“Nagdesisyon an Nagmamando nga Lawas, labot la kon may mga restriksyon an lokal nga gobyerno, nga aghaton an ngatanan nga kongregasyon nga ibalik an mga katirok ha Kingdom Hall ha semana han Abril 1.” Ito nga pahibaro nga igin-post ha jw.org temprano han Marso 2022, nakapalipay gud ha mga Saksi ni Jehova ha bug-os nga kalibotan. Pero diri pa tapos an COVID-19 nga pandemya. a Ano nga mga pagbag-o, suplay, ngan garamiton an ginkikinahanglan basi maprotektaran tikang ha virus an mga matambong ha katirok? Paglabay hin mga duha ka tuig nga waray in-person nga mga katirok, andam na ba an aton mga Kingdom Hall?

 Ha pagkatinuod, damu na ka bulan nga nag-andam an aton kabugtoan ha pagbalik han aton mga katirok ha Kingdom Hall.

 Usa pa la ka bulan an naglabay katapos iundang an in-person nga mga katirok han 2020, an Worldwide Design/Construction Department (WDC), ha Warwick, New York, nagtikang mag-analisar kon paonan-o makakaapekto an COVID-19 ha paagi han aton paggamit ha aton mga Kingdom Hall ngan kon ano nga mga pitad an ginkikinahanglan basi masiguro nga talwas an mga lugar nga aton ginkakatirokan.

 An ginkikinahanglan ha usa nga bahin han kalibotan kaurogan na nga iba ha ginkikinahanglan ha iba nga mga lugar. Hi Matthew De Sanctis, nga nagtatrabaho ha WDC, nagsaysay: “Ha pipira nga lugar, usa nga problema an kakulang hin mga lugar diin puydi maghunaw. Kon an Kingdom Hall waray suplay hin tubig, kinahanglan pumalit o mag-alog hin tubig ha hirani nga salog o ha bubon. Ha iba nga mga nasud, an pipira nga gobyerno naghihimo hin mga pagbag-o ha ira mga ginkikinahanglan may kalabotan ha air-conditioning, bentilasyon, ngan mga karatola mahitungod ha kahimsog ngan kalimpyo.”

 Paonan-o ini gin-asikaso han aton kabugtoan? Nakita nira nga ha damu nga Kingdom Hall, “epektibo gud an mga solusyon nga simple ngan barato la,” siring ni Matthew. Pananglitan, ha Papua New Guinea, naghimo hira hin lugar nga hurunawan ngan nagbutang hin plastik nga mga water jug nga may gripo nga eksakto an 5.3 ka galon. Salit ha usa nga hirayo ha syudad nga Kingdom Hall, naitatagana han aton kabugtoan an ginkikinahanglan nga mga gamit ha paghunaw nga an nagagasto la $40 (U.S.). Ha mga Kingdom Hall ha Africa, sobra 6,000 nga de-kalidad nga mga gamit ha paghunaw an ginpalit ha usa nga suplayer ha Asia.

 An iba pa nga ginhimo nga mga pagbag-o nag-uupod ha pagbutang o pagpaopay han mga electric fan ngan bentilasyon basi magin mas presko an hangin ha Kingdom Hall. Damu nga kongregasyon an pinalit hin hilaba nga mga istik nga metal para ha iginpapasa nga mga mikropono basi diri na ito kaptan. Naningkamot liwat nga maibanan ngan regular nga ma-sanitize an mga dapit nga agsob kaptan han mga tawo, sugad han mga door knob ngan mga gripo, diin puydi makakuha hin mga virus. An pipira nga kongregasyon nagbutang ha ira mga kasilyas hin mga gripo nga may sensor, nga awtomatiko nga naawas. Ha Chile, an nagagasto ha pagkaada hito nga mga pagbag-o ha aberids naabot hin $1,400 (U.S.) para ha tagsa nga Kingdom Hall.

 Bisan kon prayoridad han aton kabugtoan nga magin talwas an mga Kingdom Hall, naniningkamot liwat hira ha pagtipid ha igindonar nga mga kwarta. Pananglitan, ha pipira nga nasud, ginsasalingabot nira an bulig han gobyerno ha pagbayad ha mga gamit para ha paghunaw ngan ha hilaba nga mga istik nga metal para ha mikropono. An mga branch office nagbuburublig nga makatipid pinaagi ha pagpalit hin binulto nga mga suplay. An mga branch ngan an Global Purchasing Department kaurogan na nga naghihikay nga direkta nga paliton ito nga mga gamit ha mga kompanya nga naghihimo hito, salit labot la nga minos an presyo hito madagmit liwat ito nga naidideliber.

 An mga kahikayan nga magin mas talwas an mga Kingdom Hall nagpanalipod ngan nagpasarig ha mga natambong ha in-person nga mga katirok. Hi Dulcine, nga usa nga sister ha Peru, nagsiring nga “medyo nahadlok” hiya han nahibaroan niya nga mabalik na kita ha pagkatirok ha Kingdom Hall. “Nagkaada ako COVID-19 waray pag-iha han nagtikang an pandemya,” siring niya. “Salit diri ako komportable nga kumadto ha Kingdom Hall kay maaram ako nga puydi ako utro makakuha han virus. Pero pag-abot ko ha Kingdom Hall, napansin ko nga damu an ginhimo han mga tigurang basi magin talwas kami, sugad han pagbutang hin mga hand sanitizer, paggamit hin hilaba nga mga istik nga metal para ha mga mikropono, ngan pag-disinfect han Kingdom Hall antes ngan katapos han tagsa nga katirok. Ini ngatanan nakabulig ha akon nga umabat nga talwas ako.” b

 Hi Sara, nga usa nga sister ha Zambia, iba naman an ginkabarak-an. Hiya nagsiring: “Han naglabay nga pipira ka bulan, namatay an akon bana tungod han COVID-19. Nabaraka ako han akon aabaton kon tumambong ako ha in-person nga katirok ha siyahan nga higayon nga diri upod an akon bana.” Ano an iya inaabat yana nga natambong na hiya ha Kingdom Hall? Hiya nagsiring: “Para ha akon, an in-person nga mga katirok nagpapamatuod nga hi Jehova kaupod naton hinin kataposan nga mga adlaw. Mas inabat ko gud yana nga nakakarawat ko an pagdasig, gugma, ngan suporta nga akon ginkikinahanglan tikang ha mga tigurang ngan ha iba pa nga kabugtoan.”

 An aton hinigugma nga kabugtoan ha bug-os nga kalibotan mapasalamaton han oportunidad nga makabalik pagkatirok ha mga Kingdom Hall. Salamat ha iyo mga donasyon, nga an kadam-an hito igindonar gamit an donate.pr418.com. Ini nga mga donasyon nakabulig basi masiguro nga an mga sentro han putli nga pagsingba magin komportable ngan talwas nga mga lugar nga ginkakatirokan.