Han Enero 2021, ginpahibaro han Nagmamando nga Lawas an pagrelis han bag-o nga garamiton para ha pag-aram ha Biblia nga Mabuhi hin Malipayon ha Waray Kataposan! a Ano an imo reaksyon hito nga pahibaro? Hi Matthew, nga taga-Canada, nagsiring: “Eksayted ako! Ngan nagin mas eksayted pa gud ako durante han mga pahayag ngan mga video nga nagsasaysay kon kay ano nga ginhimo ito nga publikasyon ngan kon paonan-o ito gintestingan. Eksayted na gud ako nga makita ngan gamiton ito.”

 Iginpapakita han Mabuhi hin Malipayon ha Waray Kataposan! an usa nga bag-o nga paagi ha pagdumara hin mga pag-aram ha Biblia. Pero diri la ito an kaibahan hini nga bag-o nga libro ha naglabay nga mga garamiton para ha pag-aram. Kon nagamit ka hin nakaimprinta nga kopya han Mabuhi hin Malipayon ha Waray Kataposan! bangin mapansin mo liwat nga iba ito. Basi masabtan kon kay ano, usisahon naton kon paonan-o ginhimo an libro.

 Mas madakmol nga papel. Kay ano nga kinahanglan ito? An Mabuhi hin Malipayon ha Waray Kataposan! may-ada sobra 600 nga de-kolor nga mga piktyur nga haros napulo ka beses nga mas damu kay ha Igintututdo ha Aton nga libro! An bag-o nga libro may-ada liwat mas damu nga busag nga espasyo ha mga pahina hito—mga bahin han libro nga waray surat o piktyur. Tungod hini nagkakaada problema: Kon manipis an papel, bangin lumutop an mga piktyur ha luyo nga pahina. Basi malikyan ini, gintestingan han kabugtoan ha International Printing Department (IPD), ha Wallkill, New York, U.S.A., an upat nga klase han papel nga aton ginagamit yana ha aton mga imprintahan. Gin-usisa han Writing Committee han Nagmamando nga Lawas an tagsa nga papel ngan ginpili an pinakamadakmol. Bisan kon ini nga papel mas mahal hin mga 16 ka porsyento kay han papel nga aton ginagamit ha kadam-an han aton iba nga mga publikasyon, pinaagi hito nababasa han mga estudyante ha Biblia an tagsa nga pahina han Mabuhi hin Malipayon ha Waray Kataposan! nga diri nasilhag an mga piktyur ha luyo nga pahina.

 Iba nga laminate an gin-gamit ha kobre. An kobre han bag-o nga libro iba kay han mga kobre han aton iba nga mga libro kay ginputos ito hin iba nga laminate, o protective film. Imbes nga gumamit han normal gloss laminate, an bag-o nga libro ginamit hin matte finish, salit an piktyur ha kobre mas klarado. Ito nga laminate nabulig liwat nga an libro diri dayon maruba bisan kon pirme ito gin-gagamit. Pero an matte laminate mahimo magin mas mahal hin tubtob lima ka doble kay han gloss laminate. Salit nagburublig an pipira nga branch basi makapalit hin mas barato nga matte finish.

 Kay ano nga ini nga mas mahal nga materyales an ginpili? Usa nga brother nga nagtatrabaho ha IPD an nagsaysay: “Naglalaom kami nga ini nga libro pirme gagamiton, salit karuyag namon nga matipigan ito nga maopay la gihapon pagkit-on bisan pirme gin-gagamit.” Hi Eduardo, nga nagtatrabaho ha Printery Office ha Brazil branch, nagsiring: “Nalilipay gud kami nga makita kon paonan-o an organisasyon ni Jehova naggamit hin de-kalidad nga materyales basi ini nga libro magin maopay pagkit-on, marig-on, ngan maopay gamiton samtang maaramon liwat nga ginagamit an mga donasyon.”

 Nagtikang kami pag-imprinta han Mabuhi hin Malipayon ha Waray Kataposan! han Marso 2021. Ha panahon ini nga may COVID-19 nga pandemya, nga nagresulta hin mga problema. Tungod kay naka-lockdown an Bethel, waray mga Bethel commuter nga makakabulig ha aton mga imprintahan, ngan diri liwat makakapasulod hin bag-o nga mga Bethelite. Sugad nga resulta, kulang hin personel an pipira nga imprintahan, ngan an iba temporaryo nga ginpasara tungod han mga restriksyon han gobyerno.

 Paonan-o nalamposan ini nga mga problema? Han puydi na mag-imprinta an mga imprintahan, may mga kabugtoan ha iba nga mga departamento ha Bethel nga temporaryo nga gintokahan nga bumulig ha pag-imprinta. “Tungod han ira pagin andam magsakripisyo ngan andam mahibaro hin bag-o nga mga toka, nagin posible para ha amon nga mahimo an ginkikinahanglan nga mga buruhaton,” siring ni Joel nga nagtatrabaho ha IPD.

 Bisan pa han mga problema, nakag-imprinta na kami hin minilyon nga kopya han Mabuhi hin Malipayon ha Waray Kataposan! Basi mahimo ito, kinahanglan namon hin iba-iba nga klase hin mga materyales, upod na an mga printing plate, laminate film, papel, tinta, ngan padikit. Ha siyahan nga lima ka bulan pa la han pag-imprinta, sobra 2.3 milyon ka dolyar (U.S.) an gin-gasto ha mga materyales pa la. Basi makatipid, ginsiguro namon nga an ig-imprinta la an kadamu han libro nga ginkikinahanglan han mga kongregasyon.

 Ano an inabat han mga nagdudumara hin pag-aram ha Biblia ngan han ira mga estudyante mahitungod hinin bag-o nga garamiton para ha pag-aram ha Biblia? Hi Paul, usa nga brother ha Australia, nagsiring: “Nag-i-enjoy gud ako paggamit han Mabuhi hin Malipayon ha Waray Kataposan! salit eksayted ako ha pagdumara hin mga pag-aram ha Biblia. An layout han libro maopay hinduro ngan interactive gud ito. Klaro gud an mga impormasyon hito, makapagios ha kasingkasing an mga pakiana, may mga video, piktyur, tsart, ngan an puydi buhaton han estudyante. Maopay gud an kahimo hito salit napapagios ako nga pauswagon an akon pagtutdo.”

 Usa nga estudyante ha Biblia ha United States an nagsiring: “Naruyagan ko gud an bag-o nga libro. An mga piktyur nabulig ha akon nga masabtan an nangunguna nga mga punto. An mga video nakakabantad han akon kasingkasing ngan nakakaaghat ha akon nga gumios.” Ini nga estudyante duha ka beses nga nagpapa-Bible study ha usa ka semana ngan regular nga natambong ha mga katirok ha kongregasyon.

 Minilyon nga kopya han Mabuhi hin Malipayon ha Waray Kataposan! an iimprintahon pa ha damu nga yinaknan. Ngani, ha pagkayana, gin-aprobaran han Nagmamando nga Lawas nga ipublikar ini nga libro ha 710 nga yinaknan, mas damu ini hin 340 kay ha gin-aprobaran nga kadamu han yinaknan para ha Igintututdo ha Aton nga libro!

 Diin kita nakuha hin pundo nga ginagamit ha pag-imprinta? Ginkuha ito ha mga donasyon para ha bug-os-kalibotan nga buruhaton, nga an kadam-an hito igindonar gamit an donate.pr418.com. Salamat han iyo pagkamahinatagon, nga nabulig basi makahimo kita hin mga garamiton para ha pag-aram ha Biblia para ha mga karuyag mahibaro mahitungod kan Jehova ngan mabuhi hin malipayon ha waray kataposan.—Salmo 22:26.