Makasaysayan an 2020 nga regional nga kombensyon—ito an siyahan nga kombensyon ha bug-os nga kalibotan nga ginrekord ngan maa-access pinaagi ha Internet! Pero ha Malawi ngan Mozambique, kadam-an han aton kabugtoan an naka-access ha kombensyon nga waray gumamit han Internet. Paonan-o ito nahitabo?

 Gin-aprobaran han Coordinators’ Committee ngan Teaching Committee han Nagmamando nga Lawas nga ibrodkast an kombensyon pinaagi ha TV ngan radyo ha Malawi ngan Mozambique. Kay ano nga kinahanglan ini? An Malawi an usa han may pinakamahal nga Internet ha bug-os nga kalibotan, salit pipira la nga Saksi an nakaka-access ha Internet. Ini an iginsaysay ni William Chumbi, usa nga membro han Branch Committee ha Malawi: “Pinaagi la ha radyo ngan TV makakakarawat hin espirituwal nga pagkaon an mga kabugtoan.” Hi Luka Sibeko, nga membro liwat han Branch Committee ha Malawi, dugang nga nagsiring: “Kon waray ito ibrodkast ha TV ngan radyo, pipira la nga kabugtoan ha teritoryo han amon branch an posible nga magpahimulos han kombensyon.” Ha Mozambique liwat, pipira la nga kabugtoan an kaya pumalit hin gadyet, labi na han Internet.

 Tungod han COVID-19 nga pandemya, may pipira nga estasyon han TV ngan radyo nga nagbubrodkast na han mga katirok han kongregasyon. a Ginkontak han aton mga kabugtoan ini nga mga estasyon ngan ginhangyo nga magdugang hin oras basi ibrodkast an kombensyon.

 Ha Malawi, nagkaproblema an aton kabugtoan. Kaurogan na nga usa la ka oras an ginhahatag han mga estasyon ha ira mga kustomer. Nababaraka an mga estasyon nga kon mag-iiha an programa bangin diri na mamati an mga tawo. Pero iginsaysay han aton mga kabugtoan nga an aton buruhaton usa nga serbisyo publiko. Bisan ha panahon han lockdown, naghahatag kita ha publiko hin nakakaliaw nga maopay nga sumat tikang ha Biblia, nga makakabulig ha mga tawo nga magin maopay nga tuminungnong ngan magkaada malipayon nga pamilya. Han hinbatian nira ini, ginkarawat han mga estasyon an hangyo han kabugtoan nga dugangan an oras.

 Ha Malawi, iginbrodkast an kombensyon ha usa nga estasyon ha TV ngan ha usa nga estasyon ha radyo, nga pariho nga nakakagbrodkast ha bug-os nga nasud ngan posible nga makaabot ha minilyon nga tawo. Ha Mozambique, iginbrodkast an kombensyon ha usa nga estasyon han TV ngan ha 85 nga estasyon han radyo.

 Hini nga duha nga nasud, inabot hin $28,227 b an gin-gasto ha pagbrodkast han kombensyon ha TV ngan haros $20,000 ha radyo. Iba-iba an bayad para ha estasyon han radyo—tikang ha $15 para ha gutiay nga estasyon ngadto ha $2,777 para ha estasyon nga nakakagbrodkast ha bug-os nga nasud.

 An aton kabugtoan nangalimbasog nga gamiton ha pinakamaopay nga paagi an mga donasyon. Pananglitan, ha Malawi, nahangyo nira an mga estasyon nga ibanan an presyo. May ginhatag pa ngani ha ira nga 30 porsyento nga discount. Tungod hini, nakatipid hira hin $1,711. Ha Mozambique, an pipira nga estasyon andam nga ibanan an ira presyo tungod han aton maopay nga reputasyon ha pagin tangkod ngan ha pagbayad ha husto nga panahon.

 Malipayon gud an aton kabugtoan ha pagkita o pagpamati han kombensyon ha mga estasyon ha ira lugar. Hi Patrick nga tigurang ha Malawi, nagsiring: “Nagpapasalamat kami ha kabugtoan ha Nagmamando nga Lawas han ngatanan nira nga ginbuhat para ha amon ha panahon han pandemya.” Hi Isaac nga taga Malawi liwat, nagsiring: “Waray kami mga gadyet, salit mapasalamaton gud kami han espesyal nga probisyon han organisasyon ni Jehova nga mabatian an kombensyon ha radyo. Tungod hini, an akon bug-os nga pamilya nagpahimulos han kombensyon. Para ha amon, ebidensya ini han gugma ni Jehova ha iya katawohan.”

 An 2020 nga kombensyon amo an siyahan nga kombensyon nga gintambongan han usa nga magwarali ha Mozambique. Hiya nagsiring: “An kahikayan nga kitaon an kombensyon ha TV nagpahinumdom ha akon nga hi Jehova amo an Dios nga makagarahum-ha-ngatanan. Waray makapugong ha iya an pandemya ha paghatag ha amon hin espirituwal nga pagkaon ngan iginhatag niya ito didi mismo ha amon balay. Nakita ko an ebidensya han gugma ha katawohan ni Jehova. Kombinsido ako nga amo ini an tinuod nga relihiyon.”

 An tigurang nga hi Wyson nagsiring: “Karuyag ko magpasalamat ha paagi han pag-ataman ha amon han matinumanon nga uripon ha panahon han pandemya. Ini nga probisyon nga ibrodkast an kombensyon ha radyo ngan TV nakabulig ha damu ha amon nga nagkukuri ha pinansyal dinhi ha pobre nga mga nasud basi makapahimulos kami han programa.”

 Para ha 2021 nga regional nga kombensyon, gin-aprobaran utro han Coordinators’ Committee ngan Teaching Committee nga ibrodkast an kombensyon ha TV ngan radyo ha pinili nga mga komunidad. Paonan-o naton gintataparan an mga gastos ha pagbrodkast han kombensyon hini nga paagi? Pinaagi han mga donasyon ha worldwide work, diin an damu hito iginhahatag gamit an iba-iba nga pamaagi ha donate.pr418.com. Salamat han iyo mga donasyon.