Kada tuig, may gin-iimbitar nga kabugtoan nga aada ha espesyal nga bug-os-panahon nga pag-alagad tikang ha iba-iba nga nasud basi umiskwela ha Watchtower Bible School of Gilead, nga ginhihimo ha Watchtower Educational Center ha Patterson, New York. a Hini nga eskwelahan, an mga estudyante nahibabaro kon paonan-o madudumara hin mas maopay an ira iba-iba nga toka ha organisasyon ni Jehova. Ini nga pagbansay nabulig basi maparig-on ngan madasig nira an mga kongregasyon ngan mga sanga nga opisina ha bug-os nga kalibotan.

 An Gilead usa gud nga internasyonal nga eskwelahan. Pananglitan, an ika-147 nga klase, nga gindumara han 2019, may-ada 56 nga estudyante tikang ha 29 nga nasud. An mga estudyante nga naeskwela ha Gilead aada ha espesyal nga bug-os-panahon nga pag-alagad. An pipira ha ira Bethelite, paramangno han sirkito, misyonero, o espesyal payunir.

 An pagpangandam han eskwelahan maiha na nga ginhihimo antes pa han siyahan nga adlaw han klase. Pananglitan, adton gin-imbitar nga umiskwela ginpapalitan hin tiket ha eruplano han World Headquarters Travel Department (WHQ Travel). Para ha ika-147 nga klase han Gilead, an aberids nga gasto tipakadto ha Patterson ngan tipauli han usa nga estudyante nga tikang ha iba nga nasud nagkakantidad hin $1,075 ka dolyar (U.S.). An mga estudyante tikang ha Solomon Islands kinahanglan mag-upat ka sakay hin eruplano tipakadto ha Patterson ngan tulo tipabalik. An ira kabug-osan nga biyahe inabot hin sobra 35,400 ka kilometro! An pasahe han kada usa ha ira inabot hin $2,300 ka dolyar (U.S.). Para makatipid, an WHQ Travel nagamit hin computer booking tool para makabiling hin barato nga tiket. Ngan bisan kon nakapa-reserve na hin tiket, padayon nga nagtsi-tsek an booking tool ha sulod hin mga semana o mga bulan pa ngani kon nagbarato ba an tiket. Nagamit liwat an WHQ Travel hin igindonar nga mga airline mileage basi pumalit hin tiket.

 Damu nga estudyante an nanginginahanglan hin visa para makasulod ha United States. Salit an World Headquarters Legal Department nabulig ha ira nga makakuha hin student visa. An aberids nga gasto ha pagkuha hin visa ngan pagparehistro ha kada estudyante naabot hin $510 ka dolyar (U.S.).

 Paonan-o kita nagpapahimulos ha pagbansay nga nakakarawat hini nga mga estudyante? Hi Hendra Gunawan usa nga tigurang ha Southeast Asia. May kakongregasyon hiya nga mag-asawa nga naggradwar ha Gilead. Siring niya: “Hadto, waray regular payunir ha amon kongregasyon. Pero pag-abot han mga nag-Gilead, an ira kadasig ngan pagin andam ha pagsakripisyo nakaimpluwensya ha iba, salit nagpayunir liwat hira. Ngani ha urhi, an usa nga sister ha amon kongregasyon nag-eskwela ha School for Kingdom Evangelizers.”

 Hi Sergio Panjaitan, nga nag-aalagad ha usa nga Bethel ha Southeast Asia, may mga katrabaho nga naggradwar ha Gilead. Siring niya: “An pagbansay nga ira nakarawat nagin bendisyon diri la para ha ira kondi para liwat ha amon. Damu gud an ira nahibaroan. Pero imbes nga magpaimportante, iginsusumat nira an ira nahibaroan. Nakakadasig ini ha amon, salit nadadasig liwat namon an iba.”

 Diin tikang an pundo para hini nga eskwelahan? Tikang ito ha mga donasyon ha bug-os-kalibotan nga buruhaton, ngan damu hito an iginpapadara gamit an usa han mga pamaagi nga makikita ha donate.pr418.com. Salamat han iyo kinasingkasing nga kontribusyon, nga nakakabulig hinin internasyonal nga eskwelahan.