga paagi an ira kabugtoan nga nanginginahanglan? Diri pinaagi han direkta nga pagpadara hin kwarta ha branch office ha iba nga nasud, kondi pinaagi ha pagdonar para ha bug-os-kalibotan nga buruhaton. Mahihimo ini pinaagi ha donation box han kongregasyon nga may nakabutang nga “Worldwide Work” o gamit an donate.pr418.com. Gin-aapresyar gud ito ngatanan nga donasyon.